អ្នកជំនាញអារ្យធម៌ខ្មែរ៖ ការប្រកាសរបស់បុគ្គល សម រង្ស៉ី បង្កើតរដ្ឋាភិបាលក្រៅប្រទេស គឺជាការប្រកាសធ្វើរដ្ឋប្រហារ
អ្នកជំនាញអារ្យធម៌ខ្មែរ៖ ការប្រកាសរបស់បុគ្គល សម រង្ស៉ី បង្កើតរដ្ឋាភិបាលក្រៅប្រទេស គឺជាការប្រកាសធ្វើរដ្ឋប្រហារ
(ភ្នំពេញ)៖ អ្នកជំនាញអារ្យធម៌ខ្មែរ លោក រ័ត្ន សណ្តាប់ បានថ្លែងថា បើពោលអំពីគន្លងប្រជាធិបតេយ្យសេរីពហុបក្សនៅកម្ពុជា នៅថ្ងៃទី២២ សីហា ឆ្នាំ២០២៤ខាងមុខនេះ គឺជាថ្ងែគម្រប់ខួប១ឆ្នាំ នៃដំណើរការរាជរដ្ឋាភិបាលស្របច្បាប់អាណត្ដិទី៧នៃរដ្ឋសភា ស្ថិតក្រោមការដឹកនាំរបស់សម្តេចធិបតី ហ៊ុន ម៉ាណែត ដែលត្រូវបានប្រសូត្រចេញពីឆន្ទ:ប្រជាពលរដ្ឋ តាមរយៈការបោះឆ្នោត នៅថ្ងៃទី២៣កក្កដា ឆ្នាំ២០២៣ ដែលមានអត្រាប្រជាពលរដ្ឋ ចូលរួមបោះឆ្នោតមានចំនួនច្រើនលើសលប់ គឺរហូតដល់ទៅ ៨៤,៥៩ភាគរយ ហើយត្រូវបានអ្នកសង្កេតការណ៍ជាតិ និងអន្ដរជាតិ បានបញ្ជាក់យ៉ាងច្បាស់ៗថា ដំណើរការបោះឆ្នោតបានប្រព្រឹត្ដទៅដោយសេរី យុត្ដិធម៌ ត្រឹមត្រូវ និងក្នុងបរិយាកាសអហិង្សា មានសុវត្ថិភាពគ្មានការគំរាមគំហែង។
ជាក់ស្ដែងក្នុងដំណើររបស់រាជរដ្ឋាភិបាលស្របច្បាប់អាណត្ដិទី៧ដ៏ប្រពៃថ្លៃថ្លានេះ មានប្រមុខរដ្ឋនៃបណ្ដាប្រទេសទាំងក្នុងតំបន់ និងជុំវិញពិភពលោក មានជាអាទិ៍ បារាំង ,អ៊ីតាលី , ចិន ,អូស្រ្ដាលី, ឥណ្ឌា, ជប៉ុន, ក្រិក, អ៊ុយក្រែន ,តួគី ,អារ៉ាប៊ីសាអ៊ូឌីត ,កាតា , លោកអគ្គលេខាធិការអង្គការសហប្រជាជាតិ, គណកម្មាធិការអ៊ឺរ៉ុប ។ល។ បានស្វាគមន៍ និងអបអរសាទរនូវដំណើរការប្រជាធិបតេយ្យដ៏ប្រពៃនេះយ៉ាងស្មោះស្ម័គ្របំផុត។
លោក រ័ត្ន សណ្តាប់ បន្ដថា ស្ថិតក្នុងបរិការនេះ បើពោលអំពីទង្វើរបស់បុគ្គល សម រង្ស៊ី ដែលបានប្រកាសយ៉ាងក្តែងៗ នៅថ្ងៃទី៤ កក្ដដា ឆ្នាំ២០២៤នេះ ក្នុងការបង្កើតរដ្ឋាភិបាលក្រៅប្រទេស ដោយធ្វើការបំផុសបំផុលចលនាមិនទទួលស្គាល់ភាពស្របច្បាប់របស់រាជរដ្ឋាភិបាលដែលដឹកនាំដោយសម្ដេចធិបតី គឺជាការប្រកាសមួយដើម្បីធ្វើរដ្ឋប្រហារមកលើរាជរដ្ឋាភិបាលស្របច្បាប់។ ពីព្រោះចលនារដ្ឋាភិបាលក្រៅប្រទេសនេះ ជាចលនាប្រឆាំងខុសច្បាប់ ហើយបានបង្ហាញយ៉ាងច្បាស់ពីចេតនាផ្ដួលរំលំរាជរដ្ឋាភិបាលស្របច្បាប់ ដែលផ្ទុយពីដំណើរការលទ្ធិប្រជាធិបតេយ្យនៅកម្ពុជា។ ដោយហេតុថា ការផ្លាស់ប្ដូររាជរដ្ឋាភិបាលអាចធ្វើទៅបានគឺតាមរូបភាពតែមួយគត់ គឺការបោះឆ្នោតស្របច្បាប់។ ហើយការបោះឆ្នោតស្របច្បាប់កន្លងមកនេះទៀតសោត ក៏បានសបញ្ជាក់យ៉ាងច្បាស់ថា ប្រជាពលរដ្ឋនៅតែបន្ដការគាំទ្រគណបក្សប្រជាជនកម្ពុជា។
ហេតុនេះចំពោះទង្វើនៃការបង្កើតរដ្ឋាភិបាលក្រៅប្រទេសរបស់បុគ្គល សម រង្ស៊ី ដែលយកលេសថា ដើម្បីទាមទាមរកយុត្តិធម៌ជូនប្រជាជន វាគ្រាន់តែជាវាំងននខ្មៅមួយផ្ទាំង បិទបាំងមុខដ៏អាក្រក់របស់ខ្លួន នៅក្នុងការបន្ដប៉ុនប៉ងហើយប៉ុនប៉ងទៀត និងសាកល្បងហើយសាកល្បងទៀត ធ្វើជាមេខ្យល់នាំមុខចលនាបះបោរតាមគ្រប់រូបភាព ហៅថា “ចលនាផ្ដួលរំលំរាជរដ្ឋាភិបាលស្របច្បាប់ ” គឺធ្វើរដ្ឋប្រហារតាមរយៈ “រដ្ឋាភិបាលក្រៅប្រទេសខុសច្បាប់” ។
បើពោលឲ្យចំ អំណាចដែលគណបក្សប្រជាជនកម្ពុជាទទួលបានតាមការបោះឆ្នោតបែបប្រជាធិបតេយ្យ បែរជាត្រូវបានរដ្ឋាភិបាលក្រៅប្រទេសរបស់បុគ្គល សម រង្ស៊ី ចង់ដណ្ដើមអំណាចនេះ តាមបែបអនាធិបតេយ្យផ្ទុយពីច្បាប់ទៅវិញ។
ក្នុងស្ថានភាពនេះ យើងអាចចោទជាសំណួរសួរថា តើពួកគេបង្កើតរដ្ឋាភិបាលក្រៅប្រទេសនេះ មានគោលបំណងអ្វីឲ្យពិតប្រាកដ បើប្រទេសជាតិកំពុងតែមានសន្ដិភាព មានការអភិវឌ្ឍ ហើយប្រជាពលរដ្ឋកំពុងតែរស់នៅក្នុងភាពសុខសាន្ត ពោរពេញដោយភាពសប្បាយរីករាយហើយនោះ?
ជាការពិតណាស់ វាច្បាស់ដូចពន្លឺថ្ងៃអ៊ីចឹង! ក្រុមបក្ខពួកគ្នីគ្នារបស់បុគ្គល សម រង្ស៊ី ដែលកំពុងតែរៀបចំបង្កើតរដ្ឋាភិបាលក្រៅប្រទេសទាំងនេះ បានបង្ហាញអំពីចេតនាយ៉ាងច្បាស់ គឺពួកគេមានបំណងដើរធ្វើវិទ្ធង្សនានយោបាយ វិចេ្ឆទកម្មសេដ្ឋកិច្ច តាមរយៈការបង្កភាពចលាចលក្នុងសង្គម ការស្រែកទ្បាំប៉ាឲ្យបរទេសផ្ដាច់ជំនួយ និងការឃោសនារារាំងមិនឲ្យក្រុមហ៊ុនបរទេសចូលមកធ្វើការវិនិយោគនៅក្នុងស្រុកខ្មែរ គឺសុទ្ធតែជាការរាំងខ្ទប់ដល់ដង្ហើមសេដ្ឋកិច្ចជាតិ មិនខុសពីយកដំបងទៅសូកចូលក្នុងកាំកង់រទេះដែលកំពុងតែវិលនោះទេ។ ក៏ព្រោះតែដើម្បីបម្រើមហិច្ឆតាបុគ្គលខ្លួន ដោយពុំបានគិតពីភាពសុខសាន្ដរបស់ប្រជាជននិងប្រទេសជាតិទ្បើយ។
ហេតុនេះរាល់ទង្វើរបស់បុគ្គល សម រង្ស៊ី និងគូកនរបស់ពួកគេ គឺជាទង្វើស្រេកឃា្លនអំណាចតាមបែបអនាធិបតេយ្យ ដោយបង្កចលនាក្នុងគោលបំណងផ្ដួលរំលំរាជរដ្ឋាភិបាលស្របច្បាប់ ហើយក៏ជាទង្វើប្រឆាំងនឹងប្រវត្ដិសាស្រ្ដផងដែរ។ ពីព្រោះមជ្ឈដ្ឋានទូទៅបានស្គាល់យ៉ាងច្បាស់អំពី បរិបទនយោបាយនៅកម្ពុជា ពិសេសគោលនយោបាយការពារសន្ដិភាព របស់សម្ដេចធិបតី ដែលបានធ្វើឲ្យសង្គមមានការអភិវឌ្ឍលើគ្រប់វិស័យ រហូតធ្វើឲ្យអន្ដរជាតិទទួលស្គាល់ថា កម្ពុជាគួរត្រូវបានទុកជាគំរូ សម្រាប់បណ្ដាប្រទេសនានាលើពិភពលោកទៀតផង។
មួយវិញទៀត អ្វីដែលជាការកត់សម្គាល់ថែមទៀតនោះ រាល់ទង្វើរបស់បុគ្គល សម រង្ស៊ី ដែលបង្កើតរដ្ឋាភិបាលក្រៅប្រទេសនេះ ដោយបានយកលេសគ្មានហេតុផល ពីការមិនទទួលស្គាល់លទ្ធផលនៃការបោះឆ្នោត ស្រែកប្រកូកប្រកាសច្រំដែលៗថា រាជរដ្ឋាភិបាលមិនបានអនុវត្ដតាមខ្លឹមសារកិច្ចព្រមព្រៀងសន្ដិភាពទីក្រុងប៉ារីស ឬយ៉ាងនេះឬយ៉ាងនោះ។ ត្រង់ចំណុចនេះ លោក រ័ត្ន សណ្តាប់ បានថ្លែងទាត់ចោលទាំងស្រុងនិងបានបញ្ជាក់ថា តាមខ្លឹមសារនៃកិច្ចព្រមព្រៀងសន្ដិភាពទីក្រុងប៉ារីសបានបញ្ជាក់យ៉ាងច្បាស់ គឺការបញ្ចប់សង្រ្គាមផ្ទៃក្នុងប្រទេស ជំរុញឲ្យកម្ពុជាទទួលបាននូវសន្ដិភាពជានិរន្ដន៍ ប្រជាពលរដ្ឋរស់នៅប្រកបដោយសុវត្ថិភាព វឌ្ឈនភាព សេរីភាព គ្មានការជ្រៀតជែ្រកផ្ទៃក្នុងពីសំណាក់បរទេស គ្មានការគាបសង្កត់ពីអំណាចបរទេសណាមួយឡើយ។ កម្ពុជាត្រូវដើរតាមលំអានលទ្ធិប្រជាធិបតេយ្យសេរីពហុបក្ស តាមរយ:ការបោះឆ្នោតដោយសេរី យុត្ដិធម៌ពីសំណាក់ប្រជាពលរដ្ឋគ្រប់ជាន់ថ្នាក់ជាចម្បង។
ដូចនេះមាតុភូមិកម្ពុជាដ៏ស្រស់បវរនៃយើង ជាងម្ភៃឆ្នាំបានកន្លងផុតទៅ។ ការបោះឆ្នោតសកលបានប្រព្រឹត្ដទៅប្រាំពីរលើកមកហើយ។ កម្ពុជាបានដើរតាមលំអានលទ្ធិប្រជាធិបតេយ្យរហូតមក។ កម្ពុជា បានទទួលនូវការអបអរសាទរពីមតិជាតិ និងអន្ដរជាតិជានិច្ច។ ដូច្នេះការបង្កើតរដ្ឋាភិបាលក្រៅប្រទេសក្រោយការបោះឆ្នោតស្របច្បាប់ គឺ “ជាការធ្វើរដ្ឋប្រហារសុទ្ធសាធ”។
ដោយហេតុថា ចំពោះការខិតខំប្រឹងប្រែងអស់រយៈពេលជាង ២ទសវត្ស ទំរាំតែសម្រេចបាននូវឯកភាពជាតិមួយរវាងប្រទេសទាំង ១៨ រួមទាំងអគ្គលេខាធិការអង្គការសហប្រជាជាតិ ក្នុងនោះ មានប្រទេសមហាអំណាចទាំង៥ ចិន រុស្ស៊ី បារាំង អង់គ្លេស និងសហរដ្ឋអាមេរិក ដើម្បីសង្គ្រោះប្រទេសកម្ពុជាមួយនេះឲ្យផុតពីភ្នក់ភ្លើងសង្គ្រាម គឺមិនមែនជារឿងងាយ។ ដូច្នេះ ប្រវត្តិសាស្ដ្រមិនអាចបកថយក្រោយ ហើយអង្គការសហប្រជាជាតិក៏មិនអនុញ្ញាតឲ្យកម្ពុជាវិលទៅរកភាពវិនាសកម្មសារជាថ្មីម្ដងទៀតបានឡើយ៕ (Fresh News)
