(Cambodia PR Team) ទាក់ទងនឹងជំហររបស់រាជរដ្ឋាភិបាលចំពោះទឹកដី ដែលថៃដណ្តើមយកដោយខុសច្បាប់ ថ្ងៃទី១០ ខែឧសភា ឆ្នាំ ២០២៦

(Cambodia PR Team) ទាក់ទងនឹងជំហររបស់រាជរដ្ឋាភិបាលចំពោះទឹកដី ដែលថៃដណ្តើមយកដោយខុសច្បាប់ ថ្ងៃទី១០ ខែឧសភា ឆ្នាំ ២០២៦

ការឆ្លើយតបរបស់ក្រុមការងារសាធារណមតិកម្ពុជា (Cambodia PR Team)
ទាក់ទងនឹងជំហររបស់រាជរដ្ឋាភិបាលចំពោះទឹកដី ដែលថៃដណ្តើមយកដោយខុសច្បាប់
ថ្ងៃទី១០ ខែឧសភា ឆ្នាំ ២០២៦

សំណួរទី១៖ តើការដែលថៃស្នើសុំស្តារទំនាក់ទំនងឡើងវិញ មានន័យថាកម្ពុជាបានបោះបង់បញ្ហាទឹកដីដូចដែលក្រុមប្រឆាំងចោទប្រកាន់ឬយ៉ាងណា?

ចម្លើយ៖ ការដែលថៃស្នើសុំស្តារទំនាក់ទំនងឡើងវិញ មិនមែនមានន័យថាកម្ពុជាបានបោះបង់បញ្ហាទឹកដីដូចដែលក្រុមប្រឆាំងចោទប្រកាន់នោះទេ។ ការស្តារទំនាក់ទំនងការទូត និងការបន្តកិច្ចសន្ទនា គឺជាយន្តការសម្រាប់បង្កើតបរិយាកាសអំណោយផលក្នុងការដោះស្រាយបញ្ហាដែលនៅសេសសល់ រួមទាំងបញ្ហាព្រំដែន និងអធិបតេយ្យភាពផងដែរ។ កម្ពុជាមិនដែលយល់ព្រមបោះបង់ ឬមើលរំលងបញ្ហាទឹកដីនោះឡើយ។ ផ្ទុយទៅវិញ កម្ពុជាបានបញ្ជាក់ជាថ្មីថា ការដោះស្រាយគ្រប់បញ្ហាត្រូវធ្វើឡើងតាមច្បាប់អន្តរជាតិ យន្តការទ្វេភាគីដែលមានស្រាប់ និងការគោរពអធិបតេយ្យភាពរបស់គ្នាទៅវិញទៅមក។ ការរក្សាទំនាក់ទំនងល្អ មិនមែនជាការភ្លេចបញ្ហាទឹកដីទេ ប៉ុន្តែជាវិធីសាស្ត្រដ៏មានប្រសិទ្ធភាពបំផុតដើម្បីឈានទៅរកដំណោះស្រាយយូរអង្វែង។

សំណួរទី២៖ តើរាជរដ្ឋាភិបាលកម្ពុជាមានជំហរយ៉ាងដូចម្តេច ចំពោះទឹកដីដែលថៃបានដណ្តើមយកដោយខុសច្បាប់?

ចម្លើយ៖ រាជរដ្ឋាភិបាលកម្ពុជាមានជំហរច្បាស់លាស់ថា បញ្ហាទឹកដី និងអធិបតេយ្យភាពជាតិ គឺជាបញ្ហាគោលដែលមិនអាចបំភ្លេច មិនអាចបោះបង់ និងមិនអាចយកទៅដោះដូរជាមួយផលប្រយោជន៍នយោបាយ ឬការស្តារទំនាក់ទំនងការទូតណាមួយបានឡើយ។ កម្ពុជាមិនទទួលស្គាល់ការផ្លាស់ប្តូរស្ថានភាពលើដីជាក់ស្តែងដែលកើតឡើងដោយឯកតោភាគីនោះទេ ហើយបន្តប្រកាន់ខ្ជាប់ការទាមទារឱ្យមានការគោរពព្រំដែនអន្តរជាតិ សន្ធិសញ្ញា និងឯកសារគតិយុត្តដែលមានស្រាប់។ ជំហររបស់រាជរដ្ឋាភិបាលគឺបន្តការពារបូរណភាពទឹកដីដោយអត់ធ្មត់ ប៉ុន្តែម៉ឺងម៉ាត់ តាមរយៈច្បាប់អន្តរជាតិ និងយន្តការសន្តិវិធី ដើម្បីធានាថាផលប្រយោជន៍ជាតិ និងអធិបតេយ្យភាពរបស់កម្ពុជា ត្រូវបានការពារយ៉ាងពេញលេញ។

សំណួរទី៣៖ តើរាជរដ្ឋាភិបាលមានវិធានការអ្វីខ្លះដើម្បីធានាថាបញ្ហាទឹកដីមិនត្រូវបានមើលរំលង?

ចម្លើយ៖ រាជរដ្ឋាភិបាលកម្ពុជាបានបន្តប្រើប្រាស់យន្តការផ្លូវការទាំងអស់ ដូចជា JBC, GBC និង RBC សម្រាប់ដោះស្រាយបញ្ហាព្រំដែន និងការពារផលប្រយោជន៍ជាតិ។ ទន្ទឹមនឹងនេះ កម្ពុជាក៏បានអំពាវនាវឱ្យអនុវត្តពេញលេញនូវកិច្ចព្រមព្រៀង និងសេចក្តីថ្លែងការណ៍រួមដែលមានស្រាប់ ដើម្បីធានាការគោរពអធិបតេយ្យភាព និងបូរណភាពទឹកដី។ លើសពីនេះ កម្ពុជាក៏ត្រៀមប្រើយន្តការច្បាប់អន្តរជាតិ នៅពេលចាំបាច់ ដើម្បីធានាថាការដោះស្រាយបញ្ហានេះធ្វើឡើងដោយយុត្តិធម៌ តម្លាភាព និងមានការទទួលស្គាល់ពីសហគមន៍អន្តរជាតិ៕