កម្ពុជាទាត់ចោលការអះអាងគ្មានភ័ស្តុតាងរបស់សារព័ត៌មានថៃដែលអះអាងថា កម្ពុជាបង្កើនកម្លាំងទ័ពនៅព្រំដែន
Defence minister Tea Seiha attends the recent inauguration of a win-win monument in Koh Kong province. Tea Seiha via FB
រដ្ឋមន្ត្រីការពារជាតិកម្ពុជា លោក ទៀ សីហា ច្រានចោលការអះអាងរបស់សារព័ត៌មានថៃ និងបុគ្គលមួយចំនួននៅក្នុងប្រទេសថៃដែលថ្លែងដោយគ្មានប្រភពថា កម្ពុជាបានបង្កើនកម្លាំងទ័ព និងសព្វាវុធនៅព្រំដែនដើម្បីធ្វើសង្គ្រាម។
លោក ទៀ សីហា ថ្លែងនៅលើបណ្ដាញសង្គមនៅព្រឹកថ្ងៃទី៩ ខែមិថុនានេះថា៖ «មួយរយៈនេះ ខ្ញុំបានកត់សម្គាល់ថាមានសារព័ត៌មាន និងបុគ្គលមួយចំនួននៅក្នុងប្រទេសថៃកំពុងតែព្យាយាមបញ្ចេញសារមួយដែរថា រដ្ឋមន្ត្រីក្រសួងការពារជាតិកម្ពុជា បដិសេធការប្រើប្រាស់យន្តការទ្វេភាគី ព្រមទាំងកំពុងបង្កើនទ័ព និងសព្វាវុធ ដើម្បីបង្កសង្គ្រាមក្នុងពេលឆាប់ៗនេះ»។
លោករដ្ឋមន្ត្រីការពារជាតិបន្តថា៖ «ខ្ញុំសូមបញ្ជាក់អំពីចំណុចខាងលើថា កម្ពុជានៅតែប្រកាន់ខ្ជាប់ជំហរដោះស្រាយបញ្ហាដោយសន្តិវិធី ដោយគោរពតាមសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាព នៅទីក្រុងកូឡាឡាំពួ កាលពីថ្ងៃទី២៦ ខែតុលា ឆ្នាំ២០២៥, និងសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) ថ្ងៃទី២៧ ខែធ្នូ ឆ្នាំ២០២៥ និងយន្តការនានាដែលមានស្រាប់»។
លោកបន្តទៀតថា៖ «កម្ពុជាសង្ឃឹមថា ភាគីទាំងពីរនឹងអាចដោះស្រាយបញ្ហា ដោយសន្តិវិធី និងបញ្ចៀសឱ្យបានជាដាច់ខាត់នូវការប្រើប្រាស់កម្លាំងយោធា»។
កាលពីប៉ុន្មានថ្ងៃមុននេះ ទូរទស្សន៍ថៃមួយបានសម្ភាសជាមួយមន្ត្រីយោធាចូលនិវត្តន៍ និងមន្ត្រីព័ត៌មានយោធាថៃ ដោយពួកគេបានអះអាងដោយយោងលើព័ត៌មានក្នុងស្រុករបស់ខ្លួនថា កម្ពុជាបានបង្កើនកម្លាំងទ័ព ហើយថាថៃ បានត្រៀមខ្លួនរួចរាល់ហើយជាមួយនឹងសេះដែក ឬរថក្រោះ៕
-Phnom Penh Post-
