សម្តេចតេជោ ហ៊ុន សែន រំលឹកឡើងវិញពីប្រវត្តិបទចម្រៀង «ឱភ្នំពេញអើយ» ដែលនិពន្ធដោយលោក កែវ ចិន្តា, រៀបចំភ្លេង និងដឹកនាំផលិតដោយលោក ជ័យ សោភា

(ភ្នំពេញ)៖ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានគណបក្សប្រជាជនកម្ពុជា នាយប់ថ្ងៃទី០៣ ខែធ្នូ ឆ្នាំ២០២៥ បានរៀបរាប់ពីប្រវត្តិនៃការនិពន្ធបទចម្រៀង «ឱភ្នំពេញអើយ» ដែលនិពន្ធឡើងដោយ កែវ ចិន្តា និងការរៀបចំភ្លេង និងដឹកនាំផលិតដោយលោក ជ័យ សោភា។

សម្តេចមានប្រសាសន៍ថា ម្រៀងបទ «ឱភ្នំពេញអើយ» នៅតែជាការចងចាំរបស់ប្រជាជនកម្ពុជា។ សម្រាប់សម្តេច ចម្រៀងមួយបទនេះស្តាប់ហើយហូរទឹកភ្នែកដោយការរំភើប។

ទន្ទឹមគ្នានេះ បានជំរុញឱ្យ កូន ឬចៅលោក ម៉ម ធឿន លោក chun sothy ធ្វើការកែតម្រូវព័ត៌មាន ដែលបានផ្សាយខុស ទាក់ទងនឹងអ្នកនិពន្ធបទនេះផងដែរ។

សូមអានប្រសាសន៍ទាំងស្រុងរបស់ សម្តេចតេជោ ហ៊ុន សែន៖

«ម្សិលមិញខួបលើកទី៤៧នៃថ្ងៃបង្កើតរណសិរ្សសាមគ្គីសង្រ្គោះជាតិកម្ពុជា(២ធ្នូ១៩៧៨-២ធ្នូ២០២៥)។
នៅសល់ជាង១ខែទៀតនឹងឈានដល់ខួបលើក៤៧នៃថ្ងៃជ័យជំនះលើរបបប៉ុល ពត(៧មករា១៩៧៩-៧មករា២០២៦)។ ចម្រៀងបទ(ឱភ្នំពេញអើយ) នៅតែជាការចងចាំរបស់ប្រជាជនកម្ពុជា។ សម្រាប់ខ្ញុំចម្រៀងមួយបទនេះស្តាប់ហើយហូរទឹកភ្នែកដោយការរំភើប។ ទឹកដៃនិពន្ធទំនុកច្រៀងដោយបង
កែវ ចិន្តា និងការរៀបចំភ្លេង និងដឹកនាំផលិតដោយបង ជ័យ សោភា និងច្រៀងដោយក្មួយ សូ ចន្នី ពិតជាគួរឲ្យគោរព និងកោតសរសើរ។

ខ្ញុំសូមយកឱកាសនេះ សូមអភ័យទោសពីវិញ្ញាណក្ខន្ធបង កែវ ចិន្តា បង ជ័យ សោភា ក៏ដូចកូនៗ និងរបស់បងទាំងពីរ ដែលមុននេះខ្ញុំយល់ច្រឡំថាគ្រួសារបង កែវ ចិន្តា និងគ្រួសារបងជ័យ សោភា ដណ្តើមសិទ្ធិធ្វើជាម្ចាស់បទ(ឱភ្នំពេញអើយ) ប៉ុន្តែនៅពេលខ្ញុំឃើញការបង្ហោះតាម Facebook របស់ឈ្មោះ chun sothy ដែលនៅក្នុងនោះបានបញ្ជាក់ថាម្ចាស់ស្នាដៃបទ «ឱភ្នំពេញអើយ» គឺលោកអ៊ុំ «ម៉ម ធឿ» បានទទួលមរណភាពហើយ។ ដំបូងឡើយខ្ញុំគិតថាអាចមានបទ ដែលមានចំណងជើងដូចគ្នា ប៉ុន្តែពិនិត្យខ្លឹមសារខាងក្រោមថា បទនេះនិពន្ធតាំងពីនៅឡុងយ៉ាវ ដែលជាទីតាំង ខ្ញុំបង្កើតកងទ័ព និងជាមេបញ្ជាការខ្ពស់ជាងគេ ដែលនៅទីនោះមានអង្គភាពសិល្បះទាំងបុរាណ ទាំងសម័យ និងបង ជ័យ សោភា ជាជំនួយការខ្ញុំ គឺជារឿងដែលមិនអាចទៅរួចឡើយ។ (សិល្បះកងទ័ពសព្វថ្ងៃកកើតពីខែកក្កដា ឆ្នាំ១៩៧៨ដែលមានខ្ញុំជាបង្កើត) ចំណុចកាន់តែច្បាស់បទនេះមិនអាចនិពន្ធមុនរំដោះភ្នំពេញបានឡើយព្រោះក្នុងខ្លឹមសារនៃបទចម្រៀងមានពាក្យ (ឱភ្នំពេញអើយបីឆ្នាំនឹកអ្នកក្នុងឱរា) (ភ្នំពេញដួងព្រលឹងជាទីស្នេហាបីឆ្នាំខ្លោចផ្សា តែអ្នករក្សាបានប្រវត្តិថ្លៃថ្លាអង់អាចក្លាហាន) (អើយឱភ្នំពេញអើយទុក្ខសោកអ្នកបានស្បើយ ខ្ញុំជួបអ្នកវិញហើយ ឱដួងព្រលឹងអើយ ភ្នំពេញអើយអើយភ្នំពេញអើយ)ខ្លឹមសារក្នុងបទចម្រៀងមានន័យគ្រប់គ្រាន់ថាបទចម្រៀងនេះនិពន្ធក្រោយភ្នំពេញត្រូវបានរំដោះមិនមែននៅឡុងយ៉ាវ ឆ្នាំ១៩៧៨ នោះទេ។

ម្យ៉ាងទៀតចម្រៀងនេះមិនបានឮចាក់ផ្សាយមុនថ្ងៃ៧ មករា ១៩៧៩ ផងដែរ។មកនិយាយពីប្រវត្តិបទនៃចម្រៀង(ឱភ្នំពេញអើយ)វេលាថ្ងៃត្រង់ថ្ងៃ៧ មករា ១៩៧៩ ភ្នំពេញត្រូវបានរំដោះខ្ញុំមិនប្រាកដថាបងកែវ ចិន្តា សរសេរនៅពេលល្ងាច ឬពេលយប់៧មករា នោះទេ ព្រោះពេលនោះកំពុងប្រជុំមហាសន្និបាតបក្សលើកទី៣។ល្ងាចថ្ងៃ៨ មករា មានការប្រជុំដើម្បីចាត់តាំងរដ្ឋាភិបាល ដែលហៅថាក្រុមប្រឹក្សាប្រជាជនបដិវត្តកម្ពុជា តែបង កែវ ចិន្តា មិនបានចូលរួមប្រជុំទេ តែបងកែវ ចិន្តា ក៏ត្រូវបានតែងតាំងជារដ្ឋមន្ត្រីឃោសនាការព័ត៌មាន និងវប្បធម៌។

យប់ថ្ងៃ៨ មករា ខ្ញុំត្រឡប់ទៅចូលរួមបិទមហាសន្និបាតបក្សវិញ ខ្ញុំអង្គុយទទួលទានបាយជាប់ជាមួយបង កែវ ចិន្តា គាត់ក៏បានដឹងរឿងគាត់ធ្វើរដ្ឋមន្ត្រីដែរ ព្រោះគាត់ជាអ្នកគ្រប់គ្រងវិទ្យុផ្សាយសម្លេងរណសិរ្សតាំងថ្ងៃ២ ធ្នូ១៩៧៨ មកម្ល៉េះ។ព្រឹកថ្ងៃ៩ មករា ១៩៧៩ មានការប្រជុំរដ្ឋាបាលលើកដំបូង ដើម្បីបែងចែកភារកិច្ច។

ក្រោយប្រជុំចប់ឃើញឃើញបងជ័យ សោភា យូរម៉ាញ៉េតូហ្វូនយ៉ាងធំទៅដល់ដើម្បីឆ្លងយោបល់បង កែវ ចិន្តា ។ បង កែវ ចិន្តា ឃាត់ខ្ញុំឲ្យនៅជាមួយគាត់។ ឯបង ជ័យ សោភា និយាយមកកាន់ខ្ញុំថាបង ហ៊ុន សែន នៅជួយយោបល់ផង។ ទម្លាប់បង ជ័យ សោភា ហៅខ្ញុំថាបងទោះគាត់មានអាយុច្រើនជាងខ្ញុំក៏ដោយ។

បង ជ័យ សោភា ចាក់បទឱភ្នំពេញអើយ៣ដង។ ក្រោយស្តាប់រួចបង កែវ ចិន្តាឲ្យបន្ថែមភ្លេង ខ្ញុំមិនច្បាស់ទេ តែដូចជាបន្ថែមសម្លេងទ្រ។ ខ្ញុំមិនច្បាស់ថាបង ជ័យ សោភា ធ្វើតាមការណែនាំរបស់បង កែវ ចិន្តា ឬអត់នោះទេ។ មានមនុស្សតែម្នាក់គត់ដែលអាចបំភ្លឺបាននោះ គឺក្មួយ សូ ចន្នី។ ប្រសិនបើគាត់ច្រៀងថតឡើងវិញមានន័យថាបង ជ័យ សោភា ធ្វើតាមបង កែវ ចិន្តាប្រសិនបើបើមិនថតឡើងវិញ អាចថតតាមក្រោយទៀត ព្រោះចម្រៀងនេះត្រូវប្រញាប់ចាក់ផ្សាយក្រោយថ្ងៃរំដោះ។ ដូចនេះតាមការស្មានរបស់ខ្ញុំ បង កែវ ចិន្តា សរសេរបទចម្រៀងនៅល្ងាច ថ្ងៃ៧ ឬយប់ថ្ងៃ៧ មករា។ ប្រគល់ឲ្យបង ជ័យ សោភា រៀបភ្លេង និងផលិតនៅថ្ងៃ៨ ឬយប់ថ្ងៃ ៨មករា និងព្រឹកថ្ងៃ៩ មករា ១៩៧៩ ម៉ោងជាង១០ព្រឹក ឆ្លងយោបល់បង កែវ ចិន្តា។

តើចម្រៀងនេះចាប់ផ្សព្វផ្សាយអ្នកនិពន្ធនៅពេលណា? ពេលចាក់ផ្សាយដំបូងមិនមាននិយាយពីអ្នកនិពន្ធទេ។ ចូលដល់ខែកញ្ញា ឆ្នាំ១៩៧៩គណៈប្រតិភូជាន់ខ្ពស់ដឹកនាំដោយសម្តេច ហេង សំរិន ដែលរូបខ្ញុំ និងបង កែវ ចិន្តា អមដំណើរផងដែរទៅទស្សនកិច្ចនៅឡាវ។

ក្នុងពិធីជប់លៀងអ្នកចម្រៀងឡាវច្រៀងបទ ឱភ្នំពេញអើយ ដោយអ្នកឧទ្ទេសនាមបកជាភាសារខ្មែរថាបទ(ឱភ្នំពេញអើយនិពន្ធដោយសមមិត្ត កែវ ចិន្តា)តាំងពីពេលនោះមកមិនមានអ្នកណាទាមទារសិទ្ធិជាអ្នកនិពន្ធទេ រាប់ទាំងជ័យ សោភា ផងដែរ។
ខ្ញុំសូមនិយាយទៅកាន់កូន ឬចៅលោក ម៉ម ធឿន វិញម្តង។ ប្រហែលអ្នកផ្សាយព័ត៌មានខុសដោយអចេតនា ដែលថា លោក ម៉ម ធឿន ជាម្ចាស់បទចម្រៀង(ឱ ភ្នំពេញអើយ) ខ្ញុំជាអ្នកគ្រប់គ្រងលើឪពុករបស់ក្មួយៗ និងចៅៗ យើងជាយោធាមិនអាចយកចម្រៀងទៅថតនៅអង្គភាពស៊ីវិលបានទេ បើគ្មានការ
អនុញ្ញាតិពីខ្ញុំនាពេលនោះ។

ខ្ញុំសូមលោក chun sothy ធ្វើការកែតម្រូវព័ត៌មាន ដែលបានផ្សាយខុស។ការខិតខំស្រាវជ្រាវ និងពន្យល់របស់ខ្ញុំ គឺដើម្បីជៀសវាងការយល់ច្រឡំទៅថ្ងៃក្រោយព្រោះបទចម្រៀង(ឱភ្នំពេញអើយ) ជាបទចម្រៀងប្រវត្តិសាស្ត្រ»៕