កម្ពុជាព្រួយបារម្ភខ្លាំងពីគ្រោះថ្នាក់នៃយុទ្ធភណ្ឌមិនទាន់ផ្ទុះបន្សល់ទុកដោយយោធាថៃ

កម្ពុជាព្រួយបារម្ភខ្លាំងពីគ្រោះថ្នាក់នៃយុទ្ធភណ្ឌមិនទាន់ផ្ទុះបន្សល់ទុកដោយយោធាថៃ

#National

នៅក្នុងសេចក្តីថ្លែងការណ៍មួយផ្សព្វផ្សាយកាលពីយប់ថ្ងៃទី២៩មករា អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន បានសម្តែងការ ព្រួយបារម្ភយ៉ាងខ្លាំងចំពោះឧប្បត្តិហេតុផ្ទុះគ្រាប់បែកចង្កោម ដែលបណ្តាលឱ្យបុគ្គលិកក្រុមហ៊ុនតបណ្តាញ អគ្គិសនីចំនួន ០៣នាក់ បានរងរបួសធ្ងន់ ស្រាល នៅព្រឹកថ្ងៃទី២៩ ខែមករា ឆ្នាំ២០២៦ នៅស្រុកបន្ទាយ អំពិល ខេត្តឧត្តរមានជ័យ។

ឧប្បត្តិហេតុនេះ បានកើតឡើងខណៈពេលដែលជនរងគ្រោះ កំពុងបំពេញការងារ។ សោកនាដកម្ម នេះ បានបង្ហាញឱ្យឃើញពីគ្រោះថ្នាក់ធ្ងន់ធ្ងរ និងមិនរើសអើង ដែលបង្កឡើងដោយគ្រាប់បែកចង្កោម បន្សល់ពីសង្គ្រាម។

អាជ្ញាធរមីន សូមសម្តែងនូវសម្មានចិត្តអាណិតអាសូរដោយស្មោះ ចំពោះបុគ្គលិកដែលរងរបួស និង ក្រុមគ្រួសាររបស់ពួកគេ ហើយត្រៀមខ្លួនជាស្រេចដើម្បីគាំទ្រការសម្របសម្រួល ការថែទាំវេជ្ជសាស្ត្រ ស្តារនីតិសម្បទា និងសេវាជំនួយជនរងគ្រោះផ្សេងៗ។

យោងតាមអាជ្ញាធរមីនកម្ពុជា ឧប្បត្តិហេតុនេះបានឆ្លុះបញ្ចាំងពីការពិត ដែលកម្ពុជាតែងតែបានលើកឡើង អំពីផលវិបាកមនុស្សធម៌យូរអង្វែងបង្ករឡើងដោយគ្រាប់បែកចង្កោម។ ទោះបីសង្គ្រាមបានបញ្ចប់ សំណល់ជាតិផ្ទុះនៅតែបន្តបង្កហានិភ័យដល់អាយុជីវិត រំខានជីវភាពរស់នៅ និងរារាំង ការអភិវឌ្ឍជាច្រើនទសវត្សរ៍ទៅមុខ។ ជនរងគ្រោះនៃអាវុធទាំងនេះមិនមែនជាកងកម្លាំងយោធាទេ ប៉ុន្តែ ជាជនស៊ីវិល កសិករ កម្មករ និងកុមារ ដែលជួបប្រទះនឹងគ្រោះថ្នាក់ទាំងនេះ ក្នុងសកម្មភាពរស់នៅប្រចាំថ្ងៃរបស់ពួកគេ។

អាស្រ័យហេតុនេះ អាជ្ញាធរមីន បានគូសបញ្ជាក់ជាថ្មីពីការយកចិត្តទុកដាក់បន្ទាន់ ចំពោះផលប៉ះពាល់មនុស្សធម៌ បង្កដោយគ្រាប់បែកចង្កោម និងសំណល់ផ្ទុះពីសង្គ្រាម។ ការបោសសំអាត ការអប់រំផ្សព្វផ្សាយ ពីយុទ្ធភណ្ឌគ្រឿងផ្ទុះ និងកិច្ចសង្គ្រោះជនរងគ្រោះ នៅតែចាំបាច់ដើម្បីការពារសហគមន៍រងគ្រោះរបស់យើង។

អាជ្ញាធរមីនអំពាវនាវដល់ស្ថាប័ននានា វិស័យឯកជន និងដៃគូអភិវឌ្ឍន៍ទាំងអស់ដែលប្រតិបត្តិការ នៅក្នុងតំបន់ដែលធ្លាប់មានជម្លោះ ឬតំបន់ព្រំដែន សូមសម្របសម្រួលសហការយ៉ាងជិតស្និទ្ធជាមួយ មជ្ឈមណ្ឌលស៊ីម៉ាក់ និងប្រតិបត្តិករសកម្មភាពមីនផ្សេងទៀត មុនពេលធ្វើសកម្មភាពនានា។

ការសិក្សា ស្រាវជ្រាវ និងការបោសសំអាត នៅតែជាវិធានការដ៏មានប្រសិទ្ធភាពបំផុត ដើម្បីការពារមិនឱ្យមានការរង គ្រោះជាបន្តបន្ទាប់។

កម្ពុជានៅតែប្តេជ្ញាចិត្តក្នុងការដោះស្រាយកេរ្តិ៍ដំណែលនៃសំណល់ជាតិផ្ទុះពីសង្គ្រាមប្រកបដោយ ការទទួលខុសត្រូវ និងមនុស្សធម៌ ហើយនឹងបន្តធ្វើការជាមួយដៃគូជាតិ និងអន្តរជាតិ ដើម្បីកាត់បន្ថយ គ្រោះថ្នាក់ និងការពារសហគមន៍។

អត្ថបទដោយ៖ ទាវ សារៈមុនី