លោកហ៊ុន ម៉ាណែត៖ អភិវឌ្ឍទេទឹកពុះត្រូវ «បង្រៀនសហគមន៍ឱ្យចេះរកស៊ី» ពីទេសចរណ៍

លោកហ៊ុន ម៉ាណែត៖ អភិវឌ្ឍទេទឹកពុះត្រូវ «បង្រៀនសហគមន៍ឱ្យចេះរកស៊ី» ពីទេសចរណ៍

ភ្នំពេញៈ លោកនាយករដ្ឋមន្ត្រី ហ៊ុន ម៉ាណែត បានដាក់ការពង្រឹងសមត្ថភាពរកចំណូលរបស់ប្រជាសហគមន៍ជាស្នូលនៃគម្រោងអភិវឌ្ឍន៍គោលដៅលម្ហែបៃតង «ទេទឹកពុះ» ដោយលោកថា គោលដៅមិនមែនត្រឹមតែកែលម្អហេដ្ឋារចនាសម្ព័ន្ធ និងទាក់ទាញភ្ញៀវទេសចរប៉ុណ្ណោះទេ ប៉ុន្តែត្រូវធ្វើឱ្យប្រជាពលរដ្ឋក្នុងមូលដ្ឋានមានជំនាញ និងអាចទាញយកចំណូលពីកំណើនទេសចរណ៍ដោយខ្លួនឯង។

ក្នុងការបង្ហោះលើបណ្ដាញសង្គមនៅថ្ងៃទី១៦ ខែសីហា លោក ហ៊ុន ម៉ាណែត បានឱ្យដឹងថា លោកបានឆ្លៀតពេលជួបសំណេះសំណាលដោយផ្ទាល់ជាមួយតំណាងប្រជាសហគមន៍ទេទឹកពុះ ដើម្បីស្វែងយល់ពីតម្រូវការជាក់ស្ដែងរបស់ពួកគេ មុនការរៀបចំគម្រោងលម្ហែបៃតងនៅតំបន់នេះនាពេលខាងមុខ។

លោកបានបញ្ជាក់ថា ការទទួលយកមតិយោបល់ពីប្រជាសហគមន៍មានគោលបំណងធានាថា ការអភិវឌ្ឍនឹងឆ្លើយតបទៅនឹងអ្វីដែលប្រជាពលរដ្ឋត្រូវការពិតប្រាកដ និងផ្ដល់ផលប្រយោជន៍ដោយផ្ទាល់ដល់ពួកគេ ជាជាងការអភិវឌ្ឍដែលផ្ដោតតែលើហេដ្ឋារចនាសម្ព័ន្ធ។

លោកថា៖ «ការចូលរួមយោបល់របស់សហគមន៍ចំពោះគម្រោងលម្ហែបៃតងទេទឹកពុះ ដែលនឹងត្រូវរៀបចំនៅពេលខាងមុខ គឺដើម្បីធានាថាគម្រោងនោះនឹងផ្តល់អត្ថប្រយោជន៍ដល់សហគមន៍ ចំគោលដៅដែលសហគមន៍ចង់បាន»។

បន្ថែមពីការកែលម្អហេដ្ឋារចនាសម្ព័ន្ធនៅរមណីយដ្ឋានទេទឹកពុះ លោកនាយករដ្ឋមន្ត្រីបានដាក់ចេញទិសដៅឱ្យមានការបណ្ដុះបណ្ដាលជំនាញ និងបំណិនពាក់ព័ន្ធនឹងវិស័យទេសចរណ៍ ព្រមទាំងការកំណត់ស្តង់ដារសេវាកម្មឱ្យបានច្បាស់លាស់សម្រាប់សហគមន៍។

លោកបានពន្យល់គោលដៅនេះដោយពាក្យសាមញ្ញថា៖ «បង្រៀនសហគមន៍ឱ្យចេះរកស៊ី» ក្នុងវិស័យទេសចរណ៍។

លោកបន្តថា ការធ្វើបែបនេះនឹងជួយពង្រឹងភាពជាម្ចាស់របស់ប្រជាសហគមន៍ និងអនុញ្ញាតឱ្យពួកគេអាចទាញយកផលប្រយោជន៍ជាអតិបរមាពីការអភិវឌ្ឍនៅក្នុងតំបន់ ខណៈសហគមន៍ត្រូវត្រៀមសមត្ថភាពរបស់ខ្លួនសម្រាប់ទទួលភ្ញៀវទេសចរកាន់តែច្រើននាពេលអនាគត។

ការលើកឡើងនេះបង្ហាញពីការជំរុញគំរូអភិវឌ្ឍន៍ទេសចរណ៍ដែលផ្ដល់តួនាទីកាន់តែធំដល់សហគមន៍មូលដ្ឋាន ដោយប្រជាពលរដ្ឋមិនត្រឹមតែជាអ្នករស់នៅជុំវិញតំបន់ទេសចរណ៍ ឬអ្នកទទួលផលដោយប្រយោលប៉ុណ្ណោះទេ ប៉ុន្តែត្រូវមានលទ្ធភាពចូលរួមផ្ដល់សេវា លក់ផលិតផល និងបង្កើតមុខរបរដែលភ្ជាប់ជាមួយចរន្តភ្ញៀវទេសចរ។

គម្រោងទេទឹកពុះស្ថិតក្នុងសហគមន៍តំបន់ការពារធម្មជាតិកោដូនតី ក្នុងស្រុកឱរ៉ាល់ ខេត្តកំពង់ស្ពឺ ហើយត្រូវបានក្រសួងបរិស្ថានជំរុញឱ្យក្លាយជាគោលដៅលម្ហែបៃតង ដែលភ្ជាប់ការអភិវឌ្ឍទេសចរណ៍ជាមួយការលើកកម្ពស់ជីវភាពប្រជាពលរដ្ឋ និងការការពារធនធានធម្មជាតិ។

កាលពីថ្ងៃទី៧ ខែសីហា រដ្ឋមន្ត្រីក្រសួងបរិស្ថាន លោក អ៊ាង សុផល្លែត ក៏បានជួបជាមួយប្រជាសហគមន៍ ដើម្បីពិភាក្សាអំពីការរៀបចំហេដ្ឋារចនាសម្ព័ន្ធសម្រាប់គម្រោង។ ក្រសួងបានបញ្ជាក់ថា ការអភិវឌ្ឍមានគោលដៅទាក់ទាញភ្ញៀវទេសចរមកសម្រាកលម្ហែ ខណៈជួយបង្កើនជីវភាពរបស់ប្រជាពលរដ្ឋ និងពង្រឹងការគ្រប់គ្រងតំបន់ការពារធម្មជាតិប្រកបដោយនិរន្តរភាព។

ផែនការហេដ្ឋារចនាសម្ព័ន្ធដែលត្រូវបានបង្ហាញកន្លងមក រួមមានកន្លែងផ្ដល់ព័ត៌មាន កន្លែងគោរពបូជា កន្លែងងូតទឹក កន្លែងសម្រាកលម្ហែជាមួយធម្មជាតិ កន្លែងលក់ដូរ និងផ្សារសហគមន៍ ដែលអាចបង្កើតឱកាសសម្រាប់ប្រជាពលរដ្ឋក្នុងតំបន់លក់ទំនិញ ផលិតផល និងផ្ដល់សេវាដល់ភ្ញៀវទេសចរ។

ការរៀបចំតំបន់នេះក៏ត្រូវបានភ្ជាប់ជាមួយការកំណត់ព្រំដី និងការការពារធនធានធម្មជាតិផងដែរ។ ក្រសួងបរិស្ថានបានបញ្ចប់ការបោះបង្គោលព្រំដីចំនួន២១បង្គោលនៅក្នុងតំបន់គម្រោង និងបានរៀបចំបោះបង្គោលចំនួន៣៧បន្ថែមទៀតជុំវិញតំបន់ ដើម្បីទប់ស្កាត់ការរុករានទន្ទ្រានដី និងគាំទ្រការអភិវឌ្ឍប្រកបដោយនិរន្តរភាព។

លើសពីនេះ ផ្ទះរបស់ប្រជាសហគមន៍ជាង៣០០គ្រួសារនៅតំបន់ទេទឹកពុះក៏ត្រូវបានបំពាក់អំពូលសូឡារួចហើយ ខណៈរដ្ឋាភិបាលមានទិសដៅប្រែក្លាយសហគមន៍មូលដ្ឋានទៅជាសហគមន៍អព្យាក្រឹតកាបូន ដែលភ្ជាប់ការបង្កើនចំណូលជាមួយការការពារបរិស្ថាន។

ការជំរុញឱ្យសហគមន៍ក្លាយជាអ្នកចូលរួមដោយផ្ទាល់ក្នុងសេដ្ឋកិច្ចទេសចរណ៍ មិនមែនជាគំនិតដែលទើបតែត្រូវបានលើកឡើងនោះទេ។ កាលពីខែមិថុនា លោក ហ៊ុន ម៉ាណែត បានបញ្ជាក់ថា លោកបានចុះទៅទេទឹកពុះដោយផ្ទាល់ ដើម្បីពិនិត្យស្ថានភាព និងស្វែងយល់ពីតម្រូវការរបស់សហគមន៍ ជាជាងពឹងផ្អែកតែលើរបាយការណ៍ពីមន្ត្រី។

ក្នុងដំណើរនោះ លោកបានលើកឡើងពីការអភិវឌ្ឍតំបន់ឱ្យក្លាយជាសហគមន៍គំរូមួយ ដែលអាចបង្កើតចំណូលដល់ប្រជាពលរដ្ឋនៅមូលដ្ឋានប្រកបដោយនិរន្តរភាព។ ការអភិវឌ្ឍទេទឹកពុះ និងតំបន់ខ្នងផ្សារ ក៏ត្រូវបានរៀបចំក្រោមគំនិតដែលឱ្យសហគមន៍មានតួនាទីដឹកនាំក្នុងការគ្រប់គ្រង និងទទួលផលពីគម្រោងអេកូទេសចរណ៍។

ជាមួយនឹងការកែលម្អហេដ្ឋារចនាសម្ព័ន្ធដែលកំពុងត្រូវបានជំរុញ សារថ្មីរបស់លោកនាយករដ្ឋមន្ត្រីបានដាក់ទម្ងន់ទៅលើផ្នែកមួយទៀតនៃគម្រោង គឺការធ្វើឱ្យប្រជាសហគមន៍មានសមត្ថភាពគ្រប់គ្រាន់ក្នុងការប្រែក្លាយសក្ដានុពលទេសចរណ៍ទៅជាមុខរបរ និងប្រាក់ចំណូលដោយផ្ទាល់។

តាមទិសដៅនេះ ភាពជោគជ័យនៃគម្រោងទេទឹកពុះនឹងមិនត្រូវវាស់តែតាមចំនួនហេដ្ឋារចនាសម្ព័ន្ធថ្មី ឬចំនួនភ្ញៀវទេសចរដែលទៅដល់តំបន់នោះទេ ប៉ុន្តែក៏អាស្រ័យលើថាតើប្រជាសហគមន៍អាចក្លាយជាម្ចាស់សកម្មភាពសេដ្ឋកិច្ច និងទទួលបានចំណូលពីការអភិវឌ្ឍនោះបានកម្រិតណាផងដែរ។

-Phnom Penh Post-