ការផ្តល់ជម្រកបណ្តោះអាសន្នជូនបងប្អូនជនភៀសសឹកដែលមិនទាន់អាចវិលត្រឡប់ទៅផ្ទះសម្បែងវិញបាន មិនមែនមានន័យថា រាជរដ្ឋាភិបាលបោះបង់សិទ្ធិទាមទារទឹកដីដែលកងកម្លាំងថៃកំពុងកាន់កាប់ដោយខុសច្បាប់នោះឡើយ (ថ្ងៃទី១៧ ខែកុម្ភៈ ឆ្នាំ២០២៦)
ថ្ងៃនេះ អ្នកនាំពាក្យរាជរដ្ឋាភិបាលសូមបន្តជម្រាបជូនបងប្អូនជនរួមជាតិជ្រាបអំពីការយកចិត្តទុកដាក់របស់រាជរដ្ឋាភិបាលចំពោះប្រជាពលរដ្ឋភៀសសឹក និងកាតព្វកិច្ចការពារបូរណភាពទឹកដីរបស់រាជរដ្ឋាភិបាល ដូចការគ្រោងទុក ពិធីបញ្ចុះបឋមសិលាដើម្បីចាប់ផ្តើមសាងសង់ជម្រកបណ្តោះអាសន្នជូនប្រជាពលរដ្ឋភៀសសឹកបានប្រព្រឹត្តទៅជាបន្តបន្ទាប់ប៉ុន្មានថ្ងៃចុងក្រោយនេះ ក្នុងបណ្តាខេត្តមួយចំនួនតាមជាយដែន ក្រោយពីក្រសួងរៀបចំដែនដី នគរូបនីយកម្ម និងសំណង់ បានកំណត់ទីតាំងនិងសិក្សារួចរាល់។
