សម្តេចធិបតី ហ៊ុន ម៉ាណែត៖ ការធ្វើបរិវត្តកម្មឌីជីថល គឺជាការចាប់យក និងទាញយកប្រយោជន៍ជាអតិបរិមាពីឌីជីថល ប៉ុន្តែក៏ត្រូវរក្សាឱ្យបាននូវអត្តសញ្ញាណវប្បធម៌ជាតិ

សម្តេចធិបតី ហ៊ុន ម៉ាណែត៖ ការធ្វើបរិវត្តកម្មឌីជីថល គឺជាការចាប់យក និងទាញយកប្រយោជន៍ជាអតិបរិមាពីឌីជីថល ប៉ុន្តែក៏ត្រូវរក្សាឱ្យបាននូវអត្តសញ្ញាណវប្បធម៌ជាតិ

ក្នុងឱកាសអញ្ជើញជាអធិបតីបើកវេទិការដ្ឋាភិបាលឌីជីថលលើកទី១ ឆ្នាំ២០២៤ នៅមជ្ឈមណ្ឌលសន្និបាត និងពិព័រណ៍កោះពេជ្រ នៅព្រឹកថ្ងៃទី១១ ខែមីនា ឆ្នាំ២០២៤ សម្តេចធិបតី ហ៊ុន ម៉ាណែត បានគូសបញ្ជាក់ថា សម្រាប់កម្ពុជា ការធ្វើបរិវត្តកម្មឌីជីថល គឺជាការចាប់យក និងទាញយកផលប្រយោជន៍ជាអតិបរមាពីការរីកចម្រើននៃបច្ចេកវិទ្យាគមនាគមន៍និងព័ត៌មាន បច្ចេកវិទ្យាឌីជីថល ដើម្បីបង្កើនផលិតភាព និងប្រសិទ្ធភាពសេដ្ឋកិច្ច ព្រមទាំងជំរុញកំណើនសេដ្ឋកិច្ចជាតិ និងកសាងសង្គមស៊ីវីល័យដែលពលរដ្ឋអាចទទួលបាននូវផលប្រយោជន៍ពីការប្រើប្រាស់សេវាឌីជីថល ប្រកបដោយបរិយាបន្ន ភាពជឿទុកចិត្តបាន និងសុវត្ថិភាពខ្ពស់ ហើយដំណាលគ្នានេះ ក៏រក្សាឱ្យបាននូវអត្តសញ្ញាណវប្បធម៌ជាតិ។

សម្តេចធិបតី ហ៊ុន ម៉ាណែត បានគូសបញ្ជាក់បន្ថែមថា រាជរដ្ឋាភិបាល នីតិកាលទី៧នៃរដ្ឋសភា បានប្រកាសដាក់ឱ្យប្រើប្រាស់យុទ្ធសាស្រ្តបញ្ចកោណ-ដំណាក់កាលទី១ ដែលបានកំណត់អាទិភាពចំនួន៥ រួមមាន៖ មនុស្ស ផ្លូវ ទឹក ភ្លើង និងបច្ចេកវិទ្យា ដែលក្នុងនោះ បច្ចេកវិទ្យា គឺជាអាទិភាពថ្មីមួយដែលបានកំណត់នៅក្នុងបញ្ចកោណទី៥ គឺការកសាងសេដ្ឋកិច្ច និងសង្គមឌីជីថល៕