រដ្ឋាភិបាលស៊ុយអែតប្រកាសអនុញ្ញាតឱ្យ NATO ដាក់ពង្រាយកងកម្លាំងក្នុងប្រទេសខ្លួន ទោះមិនទាន់ក្លាយជាសមាជិកក៏ដោយ
រដ្ឋាភិបាលស៊ុយអែតប្រកាសអនុញ្ញាតឱ្យ NATO ដាក់ពង្រាយកងកម្លាំងក្នុងប្រទេសខ្លួន ទោះមិនទាន់ក្លាយជាសមាជិកក៏ដោយ
(ស្តុកខុល)៖ នាយករដ្ឋមន្រ្តីនិងរដ្ឋមន្រ្តីការពារជាតិស៊ុយអែត នាថ្ងៃសុក្រនេះ បាននិយាយថា ស៊ុយអែតនឹងអនុញ្ញាតឱ្យអង្គការណាតូ (NATO) អាចដាក់ពង្រាយកងកម្លាំងឱ្យឈរជើងនៅក្នុងប្រទេសរបស់ខ្លួន ទោះបីមិនទាន់បានចូលជាសមាជិក របស់បក្សសម្ព័ន្ធយោធាលោកខាងលិចមួយនេះ ជាផ្លូវការក៏ដោយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី៩ ខែមិថុនា ឆ្នាំ២០២៣។
នាយករដ្ឋមន្រ្តីស៊ុយអែត លោក អ៊ូហ្វ គ្រីស្ទើសុន (Ulf Kristersson) និងរដ្ឋមន្រ្តីការពារជាតិរបស់លោក គឺលោក ផាល ចនសុន (Pal Jonson) បានប្រកាសយ៉ាងដូច្នេះថា «រដ្ឋាភិបាលបានសម្រេចឱ្យកងកម្លាំងប្រដាប់អាវុធស៊ុយអែត អាចរៀបចំត្រៀមលក្ខណៈជាមួយ NATO និងបណ្តាប្រទេសជាសមាជិក NATO សម្រាប់ការធ្វើប្រតិបត្តិការរួមគ្នានាពេលអនាគត។ ការត្រៀមលក្ខណៈនោះ អាចរួមមានដូចជា ការទទួលដាក់ពង្រាយកងកម្លាំងនិងបរិក្ខារយោធាបរទេស ជាបណ្តោះអាសន្ននៅក្នុងទឹកដីស៊ុយអែតជាដើម។ ការសម្រេចចិត្តនេះ គឺជាការផ្ញើសារមួយយ៉ាងច្បាស់ទៅកាន់រុស្ស៉ី និងជាការពង្រឹងបន្ថែម នូវសមត្ថភាពការពារជាតិរបស់ស៊ុយអែតផ្ទាល់»។
គួរបញ្ជាក់ថា ស៊ុយអែតបានដាក់ពាក្យសុំចូលជាសមាជិក NATO កាលពីពាក់កណ្តាលឆ្នាំមុន ក្រោយការឈ្លានពានរបស់រុស្ស៉ីនៅអ៊ុយក្រែន។ យ៉ាងណាក្តី មកទល់ពេលនេះ ប្រទេសជាសមាជិក NATO ពីរចុងក្រោយគេ គឺតួកគីនិងហុងគ្រីបានបន្តអូសបន្លាយ ការផ្តល់សច្ចាប័នចំពោះសមាជិកភាពរបស់ស៊ុយអែត។ ឥឡូវទីក្រុងស្តុកខុលកំពុងសង្ឃឹមថា នឹងអាចចូលជាសមាជិកកំលុងកិច្ចប្រជុំកំពូលរបស់ NATO នាខែកក្កដាខាងមុខ។ រីឯហ្វាំងឡង់ ដែលបានដាក់ពាក្យដំណាលគ្នានឹងស៊ុយអែតដែរនោះ បានក្លាយជាសមាជិករបស់ NATO រួចហើយ កាលពីខែមេសា៕ Fresh News
