មូលហេតុដែលថៃនាំប្រព័ន្ធផ្សព្វផ្សាយនិងអ្នកសង្កេតការណ៍ ភាគច្រើនទៅតែតំបន់អូរស្មាច់
តំបន់អូរស្មាច់ក្នុងប្រទេសកម្ពុជា ដែលយោធាថៃកាន់កាប់។ The Nation Thailand
អ្នកវិភាគជឿជាក់ថា ប្រទេសថៃមានរបៀបវារៈលាក់កំបាំង ក្នុងការជ្រើសរើសយកតំបន់អូរស្មាច់សម្រាប់បង្ហាញដល់អ្នកសារព័ត៌មានក្នុងស្រុក និងអន្តរជាតិដែលមានមូលដ្ឋាននៅថៃ មន្ត្រីទូត ហើយថ្មីៗនេះគឺក្រុមអ្នកសង្កេតការណ៍អាស៊ានប្រចាំប្រទេសថៃ។
កាលពីថ្ងៃទី ៧ ខែកញ្ញា លោក Prapas Sornchaidee អគ្គមេបញ្ជាការរងកងទ័ពអាកាសភូមិន្ទថៃ បានដឹកនាំក្រុមអ្នកសារព័ត៌មានថៃ និងអន្តរជាតិ ព្រមទាំងក្រុមអ្នកសង្កេតការណ៍អាស៊ានប្រចាំប្រទេសថៃ (AOT-TH) ទៅកាន់តំបន់អូរស្មាច់ក្នុងប្រទេសកម្ពុជា ដែលបច្ចុប្បន្នត្រូវបានកងទ័ពថៃកាន់កាប់ចាប់តាំងពីការឈប់បាញ់នាខែធ្នូកន្លងទៅ។ ពួកគេបានចុះពិនិត្យទីតាំងដែលត្រូវបានរាយការណ៍ថាជាទីតាំងឆបោក។
ប៉ុន្តែ នេះមិនមែនជាលើកទីមួយទេដែលទីតាំងនេះត្រូវបានថៃជ្រើសរើសដោយប្រុងប្រយ័ត្នសម្រាប់ការចុះទស្សនាដោយអ្នកកាសែតនិងអ្នកការទូត។ កាលពីថ្ងៃទី ២ ខែកុម្ភៈ ការិយាល័យព័ត៌មានសន្តិសុខនៃកងទ័ពជើងគោកភូមិន្ទថៃ បាននាំអ្នកយកព័ត៌មានក្នុងស្រុក និងអន្តរជាតិ អនុព័ន្ធយោធាបរទេសមកពីប្រមាណ ២០ ប្រទេស រួមទាំងមន្ត្រី FBI និងនគរបាលថៃចុហទៅតំបន់នេះ ដែលជាការចុះទៅអូរស្មាច់លើកដំបូង។
បន្ទាប់មក មានដំណើរបេសកកម្មមួយទៀតដែលត្រូវបានរៀបចំឡើងសម្រាប់ប្រព័ន្ធផ្សព្វផ្សាយ រួមទាំងអ្នកសារព័ត៌មានមកពីភ្នាក់ងារ AFP ទៅកាន់ទីតាំងបោះបង់ចោល និងមានភស្តុតាងនៃការឆបោក។ ក្រុមអ្នកសារព័ត៌មានមួយក្រុមផ្សេងទៀត ក៏ត្រូវបានដឹកនាំទៅកាន់តំបន់នោះម្តងទៀតនៅដើមខែមេសា។
កម្ពុជាតែងតែបានជំទាស់ទៅនឹងការដឹកនាំជនបរទេសចូលមកក្នុងដែនដីកម្ពុជាក្រោមការកាន់កាប់របស់ខ្លួន។ ប៉ុន្តែ អ្នកវិភាគមើលឃើញពីរបៀបវារៈផ្សេងពីនេះរបស់ថៃ។
លោក ឆាំង យុគ នាយកមជ្ឈមណ្ឌលឯកសារកម្ពុជា (DC-Cam) បានលើកឡើងថា៖ «ដូចអ្វីដែលគេបានរំពឹងទុក ប្រទេសថៃចង់បង្ហាញដល់ AOT នូវទីតាំងដែលពាក់ព័ន្ធនឹងសកម្មភាពបទល្មើស ព្រោះពួកគេអាចប្រើប្រាស់ទីតាំងទាំងនោះ ដើម្បីធ្វើឱ្យការវាយប្រហាររបស់កងកម្លាំងប្រដាប់អាវុធរបស់ខ្លួនលើតំបន់ទាំងនោះមានភាពស្របច្បាប់ ដោយបន្ថែមការអះអាង ឬការចោទប្រកាន់ថាមានកងកម្លាំងយោធានៅក្នុងតំបន់នោះ»។
លោកបានកត់សម្គាល់ថា រដ្ឋាភិបាលថៃ ស្ទាក់ស្ទើរ ក្នុងការបង្ហាញតំបន់ស៊ីវិលដែលត្រូវបានបំផ្លាញ ព្រោះវានឹងធ្វើឱ្យសកម្មភាពយោធារបស់ពួកគេបាត់បង់ភាពស្របច្បាប់។ លោកបានបន្តជំរុញឱ្យទាំងកម្ពុជា និងថៃ និយាយដោយស្មោះត្រង់ និងត្រង់ទៅត្រង់មក ជាពិសេសនៅចំពោះមុខក្រុម AOT។
លោក ឆាំង យុគ បានបន្ថែមថា៖ «ជាចុងក្រោយ ប្រទេសថៃ និងកម្ពុជា ត្រូវតែអនុញ្ញាតឱ្យ AOT និងប្រព័ន្ធផ្សព្វផ្សាយអន្តរជាតិចូលមើលយ៉ាងពេញលេញទៅកាន់គ្រប់តំបន់ទាំងអស់ដែលរងផលប៉ះពាល់ដោយជម្លោះ ហើយវាជាកាតព្វកិច្ចរបស់ AOT និងប្រព័ន្ធផ្សព្វផ្សាយអន្តរជាតិ ក្នុងការចុះទៅមើលតំបន់ទាំងនោះទាំងអស់ ដើម្បីផ្តល់តម្លាភាពលើអ្វីដែលបានកើតឡើងផង និងថែមទាំងតម្លាភាពលើអ្វីដែលកំពុងបន្តកើតឡើងផងដែរ»។
លោក ឆាំង យុគ បានបន្ថែមទៀតថា៖ «ប្រទេសថៃកំពុងប្រឈមមុខនឹងការលំបាកក្នុងការកសាងហេតុផលសមស្រប ដើម្បីបន្តការកាន់កាប់ដោយយោធាលើដែនដីកម្ពុជា ជាពិសេសសហគមន៍ប្រជាពលរដ្ឋស្លូតត្រង់ ហើយដើម្បីសម្រេចគោលដៅនេះ ពួកគេកំពុងព្យាយាមលាក់បាំងរូបភាពពេញលេញនៃជម្លោះ ពីភ្នែក AOT ពោលគឺឲ្យពួកគេចូលមើលបានត្រឹមតែមួយផ្នែកប៉ុណ្ណោះដែលត្រូវបានគ្រប់គ្រងយ៉ាងតឹងរ៉ឹងដោយកងកម្លាំងសន្តិសុខថៃដែលប្រចាំការនៅតំបន់នោះ»។
ទស្សនៈស្រដៀងគ្នានេះត្រូវបានលើកឡើងដោយលោក គិន ភា នៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា។
លោកបានថ្លែងថា ប្រទេសថៃបាននិងកំពុងប្រើប្រាស់បញ្ហាឆបោកជានិទានកថារៀបរាប់សាច់រឿងលើកម្ពុជា ដើម្បីធ្វើឱ្យសកម្មភាពយោធារបស់ពួកគេមានភាពស្របច្បាប់។ ទោះបីជាប្រតិបត្តិការឆបោកធ្លាប់មាននៅក្នុងតំបន់នោះក៏ដោយ ក៏ទីតាំងនោះស្ថិតនៅក្រោមអធិបតេយ្យភាពរបស់កម្ពុជា ហើយកម្ពុជាគួរតែជាអ្នកទទួលខុសត្រូវក្នុងការប្រយុទ្ធប្រឆាំង។
លោក គិន ភា បានថ្លែងថា «ដូច្នេះ ថៃកំពុងព្យាយាមសម្រេចគោលដៅពីរក្នុងពេលតែមួយ។ ទីមួយ ពួកគេកំពុងព្យាយាមកាន់កាប់ដែនដីកម្ពុជាដោយប្រើរឿងឆបោកធ្វើជាលេស ហើយទីពីរ ពួកគេបង្ខូចកេរ្តិ៍ឈ្មោះកម្ពុជាក្នុងពេលដំណាលគ្នានឹងសាច់រឿងឆបោកនេះ»។
ដោយឈរលើគោលការណ៍សន្តិវិធី លោក គិន ភា បានជំរុញឱ្យរាជរដ្ឋាភិបាលកម្ពុជា បន្តដាក់លិខិតតវ៉ាជាផ្លូវការប្រឆាំងនឹងសកម្មភាពខុសច្បាប់ទាំងអស់របស់ថៃនៅតាមតំបន់ដែលកំពុងរងការកាន់កាប់៕
-post khmer-
