ប្រធានាធិបតីអាហ្រ្វិកខាងត្បូង អំពាវនាវដល់លោក ពូទីន ថា សង្រ្គាមនៅអ៊ុយក្រែនត្រូវតែបញ្ចប់
ប្រធានាធិបតីអាហ្រ្វិកខាងត្បូង អំពាវនាវដល់លោក ពូទីន ថា សង្រ្គាមនៅអ៊ុយក្រែនត្រូវតែបញ្ចប់
(មូស្គូ)៖ ប្រធានាធិបតីប្រទេសអាហ្រ្វិកខាងត្បូង ដែលបានធ្វើដំណើរទៅកាន់ប្រទេសរុស្ស៉ី ក្នុងផ្នែកនៃប្រតិភូមេដឹកនាំទ្វីបអាហ្រ្វិក ក្រោមគោលដៅជួយស្វែងរកសន្តិភាព រវាងទីក្រុងកៀវនិងទីក្រុងមូស្គូ បានអំពាវនាវកាលពីថ្ងៃសៅរ៍សប្តាហ៍នេះ ទៅកាន់សមភាគីរុស្ស៉ីរបស់លោកថា សង្រ្គាមបង្ហូរឈាមនៅក្នុងប្រទេសអ៊ុយក្រែន ចាំបាច់ត្រូវតែបញ្ឈប់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអាទិត្យ ទី១៨ ខែមិថុនា ឆ្នាំ២០២៣។
ក្រោយជួបពិភាក្សាជាមួយលោក ពូទីន នៅទីក្រុងសាំងភីតស្បឺគ (Saint Petersburg) ប្រធានាធិបតីអាហ្រ្វិកខាងត្បូង លោក ស៉ីរីល រ៉ាម៉ាហ្វូសា (Cyril Ramaphosa) បាននិយាយយ៉ាងដូច្នេះថា «សង្រ្គាមនេះត្រូវតែបញ្ចប់ តាមរយៈកិច្ចចរចាដោយសន្តិវិធី និងមធ្យោបាយការទូត»។ មេដឹកនាំអាហ្រ្វិករូបនេះបានបន្ថែមថា គណៈប្រតិភូរបស់លោក ដែលរួមមានមេដឹកនាំនិងមន្រ្តីជាន់ខ្ពស់ មកពីប្រទេសអាហ្រ្វិកមួយចំនួនទៀត ចង់ឱ្យសង្រ្គាមអ៊ុយក្រែនត្រូវបិទបញ្ចប់។
ប្រតិភូរបស់លោក Ramaphosa បានដាក់ចេញនូវសំណុំគោលការណ៍១០ចំណុច ដែលរួមមានទាំង ការបន្ធូរបន្ថយភាពតានតឹង ការទទួលស្គាល់ចំពោះអធិបតេយ្យប្រទេសនីមួយៗ ការធានាសន្តិសុខសម្រាប់ប្រទេសទាំងអស់ ការនាំចេញគ្រាប់ធញ្ញជាតិដោយគ្មានឧបសគ្គតាមសមុទ្រខ្មៅ ហើយនិងការបញ្ជូនឈ្លើយសឹកនិងកុមារ ទៅកាន់ប្រទេសដើមរបស់ពួកគេវិញ ជាដើម។ យ៉ាងណាក្តី វិមានក្រឹមឡាំងបានចាត់ទុកថា គោលការណ៍ទាំងអស់នេះ គឺពិបាកក្នុងការអនុវត្តជាក់ស្តែង។ មុនមកដល់រុស្ស៉ី លោក Ramaphosa ក៏បានជួបប្រធានាធីបតីអ៊ុយក្រែន លោក វ៉ូឡូឌីមៀ ហ្សេលេនស្គី ផងដែរ ប៉ុន្តែលោក ហ្សេលេនស្គី បានច្រានចោលនូវលទ្ធភាពចរចាគ្នាជាមួយទីក្រុងមូស្គូ។
គួរបញ្ជាក់ថា បេសកកម្មជួយស្វែងរកសន្តិភាពរបស់តំបន់អាហ្រ្វិកខាងលើ រួមមានប្រធានាធិបតីមកពីអាហ្រ្វិកខាងត្បូង សេណេហ្កាល់ កូម័រ (Comoros) និងសំប៊ី (Zambie) ព្រមទាំងមន្រ្តីជាន់ខ្ពស់មកពីអ៊ូហ្កង់ដា អេហ្ស៉ីប និងកុងហ្គោ៕
