«ភូមិរង់ចាំ» — ស្នាមមេត្តាដ៏កក់ក្តៅក្នុងគ្រាលំបាក

«ភូមិរង់ចាំ» — ស្នាមមេត្តាដ៏កក់ក្តៅក្នុងគ្រាលំបាក

ដោយ៖តាបូរណ៍

នៅក្នុងពេលវេលាដែលបងប្អូនប្រជាពលរដ្ឋជាច្រើនត្រូវបង្ខំចិត្តចាកចេញពីភូមិកំណើត ចោលផ្ទះសម្បែង ទ្រព្យសម្បត្តិ និងជីវភាពរស់នៅប្រចាំថ្ងៃ ដោយសារតែការឈ្លានពាន និងភាពមិនសុខសាន្តនៅតាមតំបន់ព្រំដែន ក្តីព្រួយបារម្ភ និងការឈឺចាប់បានគ្របដណ្តប់លើបេះដូងរបស់មនុស្សគ្រប់គ្នា។ ក្រោមតង់កៅស៊ូក្នុងជំរំសុវត្ថិភាព ពួកគាត់បានរស់នៅជាមួយក្តីសង្ឃឹមថា ថ្ងៃណាមួយនឹងបានវិលត្រឡប់ទៅកាន់ដីកំណើតរបស់ខ្លួនវិញ។

ទោះជាយ៉ាងណា ក្នុងគ្រាដ៏លំបាកនេះ រាជរដ្ឋាភិបាលកម្ពុជាមិនបានទុកឱ្យប្រជាពលរដ្ឋរងទុក្ខតែម្នាក់ឯងឡើយ។ ដោយឈរលើគោលការណ៍ «ប្រជាពលរដ្ឋជាម្ចាស់ប្រទេស និងជាកម្លាំងចម្បងនៃការអភិវឌ្ឍ» រាជរដ្ឋាភិបាលបានយកចិត្តទុកដាក់យ៉ាងជ្រាលជ្រៅ ដោយសាងសង់ជម្រកស្នាក់នៅថ្មី ជូនដល់បងប្អូនដែលបានជម្លៀសខ្លួន មករស់នៅក្នុងទីតាំងដែលមានសុវត្ថិភាព។

ទីកន្លែងនេះត្រូវបានដាក់ឈ្មោះថា «ភូមិរង់ចាំ» ដែលជាឈ្មោះពោរពេញដោយអត្ថន័យ និងមនោសញ្ចេតនា។ វាមិនមែនគ្រាន់តែជាទីកន្លែងស្នាក់នៅបណ្តោះអាសន្នប៉ុណ្ណោះទេ ប៉ុន្តែជានិមិត្តរូបនៃក្តីសង្ឃឹម ការថែរក្សា និងការមិនបោះបង់ប្រជាពលរដ្ឋចោលក្នុងគ្រាលំបាក។

អ្វីដែលកាន់តែធ្វើឱ្យប្រជាពលរដ្ឋមានភាពកក់ក្តៅក្នុងចិត្តនោះ គឺរាល់ការចំណាយលើទឹកស្អាត ភ្លើងអគ្គិសនី និងសេវាចាំបាច់ផ្សេងៗ ត្រូវបានរាជរដ្ឋាភិបាលទទួលបន្ទុកទាំងស្រុង។ នេះជាការបង្ហាញយ៉ាងច្បាស់ថា រាជរដ្ឋាភិបាលមិនត្រឹមតែផ្តល់ទីជម្រកប៉ុណ្ណោះទេ ប៉ុន្តែថែមទាំងជួយសម្រាលបន្ទុកជីវភាពប្រចាំថ្ងៃរបស់បងប្អូនប្រជាពលរដ្ឋផងដែរ។

ជាពិសេស ប្រសាសន៍ដ៏មានអត្ថន័យរបស់ សម្តេចតេជោ ហ៊ុន សែន បានធ្វើឱ្យប្រជាពលរដ្ឋជាច្រើនរំជួលចិត្តថា៖

«ទោះបីជាពេលខាងមុខ បងប្អូនបានវិលត្រឡប់ទៅភូមិចាស់វិញក៏ដោយ ផ្ទះទាំងនេះនៅតែជាកម្មសិទ្ធិរបស់បងប្អូនដដែល»។

ប្រសាសន៍ដ៏កក់ក្តៅនេះ មិនត្រឹមតែជាការផ្តល់ជម្រកមួយខ្នងប៉ុណ្ណោះទេ ប៉ុន្តែជាការផ្តល់នូវភាពជឿជាក់ សុវត្ថិភាពផ្លូវចិត្ត និងអនាគតមួយសម្រាប់គ្រួសារប្រជាពលរដ្ឋ។ វាជាសារមួយដែលបង្ហាញថា មិនថាប្រជាពលរដ្ឋជួបការលំបាកយ៉ាងណា ក៏នៅតែមានរដ្ឋាភិបាលឈរនៅក្បែរជានិច្ច។

«ភូមិរង់ចាំ» ដូច្នេះហើយ មិនមែនជាកន្លែងសម្រាប់តែរង់ចាំដំណោះស្រាយនោះទេ ប៉ុន្តែជាភូមិដែលពោរពេញដោយក្តីសង្ឃឹម ភូមិដែលបង្ហាញពីស្មារតីសាមគ្គីភាព និងការយកចិត្តទុកដាក់រវាងថ្នាក់ដឹកនាំ និងប្រជាពលរដ្ឋ។ នៅទីនោះ មានទាំងទឹកចិត្ត មេត្តាធម៌ និងការទទួលខុសត្រូវ ដែលបានជួយឱ្យបងប្អូនមានកម្លាំងចិត្តបន្តដំណើរជីវិត ទោះស្ថិតក្នុងកាលៈទេសៈដ៏លំបាកយ៉ាងណាក៏ដោយ។

«ភូមិរង់ចាំ» នឹងក្លាយជាសក្ខីភាពមួយនៃការយកចិត្តទុកដាក់របស់រាជរដ្ឋាភិបាលចំពោះប្រជាពលរដ្ឋ និងជាអនុស្សាវរីយ៍មួយដែលបញ្ជាក់ថា ក្នុងគ្រាដែលពលរដ្ឋជួបវិបត្តិ ជានិច្ចកាលនៅមានដៃដ៏កក់ក្តៅមួយលូកទៅជួយគាំទ្រ មិនឱ្យនរណាម្នាក់ត្រូវបានទុកចោលឡើយ៕