ទាក់ទងនឹងការចោទប្រកាន់របស់ថៃជុំវិញបញ្ហាព្រំដែន ថ្ងៃទី២៤ ខែមិថុនា ឆ្នាំ២០២៦
ទាក់ទងនឹងការចោទប្រកាន់របស់ថៃជុំវិញបញ្ហាព្រំដែន ថ្ងៃទី២៤ ខែមិថុនា ឆ្នាំ២០២៦
ការឆ្លើយតបរបស់ក្រុមការងារសាធារណមតិកម្ពុជា (Cambodia PR Team)
ទាក់ទងនឹងការចោទប្រកាន់របស់ថៃជុំវិញបញ្ហាព្រំដែន
ថ្ងៃទី២៤ ខែមិថុនា ឆ្នាំ២០២៦
សំណួរទី១៖ តើការអះអាងរបស់ភាគីថៃថា ប្រតិបត្តិការយោធាថៃនាពេលកន្លងមក ធ្វើឡើងស្របតាមសិទ្ធិការពារខ្លួន គឺជារឿងសមហេតុផលដែរឬទេ?
ចម្លើយ៖ កម្ពុជាយល់ថា ការអះអាងរបស់ថៃអំពីសិទ្ធិការពារខ្លួន គ្រាន់តែជាលេសដោះសារចំពោះសកម្មភាពយោធាដែលបានកើតឡើងប៉ុណ្ណោះ។ ជាក់ស្តែង កងទ័ពថៃបានប្រើប្រាស់យន្តហោះចម្បាំង F-16 វាយប្រហារជ្រៅចូលមកក្នុងទឹកដីកម្ពុជា ដែលបណ្តាលឱ្យមានការខូចខាតដល់ហេដ្ឋារចនាសម្ព័ន្ធស៊ីវិលជាច្រើន រួមមានស្ពាន ថ្នល់ សាលារៀន មន្ទីរពេទ្យ វត្តអារាម និងទីតាំងស៊ីវិលផ្សេងៗទៀត។ កម្ពុជាយល់ថា ការវាយប្រហារលើគោលដៅស៊ីវិលបែបនេះ មិនអាចចាត់ទុកថាជាការអនុវត្តសិទ្ធិការពារខ្លួនដោយស្របច្បាប់បានឡើយ ហើយផ្ទុយទៅវិញ បានបង្កការព្រួយបារម្ភយ៉ាងខ្លាំងចំពោះការគោរពច្បាប់មនុស្សធម៌អន្តរជាតិ និងគោលការណ៍ការពារជនស៊ីវិលក្នុងពេលមានជម្លោះប្រដាប់អាវុធ។ ម្យ៉ាងទៀត បើភាគីថៃអះអាងថា ខ្លួនមិនបានឈ្លានពាននិងកាន់កាប់ទឹកដីកម្ពុជាទេនោះ ម្តេចក៏ភាគីថៃតែងតែព្យាយាមគេចវេសពីការវាស់វែងខណ្ឌ័សីមាព្រំដែនឱ្យបានឆាប់ដូចដែលកម្ពុជាបានស្នើ? កម្ពុជាសង្ឃឹមថា គ្មានអ្វីអាចបិទបាំងការពិតបានឡើយ។
សំណួរទី២៖ តើការចោទប្រកាន់របស់ថៃដែលថា កម្ពុជាបានប្រើប្រាស់ស្ពានថ្មដាជាគោលដៅយោធា គឺជាការពិតដែរឬទេ?
ចម្លើយ៖ ការលើកឡើងបែបនេះគ្រាន់តែជាការបង្កើតលេសក្នុងចេតនាបង្ហាញភាពស្របច្បាប់ចំពោះការវាយប្រហារលើហេដ្ឋារចនាសម្ព័ន្ធស៊ីវិលរបស់កម្ពុជា។ ស្ពានថ្មដាជាសម្បត្តិស៊ីវិលដែលបម្រើដល់ការធ្វើដំណើរ ការដឹកជញ្ជូនទំនិញ និងជីវភាពរស់នៅប្រចាំថ្ងៃរបស់ប្រជាពលរដ្ឋ មិនមែនជាគោលដៅយោធាដូចការអះអាងរបស់ថៃនោះទេ។
ការវាយប្រហារលើស្ពានថ្មដា គឺជាផ្នែកមួយនៃសកម្មភាពដែលបានបង្កការខូចខាតដល់ហេដ្ឋារចនាសម្ព័ន្ធស៊ីវិលនៅក្នុងទឹកដីកម្ពុជា។ ការវាយប្រហារនេះ មិនត្រឹមតែប៉ះពាល់ដល់ហេដ្ឋារចនាសម្ព័ន្ធប៉ុណ្ណោះទេ ប៉ុន្តែថែមទាំងប៉ះពាល់ដោយផ្ទាល់ដល់ការរស់នៅ សុវត្ថិភាព និងការធ្វើដំណើររបស់ប្រជាពលរដ្ឋស៊ីវិលផងដែរ។ ហេដ្ឋារចនាសម្ព័ន្ធយោធា និងស៊ីវិលមិនដូចគ្នាទេ។ អ្នកណាក៏អាចបែងចែករឿងនេះបានដែរ ដូច្នេះ ការលើកឡើងបែបនេះជារឿងគួរឱ្យខ្មាសអៀន។
សំណួរទី៣៖ តើកម្ពុជាយល់ដូចម្តេច ចំពោះការប្រកាសជំហរអំពាវនាវរកសន្តិភាពរបស់ថៃ?
ចម្លើយ៖ កម្ពុជាតែងតែគាំទ្រសន្តិភាព និងការដោះស្រាយបញ្ហាដោយសន្តិវិធី និងស្វាគមន៍ជំហរដោះស្រាយបញ្ហាដោយសន្តិវិធី។ ទោះជាយ៉ាងណា ការអំពាវនាវរកសន្តិភាពគួរតែត្រូវបានបង្ហាញតាមរយៈសកម្មភាពជាក់ស្តែង មិនមែនត្រឹមតែជាការប្រកាសជាពាក្យសម្តីនៅចំពោះមុខសារព័ត៌មាន ឬសហគមន៍អន្តរជាតិប៉ុណ្ណោះទេ។ ប្រសិនបើថៃពិតជាចង់បានសន្តិភាព និងស្ថិរភាពនៅតាមព្រំដែនមែន ភាគីថៃគួរតែបញ្ឈប់សកម្មភាពដែលអាចចាត់ទុកថាជាការឈ្លានពាន ឬបង្កើនភាពតានតឹង ត្រូវគោរពអធិបតេយ្យភាព និងបូរណភាពទឹកដីរបស់កម្ពុជា ព្រមទាំងអនុវត្តឱ្យបានពេញលេញនូវកាតព្វកិច្ចដែលមានចែងក្នុងបទឈប់បាញ់ថ្ងៃទី២៧ ខែធ្នូ ឆ្នាំ២០២៥ និងកិច្ចព្រមព្រៀងពាក់ព័ន្ធដែលភាគីទាំងពីរបានឯកភាពគ្នា ជាពិសេសការចាត់បញ្ជូនក្រុមបច្ចេកទេសចម្រុះវាស់វែងខណ្ឌ័សីមាព្រំដែនឱ្យបានឆាប់បំផុតតាមសំណើរបស់គណៈកម្មការ JBC កម្ពុជា៕
