«បុរសទំនើង» អានុទីន ប្រកាសលែងទទួលស្គាល់ផែនទីសម័យអាណានិគមបារាំង បន្ទាប់ពីត្រឡប់មកពីបារាំងវិញ
Thai Prime Minister Anutin Charnvirakul met with French President Emmanuel Macron in Paris, on May 26. Thai foreign ministry
នាយករដ្ឋមន្ត្រីថៃ លោក អានុទីន ឆានវីរៈគុល ប្រកាសថា ផែនទីសម័យអាណានិគមបារាំងដែលប្រើប្រាស់ជាមួយកម្ពុជាលែងមានតម្លៃសម្រាប់ទីក្រុងបាងកកទៀតហើយបន្ទាប់ពីលោកទើបតែត្រឡប់មកពីប្រទេសបារាំងវិញ។ នេះបើយោងតាមការចុះផ្សាយរបស់សារព័ត៌មាន The Nation Thailand ថ្ងៃទី ២៧ឧសភា។
នាយករដ្ឋមន្ត្រីថៃលោក អានុទីន បានលើកឡើងពីកិច្ចពិភាក្សាទ្វេភាគីរបស់លោកជាមួយប្រទេសបារាំង និងអង្គការ UNESCO ពាក់ព័ន្ធនឹងក្របខណ្ឌព្រំដែនដែលកំពុងមានជម្លោះជាមួយកម្ពុជា។
ក្នុងកិច្ចសម្ភាសន៍ជាមួយអ្នកសារព័ត៌មាន លោក អានុទីន បានថ្លែងថា លោកបានជួបជាមួយប្រធានាធិបតីបារាំងលោក អេម៉ានុយអែល ម៉ាក្រុង (Emmanuel Macron) និងមន្ត្រីជាន់ខ្ពស់នៅទីស្នាក់ការកណ្ដាល UNESCO ក្នុងទីក្រុងប៉ារីស ដែលនៅក្នុងឱកាសនោះ លោកបានបកស្រាយអ្វីដែលលោកយល់ថាជា «ការយល់ច្រឡំអន្តរជាតិពាក់ព័ន្ធនឹងព្រំដែនរបស់ថៃ» និងដោះស្រាយបញ្ហាតានតឹងចុងក្រោយនៅតាមខ្សែបន្ទាត់ព្រំដែនថៃ-កម្ពុជា។
ក្នុងនោះនាយករដ្ឋមន្ត្រីថៃរូបនេះ បានប្រកាសថា មាត្រដ្ឋានផែនទីសម័យអាណានិគមបារាំង-សៀម ខ្នាត 1:200,000 (១លើ ២០០.០០០) ដែលកម្ពុជាប្រើប្រាស់ដើម្បីគាំទ្រការទាមទារព្រំដែន«លែងមានតម្លៃទៀតហើយសម្រាប់រដ្ឋបាលប្រទេសថៃ» ហើយថា ប្រទេសថៃទាមទារឲ្យកម្ពុជាប្រើប្រាស់ផែនទីដែលគូសដោយថៃជាឯកតោភាគីខ្នាត 1:50,000 វិញ។
អានុទីន បានបន្ថែមថា ថៃធ្វើតាមប្រព័ន្ធបច្ចេកទេសផ្ទាល់ខ្លួនដែលបានកំណត់ និងតាមសេចក្តីសន្និដ្ធានទ្វេភាគីដែលមានស្រាប់ ហើយសំណើណាមួយពីភាគីខាងក្រៅពាក់ព័ន្ធនឹងផែនទីប្រវត្តិសាស្ត្ររបស់បារាំង មិនមានឥទ្ធិពលលើថៃនោះទេ។ លោកថា សម្រាប់ប្រទេសថៃ មាត្រដ្ឋានផែនទីសម័យអាណានិគមបារាំង-សៀម ខ្នាត 1:200,000 លែងមានទៀតហើយ។
លោកអានុទីនបានថ្លែងអះអាងថា ផែនទីគូសជាឯកតោភាគីរបស់ខ្លួន 1:50,000 មានភាពច្បាស់លាស់ខ្ពស់ សម្រាប់តំបន់ព្រំដែនជាក់ស្តែង។ ទោះយ៉ាងណា លោកបានអះអាងថា រដ្ឋាភិបាលថៃនៅតែបើកចំហចំពោះការផ្ទៀងផ្ទាត់បច្ចេកទេសដោយតម្លាភាព ប្រសិនបើនៅមានការសង្ស័យរវាងប្រទេសជិតខាងទាំងពីរ។
បញ្ហាស្នូលនៃជម្លោះព្រំដែនរវាងថៃនិងកម្ពុជាដែលកំពុងកើតឡើងបច្ចុប្បន្នក៏ដូចជាកាលពីអតីតកាល មានមូលដ្ឋានចេញពីក្របខណ្ឌផែនទីដែលប្រើប្រាស់សម្រាប់កំណត់ព្រំដែន ដោយប្រទេសកម្ពុជាប្រើប្រាស់ផែនទីសម័យអាណានិគមបារាំង ដែលគូរតាមមាត្រដ្ឋាន 1:200,000 ដែលជាផែនទីដែលបង្កើតឡើងក្នុងសម័យអាណានិគមបារាំង តាមសន្ធិសញ្ញា Franco-Siamese គូរដោយគណៈកម្មការបារាំង-សៀម ក្នុងឆ្នាំ ១៩០៤ និង ១៩០៧។ រីឯប្រទេសថៃវិញ បានប្រើប្រាស់ផែនទី 1:50,000 ដែលជាផែនទីគូសដោយខ្លួនឯងជាឯកតោភាគី។
ជំហររបស់ថៃបង្ហាញពីការបដិសេធកាន់តែខ្លាំងចំពោះខ្សែបន្ទាត់ផែនទីសម័យអាណានិគម ដែលធ្វើឱ្យកិច្ចខិតខំប្រឹងប្រែងរបស់កម្ពុជាក្នុងការបន្តពឹងផ្អែកលើឯកសារផែនទីប្រវត្តិសាស្ត្រនៅក្នុងការជជែកដេញដោលអំពីព្រំដែនកាន់តែមានភាពស្មុគស្មាញ។
អ្នកវិភាគភូមិសាស្ត្រនយោបាយ លោក គិន ភា បានថ្លែងថា ការប្រកាសរបស់លោក អានុទីន មិនទទួលស្គាល់ផែនទី ១:២០០.០០០ គឺជាវោសាស្ត្របែប «បុរសទំនើង» និងជាល្បិចក្នុងការបង្វែរការចាប់អារម្មណ៍ពីវិបត្តិនយោបាយ សេដ្ឋកិច្ច និងការប្រកួតប្រជែងអំណាចនៅក្នុងប្រទេសថៃ។
លោកថ្លែងថា៖ «អានុទីនមិនអាចបដិសេធផែនទីមួយដែលត្រូវបានទទួលស្គាល់ជាអន្តរជាតិ ដោយសន្ធិសញ្ញា និងអនុសញ្ញា ដែលប្រទេសទាំងពីរគឺជាហត្ថលេខីនៃសន្ធិសញ្ញានេះ។ ផែនទីខ្នាត ១លើ២០០.០០០នេះ គឺជាផែនទីដែលត្រូវបានប្រើប្រាស់ជាអន្តរជាតិ ជាពិសេសត្រូវបានប្រើប្រាស់ដោយតុលាការយុត្តិធម៌អន្តរជាតិ២ដងលើរឿងប្រាសាទព្រះវិហារ ឲ្យកម្ពុជាឈ្នះក្ដី»។
លោកបន្តថា៖ «បើថៃគេចវេះពីផែនទីនេះ គឺថៃត្រូវដកចេញពីសហគមន៍អន្តរជាតិ ដកខ្លួនចេញពីអាស៊ាន សមាជិកអង្គការសហប្រជាជាតិ និងក្លាយជារដ្ឋទំនើង និងជារដ្ឋតិរច្ឆាន តែម្នាក់ឯង ហើយប្រើប្រាស់ច្បាប់ព្រៃតែម្នាក់ឯង»៕
-ភ្នំពេញប៉ុស្តិ៍-
