រាជរដ្ឋាភិបាលទាមទារឱ្យលោក សម រង្ស៊ី បំភ្លឺការអះអាងរបស់អតីតមន្ត្រីស៊ើបការណ៍ថៃថា កម្ពុជាជាអ្នកបាញ់មុន

រាជរដ្ឋាភិបាលទាមទារឱ្យលោក សម រង្ស៊ី បំភ្លឺការអះអាងរបស់អតីតមន្ត្រីស៊ើបការណ៍ថៃថា កម្ពុជាជាអ្នកបាញ់មុន

ភ្នំពេញ៖ អ្នកនាំពាក្យរាជរដ្ឋាភិបាលកម្ពុជា បានទាមទារឱ្យលោក សម រង្ស៊ី អតីតមេដឹកនាំគណបក្សប្រឆាំង ចេញមុខបញ្ជាក់ជាសាធារណៈថា តើលោកពិតជាបានអះអាងថា កងកម្លាំងកម្ពុជាជាអ្នកបើកការបាញ់ប្រហារលើភាគីថៃមុន ដូចការលើកឡើងរបស់អតីតមន្ត្រីជាន់ខ្ពស់ស៊ើបការណ៍សម្ងាត់ថៃដែរឬទេ ខណៈរដ្ឋាភិបាលកម្ពុជាបានបដិសេធការអះអាងនេះ និងបញ្ជាក់ជាថ្មីថា ភាគីថៃជាអ្នកបាញ់មុនក្នុងជម្លោះព្រំដែនរវាងប្រទេសទាំងពីរ។

ការទាមទារនេះធ្វើឡើងតាមរយៈសេចក្ដីថ្លែងការណ៍របស់អ្នកនាំពាក្យរាជរដ្ឋាភិបាល ចុះថ្ងៃទី១២ ខែតុលា ឆ្នាំ២០២៦ បន្ទាប់ពីសារព័ត៌មានថៃ Top News បានផ្សាយកិច្ចសម្ភាសន៍ជាមួយលោក Nantiwat Samart អតីតអនុប្រធានការិយាល័យស៊ើបការណ៍សម្ងាត់ជាតិ និងជាអតីតលេខារដ្ឋមន្ត្រីក្រសួងការបរទេសថៃ កាលពីថ្ងៃទី១០ ខែតុលា។

យោងតាមសេចក្ដីថ្លែងការណ៍ លោក Nantiwat បានអះអាងក្នុងកិច្ចសម្ភាសន៍នោះថា កាលពីពីរទៅបីថ្ងៃមុន លោក សម រង្ស៊ី បានចេញមកលើកឡើងថា កងកម្លាំងកម្ពុជាជាភាគីបាញ់ប្រហារលើកងកម្លាំងថៃមុន ដែលនាំឱ្យភាគីថៃធ្វើការបាញ់តបតវិញ។

អ្នកនាំពាក្យរាជរដ្ឋាភិបាលបានឱ្យដឹងថា ការផ្សាយព័ត៌មាននេះត្រូវបានអ្នកប្រើប្រាស់បណ្ដាញសង្គមយកទៅចែករំលែក និងធ្វើអត្ថាធិប្បាយយ៉ាងទូលំទូលាយ ដែលជំរុញឱ្យរដ្ឋាភិបាលចេញមុខបញ្ជាក់ជំហរជាផ្លូវការ។

សេចក្ដីថ្លែងការណ៍បានបញ្ជាក់ថា៖ «អ្នកនាំពាក្យរាជរដ្ឋាភិបាល សូមបដិសេធទាំងស្រុងចំពោះការលើកឡើងខុសការពិតនេះ ហើយសូមបញ្ជាក់ជាថ្មីម្តងទៀតថា គឺភាគីថៃជាអ្នកបាញ់មុន»។

អ្នកនាំពាក្យបានបន្ថែមថា ជំហររបស់កម្ពុជាចំពោះភាគីដែលបានបើកការបាញ់ប្រហារមុន ត្រូវបានបញ្ជាក់រួចមកហើយដោយលោកនាយករដ្ឋមន្ត្រី ហ៊ុន ម៉ាណែត ក្រសួងការពារជាតិ និងក្រសួងការបរទេស និងសហប្រតិបត្តិការអន្តរជាតិ។

ជាមួយគ្នានេះ រដ្ឋាភិបាលបានដាក់ចេញនូវការទាមទារចំនួនបីចំណុចចំពោះលោក សម រង្ស៊ី ដើម្បីឱ្យមានការបញ្ជាក់ច្បាស់លាស់អំពីការអះអាងដែលត្រូវបានផ្សព្វផ្សាយដោយសារព័ត៌មានថៃ។

ទីមួយ ប្រសិនបើលោក សម រង្ស៊ី មិនបាននិយាយដូចការលើកឡើងរបស់អតីតមន្ត្រីថៃនោះទេ លោកត្រូវចេញមុខបដិសេធជាផ្លូវការចំពោះព័ត៌មានដែលបានផ្សព្វផ្សាយ។

ទីពីរ ប្រសិនបើលោកពិតជាបាននិយាយដូចការអះអាងនោះមែន រដ្ឋាភិបាលទាមទារឱ្យលោកចេញមុខសុំទោសប្រជាពលរដ្ឋខ្មែរជាសាធារណៈ ដោយអ្នកនាំពាក្យបានចាត់ទុកការលើកឡើងបែបនេះថា ជា «អំពើក្បត់ជាតិដ៏ធ្ងន់ធ្ងរមួយ»។

ចំណែកទីបី អ្នកនាំពាក្យបានលើកឡើងថា ប្រសិនបើលោក សម រង្ស៊ី មិនចេញមុខបដិសេធជាផ្លូវការចំពោះព័ត៌មានដែលសារព័ត៌មានថៃបានផ្សាយទេ នោះរដ្ឋាភិបាលនឹងចាត់ទុកថា លោកពិតជាបាននិយាយដូចការអះអាងនោះមែន។

សេចក្ដីថ្លែងការណ៍បានបញ្ជាក់ថា៖ «អ្នកនាំពាក្យរាជរដ្ឋាភិបាល សង្ឃឹមថា លោក សម រង្ស៊ី មានសេចក្តីក្លាហានក្នុងការចេញមុខមកបញ្ជាក់រឿងនេះ»។

ទោះជាយ៉ាងណា ការមិនចេញមុខបដិសេធមិនអាចចាត់ទុកជាភស្តុតាងឯករាជ្យដែលបញ្ជាក់ថា លោក សម រង្ស៊ី ពិតជាបាននិយាយដូចការចោទប្រកាន់នោះឡើយ។

ការអះអាងដែលត្រូវបានដកស្រង់ពីកិច្ចសម្ភាសន៍របស់លោក Nantiwat ក៏មិនទាន់អាចបញ្ជាក់បានថា ជាសម្ដីផ្ទាល់របស់លោក សម រង្ស៊ី ដែរ ដរាបណាមិនមានការផ្ទៀងផ្ទាត់ជាមួយសេចក្ដីថ្លែងការណ៍ ឬកំណត់ត្រាដើមរបស់លោក។

-post khmer-