បារាំងផ្តល់ជំនួយឱ្យកម្ពុជាសម្រាប់វិស័យថាមពល
វិស័យថាមពលនៅកម្ពុជានឹងបង្ហាញភាពវិជ្ជមានទៅមុខបន្ថែមទៀតបន្ទាប់ពីតំណាងរដ្ឋាភិបាលកម្ពុជា-បារាំង បានចុះហត្ថលេខាសិក្សាសមិទ្ធិលទ្ធភាពវិនិយោគរួមរវាងក្រុមហ៊ុនអគ្គិសនីបារាំង(Électricité de France-EDF) និងក្រុមហ៊ុនរដ្ឋកម្ពុជា EDC លើគម្រោងវារីអគ្គិសនី ៨០០ មេហ្គាវ៉ាត់ នៅខេត្តកោះកុង។
ពិធីចុះហត្ថលេខាបានធ្វើឡើងកាលពីថ្ងៃទី១៥ ខែវិច្ឆិកា ឆ្នាំ២០២៦ នៅវិមានសន្តិភាព រវាងរដ្ឋមន្ត្រីក្រសួងរ៉ែ និងថាមពល លោក កែវ រតនៈ ជាមួយតំណាងភាគីបារាំង ដោយសហអធិបតីភាពរបស់លោកនាយករដ្ឋមន្រ្តី ហ៊ុន ម៉ាណែត និងលោកប្រធានាធិបតីនៃសាធារណរដ្ឋបារាំង Emmanuel MACRON ក្នុងឱកាសដែលលោកមកបំពេញទស្សនកិច្ចផ្លូវរដ្ឋ និងចូលរួមកិច្ចប្រជុំកំពូលហ្វ្រង់កូហ្វូនីលើកទី២០ នៅប្រទេសកម្ពុជា ចាប់ពីថ្ងៃទី១៤-១៦ ខែវិច្ឆិកា ឆ្នាំ២០២៦។
បើតាមលោក កែវ រតនៈ ប្រទេសបារាំងនឹងផ្តល់ជំនួយមកកម្ពុជាលើវិស័យថាមពលក្នុងទឹកប្រាក់ជាង ២០០លានដុល្លារ និងបានចុះហត្ថលេខាសិក្សាសមិទ្ធិលទ្ធភាពវិនិយោគរួមរវាងក្រុមហ៊ុនបារាំង EDF និងក្រុមហ៊ុនរដ្ឋកម្ពុជា EDC លើគម្រោងវារីអគ្គិសនី អានុភាព ៨០០ មេហ្គាវ៉ាត់ នៅខេត្តកោះកុង ដែលមានតម្លៃប៉ាន់ស្មានចន្លោះពី ៧០០-៩០០លានដុល្លារ។
លោក រតនៈ បានអះអាងថា៖«នេះជាផលប្រយោជន៍ថ្មីបន្ថែមធំមួយនៅថ្ងៃអនាគត ទាំងអស់នេះបានមកដោយសារភាពជាម្ចាស់ផ្ទះរបស់កម្ពុជាយើង ក្រោមការដឹកនាំដ៏ឈ្លាសវៃរបស់សម្តេចធិបតី ហ៊ុន ម៉ាណែត»។
វិស័យថាមពល គឺជាផ្នែកដ៏សំខាន់មួយក្នុងការទាក់ទាញវិនិយោគិនជាតិ និងអន្តរជាតិឱ្យបណ្តាក់ទុនផ្ទាល់នៅកម្ពុជា ខណៈរយៈពេលជាង ១ ទសវត្សរ៍កន្លងមកនេះរាជរដ្ឋាភិបាលកម្ពុជាបានខិតខំយ៉ាងខ្លាំងក្នុងការបង្កើតសមត្ថភាពក្នុងការផលិតថាមពលអគ្គិសនី ជាពិសេសថាមពលស្អាត/កកើតឡើងវិញ។
ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) លោក តែ តាំងប៉រ ធ្លាប់បានប្រាប់ភ្នំពេញប៉ុស្តិ៍ថា វិស័យថាមពលពិតជាមានសារៈសំខាន់ណាស់ក្នុងការបង្កើនសក្តានុពលទាក់ទាញ និងលើកទឹកចិត្តឱ្យអ្នកវិនិយោគចូលមកបើកដំណើរការរោងចក្រ/សហគ្រាស ឬអាជីវកម្មនៅកម្ពុជា ព្រោះបច្ចុប្បន្ននេះគ្រប់ចង្វាក់ផលិតកម្ម និងការងារការិយាល័យ សុទ្ធតែផ្សារភ្ជាប់ជាមួយនឹងថាមពលអគ្គិសនី។
លោកបានបន្តថា ការបង្កើនសមត្ថភាពផ្គត់ផ្គង់ថាមពល តម្លៃអគ្គិសនីទាប ប្រព័ន្ធចែកចាយទូលំទូលាយ និងនិរន្តរភាពរបស់ចរន្ត គឺជាព័ត៌មានវិជ្ជមានសម្រាប់អ្នកវិនិយោគ ព្រោះរាល់ចំណាយប្រតិបត្តិការរបស់អាជីវកម្ម គឺសុទ្ធតែទាក់ទងនឹងតម្លៃរបស់ថាមពល។
លោកបានថ្លែងថា៖«ជាទូទៅមុននឹងសម្រេចចិត្តធ្វើទៅវិនិយោគនៅទីតាំង ឬប្រទេសណាមួយ អ្វីដែលអ្នកវិនិយោគត្រូវមើលមុនគេ គឺតម្លៃថាមពល ព្រោះបច្ចុប្បន្ននេះគ្រប់ចង្វាក់ផលិតកម្មទាំងអស់សុទ្ធតែត្រូវការប្រើប្រាស់ថាមពល។ ប្រព័ន្ធចែកចាយទូលំទូលាយ តម្លៃទាប និងនិរន្តរភាពចរន្ត គឺជាអ្វីដែលគ្រប់អ្នកវិនិយោគចង់បាន»។
គិតត្រឹមចុងឆ្នាំ២០២៥ ការផ្គត់ផ្គង់អគ្គិសនីនៅកម្ពុជា បានគ្របដណ្តប់លើភូមិចំនួន ១៤ ៤៣៨ កើនឡើងចំនួន ៣៩០ភូមិ ប៉ុន្តែបើគិតជាភាគរយប្រៀបធៀបជាមួយស្ថិតិចំនួនភូមិសរុបថ្មីបានថយចុះពី ៩៩,១៥% មក ៩៩,០៩%។ នេះបើតាមលោក យឹម វិសិដ្ឋ ប្រធានអាជ្ញាធរអគ្គិសនីកម្ពុជា ក្នុងពិធីបើកសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារអនុវត្តសម្រាប់ឆ្នាំ២០២៦ របស់អាជ្ញាធរអគ្គិសនីកម្ពុជា។
លោក វិសិដ្ឋ បានលើកឡើងថា នៅចុងឆ្នាំ២០២៣ ការផ្គត់ផ្គង់អគ្គិសនីបានគ្របដណ្តប់លើភូមិចំនួន ១៤ ០០៨ ស្មើ ៩៨,៨៧%។ មកដល់ចុងឆ្នាំ២០២៤ ការផ្គត់ផ្គង់អគ្គិសនីបានគ្របដណ្តប់លើភូមិចំនួន ១៤ ០៤៨ ស្មើ ៩៩,១៥% កើនឡើងចំនួន ៤០ភូមិ។
ប្រធានអាជ្ញាធរអគ្គិសនីកម្ពុជាបានបញ្ជាក់ថា មូលហេតុចំនួនភាគរយប្រៀបធៀបជាមួយចំនួនភូមិសរុបមានការថយចុះ គឺដោយសារកន្លងមក អាជ្ញាធរអគ្គិសនីកម្ពុជាបានប្រើប្រាស់ស្ថិតិភូមិសរុប ១៤ ១៦៨ ប៉ុន្តែសម្រាប់ឆ្នាំ២០២៥ អាជ្ញាធរអគ្គិសនីកម្ពុជាបានប្រើប្រាស់ស្ថិតិភូមិសរុបថ្មី ដែលមានចំនួន ១៤ ៥៧០ គឺចំនួនភូមិបានកើនឡើង ៤០២ភូមិ។ ផ្អែកតាមគម្រោងផែនការក្នុងរយៈពេល ២-៣ឆ្នាំខាងមុខ ទាំងអគ្គិសនីកម្ពុជា និងទាំងសេវាករឯកជន អាចមានលទ្ធភាពពង្រីកការផ្គត់ផ្គង់អគ្គិសនីពីបណ្តាញជាតិបាន ៦៧ ភូមិទៀត។
លោក ពិសិដ្ឋ បាននិយាយថា៖«យើងអាចសល់ភូមិចំនួន ៦៥ ត្រូវជា ០,៤៥% ដែលអាចពុំមានការផ្គត់ផ្គង់ពីបណ្តាញជាតិ។ ភូមិដែលនៅសល់ទាំងនេះ ជាភូមិមានស្ថានភាពពិបាកខ្លាំង ដូចជា ភូមិស្ថិតនៅតំបន់ដាច់ស្រយាលខ្លាំង តំបន់គ្មានផ្លូវធ្វើដំណើរ តំបន់កោះ តំបន់រស់នៅបណ្តែតទឹក តំបន់លិចទឹកនៅរដូវវស្សា តំបន់មានប្រជាពលរដ្ឋរស់នៅរាយប៉ាយ និងតំបន់តាំងទីលំនៅថ្មី ជាដើម ដែលត្រូវការទុនយ៉ាងច្រើន និងមានភាពស្មុគស្មាញ ប្រសិនបើយើងត្រូវពង្រីកការផ្គត់ផ្គង់ពីបណ្តាញជាតិទៅកាន់ទីនោះ»៕






