សម្តេចតេជោ ហ៊ុន សែន សោកស្ដាយចំពោះការវិភាគបែបល្ងង់ខ្លៅរបស់អ្នកវិភាគមួយចំនួននៅក្រៅប្រទេស ពាក់ព័ន្ធនឹងព្រែកជីកហ្វូណនតេជោ
សម្តេចតេជោ ហ៊ុន សែន សោកស្ដាយចំពោះការវិភាគបែបល្ងង់ខ្លៅរបស់អ្នកវិភាគមួយចំនួននៅក្រៅប្រទេស ពាក់ព័ន្ធនឹងព្រែកជីកហ្វូណនតេជោ
ក្នុងឱកាសថ្លែងសារពិសេសស្តីពី «ព្រែកជីកហ្វូណនតេជោ» នៅថ្ងៃទី១៦ ខែឧសភា ឆ្នាំ២០២៤ សម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានគូសបញ្ជាក់ថា មានមតិនិងអ្នកវិភាគមួយចំនួនពីក្រៅប្រទេស បានលើកឡើងថា ព្រែកជីកហ្វូណនតេជោ នឹងក្លាយជាបន្ទាត់ព្រំដែនថ្មីរវាងប្រទេសកម្ពុជានិងវៀតណាម។
ពាក់ព័ន្ធនឹងការវិភាគបែបល្ងិតល្ងងនេះ បានសម្តេចតេជោ ហ៊ុនសែន បានថ្លែងត្រលប់ទៅវិញថា បើសិនវាជាការពិតមែននោះ តើវៀតណាមចាំបាច់ត្រូវព្រួយបារម្ភធ្វើអ្វី ព្រោះថាវៀតណាមនឹងទទួលបានទឹកដីពីកម្ពុជាបន្ថែមចាប់ពីខេត្តកណ្តាលទៅ ពោលគឺរាប់ចាប់ពីក្បែរផ្ទះសម្តេចតេជោទៅតែម្ដង។ មិនតែប៉ុណ្ណោះ តើកម្ពុជាចាំបាច់អីត្រូវទៅចចារបោះបង្គោលព្រំដែនជាមួយវៀតណាមរហូតសម្រេចបាន៨៤% បើគង់តែប្រគល់ដីទៅឱ្យវៀតណាមដដែលនោះ?
លើសពីនេះដែរ សម្តេចតេជោ ហ៊ុន សែន បានសម្ដែងការសោកស្ដាយចំពោះក្រុមអ្នកវិភាគប្រឆាំងជ្រុលនិយមមួយក្ដាប់តូច ដែលនៅតែបន្តយករឿងព្រែកជីកហ្វូណននេះ មកភ្ជាប់នឹងបញ្ហានយោបាយតំបន់ដើម្បីប្រឆាំងចិន។ សម្ដេចតេជោ ហ៊ុន សែន ក៏បានសម្ដែងការសោកស្ដាយផងដែរ ដែលក្រុមអ្នកវិភាគប្រឆាំងមួយក្ដាប់តូចទាំងនោះ បន្តយករឿងដែលជាសមិទ្ធផលសម្រាប់ការអភិវឌ្ឍសង្គមនិងសេដ្ឋកិច្ចជាតិ មកធ្វើជាឈ្នាន់នយោបាយរបស់ពួកគេ៕
