មេធំ Facebook គំរាមដកមាតិការព័ត៌មានចេញពីរដ្ឋកាលីហ្វ័រញ៉ា ជុំវិញការបង្ខំឱ្យបង់ប្រាក់

មេធំ Facebook គំរាមដកមាតិការព័ត៌មានចេញពីរដ្ឋកាលីហ្វ័រញ៉ា ជុំវិញការបង្ខំឱ្យបង់ប្រាក់

(បរទេស)៖ ថ្មីៗនេះក្រុមហ៊ុនបច្ចេកវិទ្យាយក្ស Meta Platforms ដែលជាមេធំរបស់ Facebook បានគំរាមថានឹងលុបមាតិកាព័ត៌មាន (News) នៅក្នុងរដ្ឋកាលីហ្វ័រញ៉ា សហរដ្ឋអាមេរិក ប្រសិនបើរដ្ឋាភិបាលរដ្ឋនោះអនុម័តច្បាប់បង្ខំឱ្យ Facebook បង់ប្រាក់ឱ្យទៅអ្នកផ្សព្វផ្សាយ។ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី០២ ខែមិថុនា ឆ្នាំ២០២៣។

រដ្ឋកាលីហ្វ័រញ៉ាគ្រោងចេញច្បាប់ស្តីពីការគាំពារអ្នកផ្សព្វផ្សាយ ឬអ្នកបង្ហោះព័ត៌មានដែលទាមទាឱ្យ «Platform Online» បង់ប្រាក់«ថ្លៃប្រើប្រាស់ព័ត៌មាន»ដល់អ្នកផ្តល់ព័ត៌មាន ក្នុងគោលបំណងលើកស្ទួយវិស័យព័ត៌មានក្នុងស្រុកអាចរកចំណូលបានខ្លះ ខណៈដែល Platform Online រកចំណូលបានច្រើនពីផ្នែកនេះតែឯង។

យ៉ាងណាជុំវិញសំណើរនេះខាងមេធំ Facebook មិនយល់ព្រមក្នុងការបង់ប្រាក់ទៅឱ្យអ្នកផ្សព្វផ្សាយនោះទេ បើតាមរយៈការបង្ហោះនៅលើ Twitter ពីសំណាក់ អ្នកនាំពាក្យក្រុមហ៊ុន Meta លោក Andy Stone បានហៅរចនាសម្ព័ន្ធនៃការទូទាត់ប្រាក់នេះថាជា «Slush Fund» ដែលជាវិធីខុសច្បាប់ និងជាប្រាក់ពុករលួយ។ បើតាមការលើកឡើងរបស់លោកនៅក្នុងសេចក្តីថ្លែងការណ៍នោះហាក់បង្ហាញថាវាជានយោបាយ ដើម្បីរកផលប្រយោជន៍ដល់«ក្រុមហ៊ុនប្រព័ន្ធផ្សព្វផ្សាយក្រៅផ្លូវការធំៗ ដោយកំបាំងមុខក្រោមការជួយអ្នកផ្សព្វផ្សាយក្នុងរដ្ឋកាលីហ្វ័រញ៉ា»។

គួរជម្រាបដែរថា ក្នុងករណីនេះលោក Andy Stone អ្នកនាំពាក្យរបស់ Meta ធ្លាប់បានបញ្ជាក់ម្តងរួចទៅហើយថាកាលពីចុងឆ្នាំ២០២២កន្លងទៅ ថា Meta នឹងដកមាតិកាព័ត៌មានចេញពីរដ្ឋទាំងអស់របស់សហរដ្ឋអាមេរិក ប្រសិនបើសភាអាមេរិកអនុម័តច្បាប់ដែលស្រដៀងនឹងសេចក្តីព្រាងច្បាប់ដែលស្នើដោយរដ្ឋកាលីហ្វ័រញ៉ា៕ ដោយ  Fresh News