នាយករដ្ឋមន្ត្រី៖ ថៃគ្រប់គ្រងទឹកដីកម្ពុជាខ្លះមែន ប៉ុន្តែកម្ពុជាមិនបានបាត់ដីដូចការរិះគន់
នាយករដ្ឋមន្ត្រី៖ ថៃគ្រប់គ្រងទឹកដីកម្ពុជាខ្លះមែន ប៉ុន្តែកម្ពុជាមិនបានបាត់ដីដូចការរិះគន់
លោកនាយករដ្ឋមន្ត្រី ហ៊ុន ម៉ាណែត បញ្ជាក់ជាថ្មីថាព្រំដែនកម្ពុជាគឺផ្អែកលើបង្គោលព្រំដែនតាំងពីឆ្នាំ១៩០៧ មិនមែនបង្គោលព្រំដែនដែលថៃកំណត់នោះទេ ហើយលោកបញ្ជាក់ថា ទឹកដីកម្ពុជាមិនបានបាត់បង់តាមរយៈកិច្ចព្រមព្រៀង ២៧ ធ្នូនោះទេ។
នៅក្នុងពិធីសម្ពោធមន្ទីរពេទ្យ ហ្លួង ម៉ែ នៅព្រឹកថ្ងៃទី១៦ ខែសីហានេះ លោកបានលើកឡើងជាឧទាហរណ៍ថា បង្គោលលេខ ៥៨ និង ៥៩ ត្រូវបានរំកិលចូលមកក្នុងទឹកដីខ្មែរប្រមាណ ១គីឡូម៉ែត្រ ហើយភាគីការងារខណ្ឌសីម៉ាបានឯកភាពគ្នាយកទៅដាក់ទីតាំងដើមវិញ។
លោកថ្លែងថា៖ «អត់មានស៊ីញ៉េដីឲ្យអ្នកណាទេ។ យើងមានអស់ហើយ កិច្ចព្រមព្រៀងទីក្រុងគូឡាឡាំពួរ (KL accord) សូម្បីតែកិច្ចព្រមព្រៀងឈប់បាញ់ ២៧ ធ្នូ ក៏មិនបានចែងថាមានការកាត់ដីឲ្យអ្នកនោះទេ។ សូមមើលឲ្យច្បាស់។ ចំណុចទី២ ចែងថា វាយនៅកន្លែងណាឈប់នៅកន្លែងហ្នឹងសិនទៅ ហាមរំកិលចុះឡើង ព្រោះអាចនាំឲ្យមានការវាយគ្នាមិនចេះចប់»។
លោកបន្តថា៖ «ក្រោយមក នៅពេលថៃរាយបន្លាលួស យើងតវ៉ាថាអ្នកឯងរំលោភបទឈប់បាញ់។ នៅក្នុងកិច្ចព្រមព្រៀង ចំណុចទី៣បាននិយាយច្បាស់លាស់ បើគ្មានចំណុចនេះ ក៏យើងមិនស៊ីញ៉េដែរ នៅថ្ងៃ ២៧ ធ្នូ។ ចំណុចទី៣ បញ្ជាក់ច្បាស់ថា ខ្សែព្រំដែនមិនមែនកំណត់ដោយកិច្ចព្រមព្រៀងនេះទេ។ ខ្សែព្រំដែនគឺកំណត់ដោយ JBC ដែលត្រូវចុះវាស់វែងតាមកិច្ចព្រមព្រៀងដែលមានស្រាប់»។
ការថ្លែងរបស់លោក ហ៊ុន ម៉ាណែត សំដៅលើអ្នករិះគន់ដែលថា រដ្ឋាភិបាលធ្វើឲ្យបាត់ដីទៅថៃ។
លោកបញ្ជាក់ដែរថា កិច្ចព្រមព្រៀងថ្ងៃទី២៧ ធ្នូ គឺដើម្បីបញ្ឈប់ការប្រយុទ្ធគ្នា ដើម្បីបញ្ចៀសការបាត់បង់អាយុជីវិតទាំងកងទ័ពនិងជនស៊ីវិល។
លោកទទួលស្គាល់ថា ថៃកំពុងគ្រប់គ្រងទឹកដីកម្ពុជាជាច្រើនទីតាំង ហើយលោកស្នើឲ្យប្រជាពលរដ្ឋទុកចិត្តលើរដ្ឋាភិបាលក្នុងការដោះស្រាយព្រំដែនដោយសន្តិវិធី ដោយមិនប្រើកម្លាំង។
លោកថ្លែងថា៖ «យើងត្រូវដោះស្រាយ[ដោយសន្តិវិធី] ជាជាងការបន្តវាយគ្នាយកចាញ់ឈ្នះ ពីព្រោះវាអត់មានចាញ់មានឈ្នះទេ គឺវាយទៅវាយមក។ ដូចខ្ញុំបានលើកឡើងថា មិនថានៅមជ្ឈិមបូព៌ា ឬនៅអឺរ៉ុបទេ វាយទៅវាយមកអត់ចប់ ចុងក្រោយអស់តែមនុស្ស ហើយចុងក្រោយមកចរចាជាមួយគ្នាដដែល។ ដូច្នេះ យើងត្រូវរកវិធីចរចាឲ្យអស់លទ្ធភាព»៕
