ព្រះមហាក្សត្រកោតសរសើរការដឹកនាំនិងស្នាដៃរបស់លោក ហ៊ុន សែន
ព្រះមហាក្សត្រកោតសរសើរការដឹកនាំនិងស្នាដៃរបស់លោក ហ៊ុន សែន
សេចក្តីសង្ខេប៖ ក្នុងឱកាសខួបកំណើតគម្រប់ ៧៤ឆ្នាំ របស់ប្រធានព្រឹទ្ធសភា ព្រះមហាក្សត្របានកោតសរសើរលោក ហ៊ុន សែន ចំពោះការបម្រើជាតិ ក្នុងតួនាទីជាប្រមុខរដ្ឋស្តីទី។
ព្រះមហាក្សត្រ នរោត្តម សីហមុនី បានសម្ដែងការកោតសរសើរចំពោះលោក ហ៊ុន សែន ប្រធានព្រឹទ្ធសភា ចំពោះស្មារតីស្នេហាជាតិ និងភាពជាអ្នកដឹកនាំ ដោយកោតសរសើរតួនាទីរបស់លោកក្នុងការការពារអធិបតេយ្យភាពជាតិ រក្សាសន្តិភាព និងជំរុញការអភិវឌ្ឍប្រទេស។
ព្រះមហាក្សត្របានផ្ញើព្រះរាជសារជូនពរលោក ហ៊ុន សែន ប្រធានព្រឹទ្ធសភា ក្នុងឱកាសខួបកំណើតគម្រប់ ៧៤ឆ្នាំ ដោយកោតសរសើរវីរភាព ការលះបង់ និងការរួមចំណែករបស់លោកចំពោះជាតិ។
ព្រះអង្គមានព្រះរាជបន្ទូលថា លោក ហ៊ុន សែន បានបង្ហាញនូវស្មារតីស្នេហាជាតិដ៏មុតមាំ និងបានលះបង់កម្លាំងកាយ កិច្ចខិតខំប្រឹងប្រែង និងប្រាជ្ញាស្មារតី ដើម្បីដឹកនាំការកសាង និងការពារជាតិ ព្រមទាំងលើកកម្ពស់សន្តិភាព ស្ថិរភាព និងការអភិវឌ្ឍ។
ព្រះមហាក្សត្រក៏បានគូសបញ្ជាក់ថា លោក ហ៊ុន សែន បានជួយបំពេញភារកិច្ចជាច្រើនក្នុងនាមជាប្រមុខរដ្ឋស្តីទី អំឡុងពេលដែលព្រះអង្គយាងទៅសាធារណរដ្ឋប្រជាមានិតចិន ដើម្បីព្យាបាលព្រះរាជសុខភាព។
ព្រះអង្គបានបន្ថែមថា លោក ហ៊ុន សែន ក្នុងនាមជាប្រធានព្រឹទ្ធសភា បានបន្តសម្រេចសមិទ្ធផលជាច្រើនសម្រាប់ជាតិ និងទទួលបានការទទួលស្គាល់ពីសហគមន៍អន្តរជាតិ។
ព្រះមហាក្សត្របានប្រទានពរជ័យជូនលោក ហ៊ុន សែន សូមឱ្យមានសុខភាពល្អ កម្លាំងមាំមួន និងទទួលបានជោគជ័យជាបន្តបន្ទាប់ក្នុងការបម្រើជាតិ និងប្រជាជន។
លោក ហ៊ុន សែន ដែលបានកាន់តំណែងជានាយករដ្ឋមន្ត្រីអស់រយៈពេលជាងបីទសវត្សរ៍ បានក្លាយជាប្រធានព្រឹទ្ធសភា បន្ទាប់ពីការបោះឆ្នោតព្រឹទ្ធសភាឆ្នាំ២០២៤ ហើយនៅតែបន្តដើរតួនាទីសំខាន់ក្នុងឆាកនយោបាយកម្ពុជា។
លោក ពៅ សុខ ដែលជាអ្នកនិពន្ធសៀវភៅជាច្រើនអំពី លោក ហ៊ុន សែន បានលើកឡើងថា ព្រះរាជសាររបស់ព្រះមហាក្សត្រគឺជាកិត្តិយសដ៏ធំធេង។
លោកបានមានប្រសាសន៍ថា ព្រះមហាក្សត្រទទួលស្គាល់ភាពជាអ្នកដឹកនាំ និងការលះបង់របស់លោក ហ៊ុន សែន ក្នុងការបម្រើជាតិ សាសនា និងព្រះមហាក្សត្រ។
លោក ពៅ សុខ បានលើកឡើងថា ស្នាដៃសំខាន់ៗរបស់លោក ហ៊ុន សែន រួមមាន ការជួយរំដោះកម្ពុជាចេញពីរបបខ្មែរក្រហម ការចូលរួមចរចាសន្តិភាពពីឆ្នាំ១៩៨៧ ដល់ឆ្នាំ១៩៩១ និងការរួមចំណែកបញ្ចប់សង្គ្រាមនៅកម្ពុជានៅចុងទសវត្សរ៍ឆ្នាំ១៩៩០។ លោកបានបន្ថែមថា លោក ហ៊ុន សែន ក៏បានដើរតួនាទីសំខាន់ក្នុងការឆ្លើយតបនឹងជំងឺកូវីដ-១៩ រួមទាំងការស្វែងរកវ៉ាក់សាំង និងការអនុវត្តវិធានការគ្រប់គ្រងជំងឺ ដែលបានជួយសង្គ្រោះអាយុជីវិតប្រជាពលរដ្ឋ និងទទួលបានការកោតសរសើរពីអន្តរជាតិ។
ទាក់ទិននឹងការដឹកនាំព្រឹទ្ធសភារបស់លោក ហ៊ុន សែន លោក សុខ បានលើកឡើងថា ស្ថាប័ននេះមានភាពសកម្មជាងមុន និងសម្រេចបានវឌ្ឍនភាពក្នុងការបំពេញតួនាទីរបស់ខ្លួន។
លោកបានថ្លែងថា៖ «ព្រឹទ្ធសភាបានសម្រេចវឌ្ឍនភាពគួរឱ្យកត់សម្គាល់ ចាប់តាំងពីសម្ដេចតេជោ ហ៊ុន សែន ចូលកាន់តំណែងជាប្រធាន រួមមានការសាងសង់អគារថ្មីសម្រាប់ការងាររបស់ព្រឹទ្ធសភា ការរៀបចំមហាសន្និបាតជាតិរវាងរដ្ឋសភា និងព្រឹទ្ធសភា ការអនុម័តច្បាប់ដែលរដ្ឋសភាបានអនុម័តរួច និងសកម្មភាពការទូតជាមួយប្រទេសជាមិត្ត»។
លោកបានបន្ថែមថា លោក ហ៊ុន សែន បានពង្រឹងការទូតសភា និងទំនាក់ទំនងជាមួយស្ថាប័ននីតិប្បញ្ញត្តិនៃបណ្ដាប្រទេសផ្សេងៗ ដែលបានរួមចំណែកដល់ការពង្រឹងទំនាក់ទំនងអន្តរជាតិរបស់កម្ពុជា។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃកម្ពុជា (IIRC) បានពិពណ៌នាលោក ហ៊ុន សែន ថា ជារដ្ឋបុរសដែលមានបទពិសោធន៍យ៉ាងទូលំទូលាយលើកិច្ចការទាំងក្នុង និងក្រៅប្រទេស និងជាធនធានមនុស្សដ៏សំខាន់សម្រាប់ភាពជាអ្នកដឹកនាំនាពេលអនាគតរបស់កម្ពុជា។
លោកបានថ្លែងថា៖ «សម្ដេច ហ៊ុន សែន គឺជាធនធានមនុស្សដ៏កម្រមួយ ដែលអ្នកដឹកនាំជំនាន់ក្រោយត្រូវសិក្សារៀនសូត្រ និងទទួលយកចំណេះដឹងឱ្យបានច្រើនតាមដែលអាចធ្វើទៅបាន ព្រោះមេដឹកនាំដែលមានបទពិសោធន៍ទូលំទូលាយបែបនេះ គឺកម្រមានណាស់នៅលើពិភពលោក»។
លោក គិន ភា បានលើកឡើងពីការរួមចំណែករបស់លោក ហ៊ុន សែន ក្នុងការរំដោះប្រទេសចេញពីរបបខ្មែរក្រហម ការកសាងប្រទេសឡើងវិញ និងការជំរុញដំណើរការសន្តិភាព ចាប់ពីការចរចា កិច្ចព្រមព្រៀងសន្តិភាពទីក្រុងប៉ារីស រហូតដល់ការសម្រេចបានសន្តិភាពពេញលេញតាមរយៈនយោបាយឈ្នះ-ឈ្នះ។
លោកបានបន្តថា កិច្ចខិតខំប្រឹងប្រែងរបស់លោក ហ៊ុន សែន ក្នុងការកសាងប្រព័ន្ធអប់រំ និងអភិវឌ្ឍធនធានមនុស្សនៅកម្ពុជាក្រោយសម័យខ្មែរក្រហម រួមមានការបញ្ជូននិស្សិតទៅសិក្សានៅបរទេស ដើម្បីទទួលបានការបណ្តុះបណ្តាលកម្រិតខ្ពស់។
លោក គិន ភា ក៏បានបញ្ជាក់ដែរថា ក្រោមការដឹកនាំរបស់លោក ហ៊ុន សែន ការទូតសភាកាន់តែមានភាពសកម្ម និងមានប្រសិទ្ធភាពជាងមុន តាមរយៈការពង្រឹងទំនាក់ទំនងជាមួយស្ថាប័ននីតិប្បញ្ញត្តិនៃប្រទេសនានា។
-Khmer Times-
