ប្រាក់រៀល ៣ប្រភេទនាសម័យសង្គមរាស្ត្រនិយមឆ្លុះបញ្ចាំងពីវប្បធម៌ សាសនា និងជីវភាពប្រជាជនខ្មែរ
បន្ទាប់ពីសម័យអាណាព្យាបាលបារាំងត្រូវបានបញ្ចប់ ប្រទេសកម្ពុជាចាប់ផ្ដើមមានរូបិយវត្ថុជាតិដោយខ្លួនឯងដើម្បីជំនួសប្រាក់ព្យ៉ាស់។ ប្រាក់រៀលត្រូវបានចេញផ្សាយដំបូងនៅខែកញ្ញា ឆ្នាំ១៩៥៥ ក្នុងសម័យសង្គមរាស្ត្រនិយម។
ប្រាក់រៀលត្រូវបានគ្រប់គ្រងយ៉ាងប្រុងប្រយ័ត្នដោយធនាគារជាតិនៃកម្ពុជា និងបានដើរតួនាទីយ៉ាងសកម្មសម្រាប់គោលនយោបាយអភិវឌ្ឍន៍របស់របបសង្គមរាស្ត្រនិយមដែលផ្តោតលើការអប់រំ សុខាភិបាល និងហេដ្ឋារចនាសម្ព័ន្ធជាដើម។ ទាំងនេះគឺជារូបិយវត្ថុជាតិដែលបានចេញផ្សាយនៅចន្លោះឆ្នាំ១៩៥៥ ដល់១៩៧០ ដែលក្នុងនោះមានក្រដាសប្រភេទ ៥០០រៀល ២ប្រភេទ និងក្រដាស ១០០០រៀល ១ប្រភេទ ។
ក្រដាសប្រាក់ប្រភេទ ៥០០រៀល បោះផ្សាយឆ្នាំ១៩៥៦ បានរំលេចនូវរូបវត្តអារាម ព្រះពុទ្ធសាសនាខ្មែរនៅផ្នែកខាងមុខ អមដោយរុក្ខជាតិ ព្រៃព្រឹក្សានៅសងខាង ហើយនៅផ្នែកខាងក្រោយវិញមានរូបប្រជាកសិករខ្មែរកំពុង ភ្ជួរស្រែដោយប្រើកម្លាំងសត្វគោជាជំនួយអូសនង្គ័ល ទិដ្ឋភាពនេះសឹងតែលែងមានទៅហើយនាបច្ចុប្បន្នដោយសារគេនិយមប្រើត្រាក់ទ័រ និងគោយន្តជំនួសវិញ។
ប្រភេទក្រដាស ៥០០រៀលដែលបោះមួយប្រភេទទៀតនៅឆ្នាំតែមួយ គឺឆ្លុះបញ្ចាំងច្រើនអំពីសិល្បៈវប្បធម៌ដោយផ្នែកខាងមុខ មានលម្អទៅដោយចម្លាក់ទេពអប្សរា ទំនងជាចម្លងពីប្រាសាទអង្គរវត្ត និងតាព្រហ្ម ហើយផ្នែកខាងក្រោយ ដាក់បង្ហាញពីរបាំបុរាណខ្មែរមួយប្រភេទ (កេន្នរី?)។
ចុងក្រោយគឺក្រដាសប្រាក់ប្រភេទ១០០០រៀល ដែលបោះផ្សាយឆ្នាំ១៩៦១ មានរំលេចរូបប្រាសាទព្រះវិហារខ្មែរគោបុរៈទី៥ នៅផ្នែកខាងមុខហើយផ្នែកខាងក្រោយ គឺទិដ្ឋភាពពីលើអាកាសនៃភ្នំដងរែក ត្រង់ផ្នែកដែលគេឲ្យឈ្មោះថាភ្នំព្រះវិហារ ដែលគេឃើញប្រាសាទព្រះវិហារយ៉ាងច្បាស់នៅលើក្រដាសប្រាក់នោះ៕
ប្រភព៖ social.sabay អត្ថបទ៖ សៀនហួរ
រូបិយវត្ថុស្ថិតក្នុងចរាចរណ៍
