មន្ត្រីការទូតថៃបន្តព្យាយាមរារាំងកម្ពុជាកុំឲ្យនិយាយពីបញ្ហាព្រំដែននៅវេទិកាអន្តរជាតិ
(ឆ្វេង) លោក លុយ ដាវីត ឯកអគ្គរាជទូតកម្ពុជាប្រចាំប្រទេសបារាំង, (ស្ដាំ) រូបសំណាកព្រះវិស្ណុ នៅអានសេះ ត្រូវបានទាហានថៃបំផ្លាញ ហើយសាងសង់រូបព្រះពុទ្ធជំនួស។
មន្ត្រីការទូតថៃ ព្យាយាមជំរុញកុំឲ្យកម្ពុជាលើកឡើងពីបញ្ហាព្រំដែនកម្ពុជា-ថៃ នៅវេទិកាហ្វ្រង់កូហ្វូនី ខណៈដែលយោធារបស់ខ្លួនបន្តសកម្មភាពនៅលើដីជាក់ស្ដែងឥតឈប់។ ការស្នើនេះធ្វើឡើងនៅពេលដែលកម្ពុជាកំពុងត្រៀមខ្លួនធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនីលើកទី២០ (20th Francophonie Summit) នៅពាក់កណ្តាលខែវិច្ឆិកា ឆ្នាំ២០២៦ ខាងមុខនេះ។
កិច្ចប្រឹងប្រែងមួយចុងក្រោយរបស់ថៃ ធ្វើឡើងតាមរយៈឯកអគ្គរាជទូតថៃប្រចាំប្រទេសបារាំង ដោយមន្ត្រីការទូតថៃរូបនោះត្រូវបានរាយការណ៍ថា បានខ្ចីដៃភាគីទី៣ មកប្រាប់កម្ពុជាកុំឲ្យលើកឡើងពីការឈ្លានពានរបស់ពួកគេលើកម្ពុជា។ នេះបើតាមសំណេររបស់លោក លុយ ដាវីត ឯកអគ្គរាជទូតកម្ពុជា ប្រចាំប្រទេសបារាំង។
លោក លុយ ដាវីត បានលើកឡើងថា៖ «គួរឱ្យអស់សំណើចមែន! ឯកអគ្គរាជទូតផ្ទះលេខ ២ បានព្យាយាមឱ្យឯកអគ្គរដ្ឋទូតនៃប្រទេសទីបីមួយ មកបញ្ចុះបញ្ចូលខ្ញុំ កុំឱ្យលើកឡើងពីបញ្ហាជម្លោះព្រំដែនកម្ពុជា-ថៃ នៅក្នុងវេទិកាហ្វ្រង់កូហ្វូនី (Francophonie)»។
លោកបានបន្តថា៖ «ខ្ញុំបានឆ្លើយតបយ៉ាងច្បាស់ថា ប្រទេសរបស់លោកបានឈ្លានពានប្រទេសរបស់ខ្ញុំ ហើយថែមទាំងព្យាយាមបំភ្លៃការពិត ដោយប្រែក្លាយខ្មៅទៅជាស និងសទៅជាខ្មៅ។ ក្នុងនាមជាអ្នកការទូតកម្ពុជា ខ្ញុំមានកាតព្វកិច្ចការពារផលប្រយោជន៍ជាតិ ការពារការពិត និងប្រាប់សហគមន៍អន្តរជាតិឱ្យបានដឹងច្បាស់ថា តើភាគីណាជាអ្នកឈ្លានពាន និងភាគីណាជាជនរងគ្រោះ។ ដូច្នេះ គ្មានហេតុផលអ្វីដែលខ្ញុំត្រូវនៅស្ងៀមនោះទេ»។
ការព្យាយាមបិទបាំងបញ្ហាព្រំដែននៅលើឆាកអន្តរជាតិនេះ គឺជាកិច្ចប្រឹងប្រែងរបស់ថៃ ខណៈដែលយោធារបស់ពួកគេកំពុងកាន់កាប់ទឹកដីកម្ពុជាជាច្រើនទីតាំង ព្រមទាំងធ្វើសម្មភាពកែប្រែលើដីថ្មី ឬ fait accompli។
គិតចាប់ពីលោក Mongkol Surasajja ប្រធានព្រឹទ្ធសភាថៃ រហូតដល់រដ្ឋមន្ត្រីក្រសួងការបរទេស Sihasak Phuangketkeow សុទ្ធតែបានចោទប្រកាន់កម្ពុជាថា យកបញ្ហាព្រំដែនធ្វើជា «អន្តរជាតូបនីយកម្ម» ព្រមទាំងធ្លាប់បានព្រមានកម្ពុជាមិនឲ្យលើកឡើងពីបញ្ហានេះនៅវេទិកាក្រុមប្រឹក្សាសន្តិសុខអង្គការសហប្រជាជាតិទៀតផង។
យ៉ាងណាក៏ដោយ កម្ពុជាបានថ្លែងតបថា ការលើកឡើងពីស្ថានភាពព្រំដែនកម្ពុជា-ថៃ ជាពិសេសសកម្មភាពខុសច្បាប់របស់ថៃ មិនមែនជាការធ្វើអន្តរជាតូបនីយកម្មនោះទេ ហើយកម្ពុជានឹងបន្តលើកឡើងពីបញ្ហានេះប្រាប់ទៅពិភពលោក។ កម្ពុជាបញ្ជាក់ថា ប្រសិនបើមិនចង់ឲ្យកម្ពុជាលើកឡើង ភាគីថៃត្រូវបញ្ឈប់សកម្មភាពលើដីជាក់ស្ដែង ហើយបញ្ជូនក្រុមការងារ JBC មកធ្វើការវាស់វែង ខណ្ឌសីមា ឡើងវិញ៕
-Post Khmer-
