អ្នកសង្កេតការណ៍អាស៊ានបន្ថែមវត្តមាននៅកម្ពុជា ដើម្បីតាមដានការអនុវត្តបទឈប់បាញ់ជាមួយថៃ
នាយទាហានពីប្រទេសសិង្ហបុរីចំនួន២រូប គឺ វរសេនីយ៍ត្រី WONG ZHENG, ERNEST និងព្រិន្ទបាលឯក SHASI KUMAR បានមកដល់មកកម្ពុជា។ រូបភាព ក្រសួងការពារជាតិ
#ព័ត៌មានជាតិ
សៀមរាប៖ កម្ពុជាបានទទួលស្វាគមន៍នាយទាហានបន្ថែមពីប្រទេសសិង្ហបុរី និងម៉ាឡេស៊ី ចូលរួមជាមួយក្រុមអ្នកសង្កេតការណ៍អាស៊ាន (AOT) ក្នុងគោលបំណងពង្រឹងការត្រួតពិនិត្យតាមដានការអនុវត្តបទឈប់បាញ់ និងកិច្ចព្រមព្រៀងពាក់ព័ន្ធជាមួយប្រទេសថៃ។
យោងតាមសេចក្តីប្រកាសរបស់អ្នកនាំពាក្យក្រសួងការពារជាតិ លោកស្រី ឧត្តមសេនីយ៍ឯក ម៉ាលី សុជាតា ចេញផ្សាយនៅថ្ងៃទី២៧ ខែមីនា ឆ្នាំ២០២៦ ក្រុមអ្នកសម្របសម្រួល (CLG) នៃព្រះរាជាណាចក្រកម្ពុជា បានទទួលស្វាគមន៍នាយទាហានទាំងនេះនៅអាកាសយានដ្ឋានអន្តរជាតិសៀមរាបអង្គរ។
នៅម៉ោង៤រសៀល នាយទាហានពីប្រទេសសិង្ហបុរីចំនួន២រូប គឺ វរសេនីយ៍ត្រី WONG ZHENG, ERNEST និងព្រិន្ទបាលឯក SHASI KUMAR បានមកដល់ ខណៈមុននេះនៅម៉ោង១៣:៥០នាទីរសៀល នាយទាហានពីប្រទេសម៉ាឡេស៊ីចំនួន២រូប គឺ វរសេនីយ៍ទោ MOHD AMIN BIN BAHAROM និងវរសេនីយ៍ទោ MOHD ERRY BIN DUL TLDM ក៏បានមកដល់ដែរ។
នាយទាហានទាំងនេះបានចូលរួមជាមួយក្រុមអ្នកសង្កេតការណ៍អាស៊ាន (AOT) ប្រចាំព្រះរាជាណាចក្រកម្ពុជា ដែលដឹកនាំដោយប្រទេសហ្វីលីពីន ក្នុងនាមជាប្រធានអាស៊ាន ដើម្បីចុះសង្កេតការណ៍ ផ្ទៀងផ្ទាត់ និងធានាការអនុវត្តវិធានការទាំងអស់ដែលមានក្នុងសេចក្តីប្រកាសរួមរវាងកម្ពុជា និងថៃ។
លោកស្រី ម៉ាលី សុជាតា បានបញ្ជាក់ថា៖ «បេសកកម្មរបស់ពួកគេ គឺដើម្បីចុះសង្កេតការណ៍ ផ្ទៀងផ្ទាត់ និងធានាការអនុវត្តប្រកបដោយប្រសិទ្ធភាពលើវិធានការទាំងអស់ក្នុងសេចក្តីប្រកាសរួម»។
ការចូលរួមបន្ថែមរបស់អ្នកសង្កេតការណ៍អាស៊ាននេះ បង្ហាញពីការកើនឡើងនៃការចូលរួមរបស់តំបន់ ក្នុងការត្រួតពិនិត្យស្ថានភាពតាមព្រំដែនកម្ពុជា-ថៃ បន្ទាប់ពីភាគីទាំងពីរបានឯកភាពលើវិធានការបទឈប់បាញ់ និងការស្ដារឡើងវិញនូវស្ថិរភាព។
កម្ពុជាបានបន្តបញ្ជាក់ពីការគាំទ្រយ៉ាងពេញទំហឹងដល់ក្រុមអ្នកសង្កេតការណ៍អាស៊ាន ព្រមទាំងសង្កត់ធ្ងន់លើសារៈសំខាន់នៃការពង្រឹងតួនាទី និងអាណត្តិរបស់ក្រុមនេះ ដើម្បីធានាឱ្យការអនុវត្តវិធានការទាំងអស់មានប្រសិទ្ធភាព និងពេញលេញ។
ក្រសួងការពារជាតិបានបញ្ជាក់ថា វត្តមានបន្ថែមនេះ នឹងជួយលើកកម្ពស់តម្លាភាព គណនេយ្យភាព និងការជឿទុកចិត្តគ្នាទៅវិញទៅមក ហើយកម្ពុជាក៏ស្វាគមន៍បណ្តាប្រទេសជាមិត្តផ្សេងទៀត ដែលមានបំណងចូលរួមគាំទ្រកិច្ចការនេះផងដែរ។
ក្នុងសេចក្តីប្រកាសដដែល រាជរដ្ឋាភិបាល និងក្រសួងការពារជាតិកម្ពុជា បានបញ្ជាក់ឡើងវិញពីការប្តេជ្ញាចិត្តយ៉ាងម៉ឺងម៉ាត់ ស្មោះត្រង់ និងទទួលខុសត្រូវខ្ពស់ ក្នុងការគោរព និងអនុវត្តយ៉ាងពេញលេញនូវកិច្ចព្រមព្រៀងពាក់ព័ន្ធទាំងអស់។
កិច្ចព្រមព្រៀងទាំងនេះ រួមមានសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) ថ្ងៃទី២៧ ខែធ្នូ ឆ្នាំ២០២៥ និងសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងប្រទេសទាំងពីរ ថ្ងៃទី២៦ ខែតុលា ឆ្នាំ២០២៥។
រាជរដ្ឋាភិបាលបានបញ្ជាក់ថា ការប្តេជ្ញាចិត្តទាំងនេះ មានគោលបំណងធ្វើឱ្យមានការស្ដារឡើងវិញនូវប្រក្រតីភាពយ៉ាងឆាប់រហ័ស និងធានាសន្តិភាព និងស្ថិរភាពយូរអង្វែងតាមបណ្តោយព្រំដែនរួម។
ការមកដល់នៃនាយទាហានបន្ថែមនេះ បានបន្ថែមសមត្ថភាពដល់យន្តការត្រួតពិនិត្យដឹកនាំដោយអាស៊ាន បង្ហាញពីការខិតខំរបស់ដៃគូតំបន់ ក្នុងការគាំទ្រការអនុវត្តបទឈប់បាញ់ និងការការពារការកើតមានភាពតានតឹងឡើងវិញ៕
-Phnom Penh Post-
