ក្រសួងវប្បធម៌រៀបចំមហោស្រពល្ខោននិយាយដើម្បីលើកស្ទួយនិងអភិរក្សតម្លៃសិល្បៈវប្បធម៌ជាតិ
រូបថតឯកសាររបស់ក្រសួងវប្បធម៌ ដែលបង្ហាញពីទម្រង់នៃល្ខោននិយាយ។
#សិល្បៈវប្បធម៌
ក្រសួងវប្បធម៌និងវិចិត្រសិល្បៈ នឹងរៀបចំមហោស្រពល្ខោននិយាយឆ្នាំ២០២៦ រយៈពេល២ថ្ងៃ ក្រោមប្រធានបទ «ចង្កឹះមួយបាច់» ចាប់ពីថ្ងៃទី១-២ ខែតុលា នៅរាជធានីភ្នំពេញ ដើម្បីថែរក្សាទម្រង់សិល្បៈរបស់កម្ពុជា។
ក្រសួងវប្បធម៌បានថ្លែងនៅក្នុងការជូនដំណឹងនាពេលថ្មីៗនេះថា៖ «ការរៀបចំព្រឹត្តិការណ៍វប្បធម៌នេះ គឺក្នុងគោលបំណងដើម្បីចូលរួមថែរក្សា លើកស្ទួយ និងអភិរក្សតម្លៃសិល្បៈវប្បធម៌ជាតិ ជាពិសេសលើកទឹកចិត្តដល់សិល្បករល្ខោននិយាយឱ្យមានលទ្ធភាពចូលរួមក្នុងសកម្មភាពផ្សព្វផ្សាយវប្បធម៌ ព្រមទាំងបានបង្ហាញនូវសមត្ថភាព ទេពកោសល្យរបស់ខ្លួនដល់មហាជនឱ្យបានស្គាល់ និងបានដឹងនូវតម្លៃនៃ សិល្បៈអរូបីមួយនេះ»។
ក្រសួងលើកទឹកចិត្តឲ្យសិល្បករ អង្គការ សមាគមសិល្បៈ មហាជនទូទាំងប្រទេសដែលមានចំណេះជំនាញល្ខោននិយាយ បានចូលរួមប្រកួតប្រជែង ដោយគោរពតាមលក្ខខណ្ឌដែលក្រសួងបានកំណត់ ដោយវគ្គជម្រុះ គឺត្រូវធ្វើឡើងតាមរយៈវីដេអូរយៈពេលចន្លោះពី ១៥ ទៅ ៣០នាទី។ ចំណែកវគ្គផ្ដាច់ព្រ័ត្រនឹងត្រូវសម្ដែងដោយផ្ទាល់ និងមានការផ្សាយផ្ទាល់លើផេកក្រសួង។
ល្ខោននិយាយគឺជាទម្រង់ល្ខោនមួយដែលជាការសម្ដែងដោយតួអង្គ ដោយការសម្ដែងនោះផ្ដោតលើតថភាពក្នុងសង្គមមួយ ក្នុងគោលបំណងលើកយកបញ្ហាមកដោះស្រាយ ឬ ក្នុងគោលបំណងអប់រំមនុស្សលើបញ្ហាណាមួយ។ នេះបើតាម សួង សុភ័ក្ត្រ ដែលបានសិក្សាអំពីល្ខោននេះ។
លោក ឈត ប៊ុនថង ប្រធានផ្នែកទំនាក់ទំនងវប្បធម៌ អប់រំ និងទេសចរណ៍នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិតត្យសភាកម្ពុជា បានថ្លែងថា ការរក្សាសិល្បៈវប្បធម៌ខ្មែរ គឺជារឿងសំខាន់ ហើយការអភិវឌ្ឍវាឲ្យមានភាពទាក់ទាញ កាន់តែសំខាន់ ព្រោះថា ការអភិរក្សតែមួយមុខដោយគ្មានការអភិវឌ្ឍឬនវានុវត្តន៍ទេនោះ វានឹងធ្វើឲ្យវប្បធម៌នោះមិនរីកចម្រើន។
លោក ឈត ប៊ុនថង៖ «តើយើងត្រូវរក្សាទម្រង់បុរាណបែបណា ហើយល្ខោននិយាយបែបច្នៃប្រឌិតនោះបែបណា។ ទី២ យើងមិនត្រូវផ្ដោតទៅលើតែរឿងចាស់ៗដដែលៗនោះទេ គឺយើងត្រូវមានរឿងថ្មីៗ ដែលមានគំនិតអប់រំនៅក្នុងសង្គម ដូចជាទាក់ទងគ្រឿងញៀន គ្រឿងស្រវឹង ការឆបោកតាមអនឡាញ ឬ ទាក់ទងរឿងសង្គ្រាម។ ដូច្នេះ យើងគួរមានរឿងថ្មី និងមានវិធីសម្ដែងថ្មី ប៉ុន្តែជាទម្រង់ល្ខោននិយាយដដែល»។
លោកលើកទឹកចិត្តឲ្យពលរដ្ឋគ្រប់គ្នាមានមោទនភាពលើឫសគល់នៃវប្បធម៌របស់ខ្លួន ហើយប្រើវាដើម្បីបង្ហាញពីអត្តសញ្ញាណរបស់វា និងពង្រឹងអំណាចទន់របស់កម្ពុជា ឬប្រើប្រាស់ក្នុងទម្រង់ដែលអាចទាក់ទាញភ្ញៀវទេសចរណ៍តាមតែអាចធ្វើបាន៕
-Phnom Penh Post-
