ការកែទម្រង់វិស័យ SMEs៖ ជំហានយុទ្ធសាស្ត្រជំរុញសេដ្ឋកិច្ច និងការពារផលប្រយោជន៍ប្រជាពលរដ្ឋ

ការកែទម្រង់វិស័យ SMEs៖ ជំហានយុទ្ធសាស្ត្រជំរុញសេដ្ឋកិច្ច និងការពារផលប្រយោជន៍ប្រជាពលរដ្ឋ

[Op-Ed]​

សហគ្រាសធុនតូច និងមធ្យម (SMEs) ត្រូវបានទទួលស្គាល់យ៉ាងទូលំទូលាយថាជា «ឆ្អឹងខ្នង» នៃសេដ្ឋកិច្ចជាតិ ដោយដើរតួនាទីយ៉ាងសំខាន់ក្នុងការជំរុញកំណើនសេដ្ឋកិច្ច បង្កើតការងារ និងបង្កើនប្រាក់ចំណូលសម្រាប់ប្រជាពលរដ្ឋ។ ទោះជាយ៉ាងណា សក្ដានុពលនៃវិស័យនេះមិនអាចអភិវឌ្ឍបានពេញលេញឡើយ ប្រសិនបើនីតិវិធីរដ្ឋបាល ជាពិសេសការចុះបញ្ជីអាជីវកម្ម នៅតែមានភាពស្មុគស្មាញ និងចំណាយពេលយូរ។ ហេតុនេះ ការកែទម្រង់ និងសម្រួលនីតិវិធីចុះបញ្ជីឱ្យកាន់តែសាមញ្ញ ឆាប់រហ័ស និងមានប្រសិទ្ធភាព គឺជាយុទ្ធសាស្ត្រដ៏សំខាន់ក្នុងការបង្កើតបរិយាកាសអំណោយផលសម្រាប់អាជីវកម្មក្នុងស្រុក អាចចាប់ផ្តើមប្រតិបត្តិការដោយទំនុកចិត្ត ពង្រីកការវិនិយោគ និងរួមចំណែកកាន់តែច្រើនដល់ការអភិវឌ្ឍសេដ្ឋកិច្ច និងសង្គមជាតិ។

​ ចំណុចលេចធ្លោបំផុតនៃការកែទម្រង់លើកនេះ គឺការដាក់ចេញនូវបទបញ្ជាយ៉ាងច្បាស់លាស់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ឱ្យក្រសួង-ស្ថាប័នពាក់ព័ន្ធកំណត់ពេលវេលាជាក់លាក់សម្រាប់ការពិនិត្យ និងផ្តល់ការអនុញ្ញាតចំពោះផលិតផលដែលមានហានិភ័យទាប និងមិនប៉ះពាល់ផ្ទាល់ដល់សុខភាពមនុស្ស។ បន្ទាប់ពីការពិនិត្យ និងសម្រួលនីតិវិធីយ៉ាងហ្មត់ចត់ រយៈពេលចេញលិខិតអនុញ្ញាតឱ្យចរាចរផលិតផលប្រភេទនេះ ត្រូវបានកាត់បន្ថយមកនៅត្រឹម ៦ ថ្ងៃប៉ុណ្ណោះ។ ការពន្លឿននីតិវិធីនេះ មិនត្រឹមតែជួយកាត់បន្ថយពេលវេលា និងថ្លៃដើមប្រតិបត្តិការរបស់អាជីវករប៉ុណ្ណោះទេ ប៉ុន្តែថែមទាំងពង្រឹងសមត្ថភាពប្រកួតប្រជែងរបស់ផលិតផលក្នុងស្រុក ឱ្យអាចឆ្លើយតបទៅនឹងតម្រូវការទីផ្សារបានឆាប់រហ័ស និងមានប្រសិទ្ធភាពជាងមុន ដែលជាកត្តាជំរុញដ៏សំខាន់សម្រាប់កំណើនសេដ្ឋកិច្ចជាតិ។
​
ទន្ទឹមនឹងការជំរុញល្បឿនសម្រាប់ផលិតផលទូទៅ រាជរដ្ឋាភិបាលក៏មិនមើលរំលងនូវសុវត្ថិភាពរបស់​អ្នកប្រើប្រាស់នោះដែរ។ ចំពោះផលិតផលដែលមានហានិភ័យមធ្យម និងខ្ពស់ ជាពិសេសប្រភេទសាប៊ូ ឬផលិតផលដែលប៉ះពាល់ផ្ទាល់ដល់រាងកាយ ដំណើរការនៃការធ្វើតេស្តលក្ខណៈមីក្រូជីវសាស្ត្រ រូបវន្ត និងគីមី រួមទាំងការពិនិត្យវត្ថុធាតុដើមនៅតែត្រូវបានអនុវត្តយ៉ាងម៉ឺងម៉ាត់។ អ្វីដែលជាចំណុចពិសេសនៃ​វិធានការថ្មីនេះ គឺទោះបីជាត្រូវធ្វើតេស្តត្រួតពិនិត្យល្អិតល្អន់យ៉ាងណាក៏ដោយ ក៏ការកំណត់កាលបរិច្ឆេទនៃ​ការបញ្ចប់ការធ្វើតេស្តត្រូវបានកំណត់យ៉ាងច្បាស់លាស់ ដើម្បីធានាថាដំណើរការពិនិត្យមិនក្លាយជារបាំង​រាំង​ស្ទះនៃការធ្វើអាជីវកម្មឡើយ។
​
ការអនុវត្តគម្រោងសាកល្បង (Pilot Project) ទៅលើសិប្បកម្មខ្នាតតូចដែលរៀបចំដោយក្រសួងឧស្សាហកម្ម បច្ចេកវិទ្យា វិទ្យាសាស្ត្រ និងនវានុវត្តន៍ គឺជាសាក្សីបង្ហាញពីការយកចិត្តទុកដាក់ និងការរៀប​ចំ​យន្ត​ការ​យ៉ាងល្អិតល្អន់។ ការសាកល្បងនេះមានគោលបំណងស្វែងរកតុល្យភាពរវាង «ល្បឿននៃការចូល​ទី​ផ្សារ» និង «គុណភាពសុវត្ថិភាព​ផលិតផល»។ តាមរយៈការប្រជុំពិភាក្សា និងការកែសម្រួលយន្តការ​អនុវត្តជាក់ស្តែងជា​និរន្តរ៍ រដ្ឋាភិបាលកំពុងបង្កើត​បរិយាកាសអំណោយផល​មួយដែលជួយឱ្យម្ចាស់សិប្បកម្មក្នុ​ងស្រុក​អាចពង្រីកសក្ដានុពលរបស់ខ្លួន និងឆ្លើយតបបានយ៉ាងពេញលេញចំពោះតម្រូវការប្រើប្រាស់របស់​ប្រជាពលរដ្ឋ។ ចំណុចរបត់ដ៏សំខាន់នៃកិច្ចខិតខំប្រឹងប្រែងនេះ កើតចេញពីឆន្ទៈនយោបាយ និងការប្តេជ្ញា​ចិត្តខ្ពស់​របស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។ ការសម្លឹងឃើញយ៉ាងច្បាស់នូវបញ្ហា​ប្រឈម និងភាពស្មុគស្មាញដែលម្ចាស់សហគ្រាសជួបប្រទះនាពេលកន្លងមក បានក្លាយជាកម្លាំងចល​ករ​ជំរុញឱ្យមានការកែ​ទម្រង់ជារចនាសម្ព័ន្ធ។ ការដឹកនាំដោយផ្ទាល់​របស់​ប្រមុខរាជរដ្ឋាភិបាលបានឆ្លុះបញ្ចាំង​ពី​ទស្សនវិស័យច្បាស់លាស់ក្នុងការផ្លាស់ប្តូរស្ថាប័នរដ្ឋឱ្យក្លាយជា «ដៃគូសម្របសម្រួល» ជាជាងការ​ធ្វើ​ជា «របាំងរារាំង» ដល់ការលូតលាស់នៃអាជីវកម្មក្នុងស្រុក។
​
ទន្ទឹមនឹងនេះ សម្តេចមហាបវរធិបតី ហ៊ុន ម៉ាណែត ក៏បានផ្តល់អនុសាសន៍ដ៏ខ្ពង់ខ្ពស់ ដើម្បីលុបបំបាត់ភាពស្មុគស្មាញ និងការជាន់គ្នានៃនីតិវិធីរដ្ឋបាល ដោយតម្រូវឱ្យក្រសួង និងស្ថាប័នពាក់ព័ន្ធទាំងអស់សម្របសម្រួលការងារជាប្រព័ន្ធ និងជាធ្លុងមួយ។ ជាលទ្ធផល សហគ្រិនលែងចាំបាច់ត្រូវរត់បំពេញនីតិវិធី ឬដាក់ពាក្យស្នើសុំការអនុញ្ញាតនៅតាមក្រសួង និងស្ថាប័នជាច្រើនដូចកន្លងមកទៀតឡើយ។
ជាមួយគ្នានេះ ការសម្រួលនីតិវិធីត្រូវបានអនុវត្តស្របគ្នានឹងការពង្រឹងកិច្ចការពារផលប្រយោជន៍ស្របច្បាប់របស់អាជីវករ។ រាជរដ្ឋាភិបាលបានបង្ហាញការប្តេជ្ញាចិត្តយ៉ាងមុតមាំក្នុងការបង្ក្រាបផលិតផលក្លែងក្លាយ និងទប់ស្កាត់ការប្រកួតប្រជែងមិនស្មើភាព ដើម្បីធានាឱ្យសហគ្រាសដែលប្រកបអាជីវកម្មដោយស្របច្បាប់ទទួលបានការការពារ និងអាចប្រកួតប្រជែងដោយយុត្តិធម៌នៅលើទីផ្សារ។

ទិដ្ឋភាពដ៏លេចធ្លោមួយទៀតនៃការកែទម្រង់នេះ គឺការធ្វើបរិវត្តកម្មឌីជីថល និងការបង្កើតប្រព័ន្ធចុះ​បញ្ជី​តាមច្រកចេញចូលតែមួយ។ ការកំណត់មិនឱ្យម្ចាស់សហគ្រាសកាន់ឯកសាររត់ដើរពីស្ថាប័នមួយទៅ​ស្ថាប័នមួយ ប៉ុន្តែជំនួសមកវិញនូវការរៀបចំប្រព័ន្ធបច្ចេកវិទ្យាដែលអនុញ្ញាតឱ្យឯកសារ «រត់» ទៅគ្រប់ក្រសួង​ពាក់ព័ន្ធដោយស្វ័យប្រវត្តិ គឺជាចំណុច​វិជ្ជមាន​ដ៏ធំធេងនៃ​អភិបាល​កិច្ច​រដ្ឋបាល។ បច្ចេកវិទ្យានេះមិនត្រឹម​តែបង្កើនភាពងាយស្រួល និងតម្លាភាពប៉ុណ្ណោះទេ ប៉ុន្តែថែមទាំងកាត់បន្ថយអំពើពុករលួយ និងចំណាយ​មិនផ្លូវការផ្សេងៗទៀតផង។

ជាការសន្និដ្ឋាន ការកែទម្រង់នីតិវិធីចុះបញ្ជីសម្រាប់សហគ្រាសធុនតូច និងមធ្យម (SMEs) មិនមែនគ្រាន់តែជាការសម្រួលនីតិវិធីរដ្ឋបាលប៉ុណ្ណោះទេ ប៉ុន្តែជាកំណែទម្រង់យុទ្ធសាស្ត្រដែលមានសារៈសំខាន់ក្នុងការពង្រឹងបរិយាកាសធុរកិច្ច និងជំរុញកំណើនសេដ្ឋកិច្ចជាតិ។ ការរួមបញ្ចូលគ្នារវាងការសម្រួលនីតិវិធី ការប្រើប្រាស់ប្រព័ន្ធឌីជីថល និងការធានាស្តង់ដារសុវត្ថិភាព និងគុណភាពផលិតផល គឺជាមូលដ្ឋាគ្រឹះនៃប្រព័ន្ធអាជីវកម្មដែលមានប្រសិទ្ធភាព តម្លាភាព និងភាពប្រកួតប្រជែង។នៅពេលដែលសហគ្រិនអាចចាប់ផ្តើមអាជីវកម្ម និងនាំផលិតផលរបស់ខ្លួនចូលទីផ្សារបានកាន់តែលឿន ដោយចំណាយពេល និងថ្លៃដើមតិចជាងមុន ព្រមទាំងទទួលបានការគាំទ្រពីរដ្ឋ នោះមិនត្រឹមតែបង្កើនឱកាសសម្រាប់អាជីវកម្មក្នុងស្រុកប៉ុណ្ណោះទេ ប៉ុន្តែថែមទាំងជំរុញការបង្កើតការងារ បង្កើនប្រាក់ចំណូល និងពង្រឹងសមត្ថភាពប្រកួតប្រជែងរបស់សេដ្ឋកិច្ចកម្ពុជាក្នុងរយៈពេលវែង។ ដូច្នេះ ការកែទម្រង់នេះគឺជាជំហានដ៏សំខាន់មួយឆ្ពោះទៅរកសេដ្ឋកិច្ចដែលមានភាពរឹងមាំ បរិយាបន្ន និងចីរភាព ដែលផ្តល់ផលប្រយោជន៍ជាក់ស្តែងដល់ប្រជាពលរដ្ឋ អាជីវកម្ម និងប្រទេសជាតិទាំងមូល៕

ដោយៈ ឌី វីរៈ