កម្ពុជា ចាប់ផ្តើមយន្តការសម្របសម្រួលដោយបង្ខំក្រោមនីតិសមុទ្រ UNCLOS បន្ទាប់ពីថៃលុប MoU ឯកតោភាគី
លោក ប្រាក់ សុខុន រដ្ឋមន្ត្រីក្រសួងការបរទេស បានប្រកាសនៅថ្ងៃនេះថា ប្រទេសកម្ពុជានឹងយន្ដការផ្សះផ្សាដោយចាប់បង្ខំជាមួយប្រទេសថៃ ក្រោមអនុសញ្ញាអង្គការសហប្រជាជាតិស្តីពីច្បាប់សមុទ្រ។ រូបថត សហការី
#ព័ត៌មានជាតិ
ភ្នំពេញ៖ កម្ពុជាបានប្រកាសនឹងចាប់ផ្តើមយន្តការសម្របសម្រួលដោយបង្ខំជាមួយថៃក្រោមអនុសញ្ញាសហប្រជាជាតិស្តីពីច្បាប់សមុទ្រ (UNCLOS) បន្ទាប់ពីរដ្ឋាភិបាលថៃសម្រេចបញ្ចប់ដោយឯកតោភាគីលើកិច្ចព្រមព្រៀងសំខាន់មួយពាក់ព័ន្ធនឹងការទាមទារតំបន់ដែនសមុទ្រត្រួតគ្នា។
នេះបើយោងតាមសេចក្តីថ្លែងការណ៍របស់រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោក ប្រាក់ សុខុន នៅថ្ងៃអង្គារទី ៥ ខែឧសភានេះ។
លោក ប្រាក់ សុខុន បានថ្លែងថា៖ «ថ្ងៃនេះ បន្ទាប់ពីការលុបចោលជាឯកតោភាគីរបស់ប្រទេសថៃលើ MoU-2001 ប្រទេសកម្ពុជាបានប្រកាសថា កម្ពុជានឹងចាប់ផ្តើមយកជម្រើសការផ្សះផ្សាដោយចាំបង្ខំជាមួយប្រទេសថៃ ក្រោមអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS)»។
តាមសេចក្តីថ្លែងការណ៍ផ្លូវការរបស់ក្រសួង កម្ពុជា «គ្មានជម្រើសផ្សេងទៀតឡើយ» លើកលែងតែបើកដំណើរការយន្តការដោះស្រាយវិវាទក្រោម UNCLOS បន្ទាប់ពីគណៈរដ្ឋមន្ត្រីថៃបានអនុម័តសេចក្តីសម្រេចបញ្ចប់អនុស្សរណៈយោគយល់ឆ្នាំ២០០១ (MoU) ដែលជាក្របខណ្ឌទ្វេភាគីតែមួយសម្រាប់ចរចាព្រំដែនសមុទ្ររវាងប្រទេសទាំងពីរ។
លោក ប្រាក់ សុខុន បានបញ្ជាក់ថា៖ «អនុស្សរណៈយោគយល់ឆ្នាំ២០០១ គឺជាក្របខណ្ឌទ្វេភាគីតែមួយរវាងប្រទេសទាំងពីរ សម្រាប់ដោះស្រាយការទាមទារតំបន់ដែនសមុទ្រត្រួតគ្នា និងសម្រេចព្រំដែនសមុទ្រដោយសន្តិវិធី និងអនុលោមតាមច្បាប់អន្តរជាតិ»។
លោកបានពិពណ៌នាការដកខ្លួនរបស់ថៃថា ជាជំហានមួយដែលផុតចេញពីស្មារតីនៃកិច្ចសហប្រតិបត្តិការ និងចេតនានយោបាយ ដែលធ្លាប់អនុញ្ញាតឱ្យប្រទេសទាំងពីរបង្កើតក្របខណ្ឌសម្រាប់ដោះស្រាយវិវាទដោយសន្តិវិធី។
លោកប្រាក់ សុខុន បានថ្លែងថា កម្ពុជាបានបង្ហាញការសោកស្តាយយ៉ាងជ្រាលជ្រៅចំពោះសេចក្តីសម្រេចនេះ និងបានព្រមានថា ការលុបចោល MoU អាចប៉ះពាល់ដល់យន្តការដែលធ្លាប់ជាវេទិកាសម្រាប់ការចរចាពាក់ព័ន្ធតំបន់ទឹកដីមានវិវាទនៅឈូងសមុទ្រថៃ។
ជាការឆ្លើយតប កម្ពុជានឹងប្រើប្រាស់យន្តការសម្របសម្រួលដោយបង្ខំក្រោមនីតិសមុទ្រ UNCLOS ជាវិធីសាស្ត្រផ្នែកច្បាប់មួយសម្រាប់ដោះស្រាយវិវាទ នៅពេលការចរចាទ្វេភាគីមិនទទួលបានលទ្ធផល។ យន្តការនេះរួមមានគណៈកម្មការឯករាជ្យមួយ ដែលធ្វើការពិនិត្យវិវាទ និងផ្តល់អនុសាសន៍មិនមានកាតព្វកិច្ចច្បាប់ដល់ភាគីទាំងពីរ។
ទោះបីជាក្របខណ្ឌ MoU ត្រូវបានបញ្ចប់ កម្ពុជាបានបញ្ជាក់ថា សិទ្ធិស្របច្បាប់របស់ខ្លួនលើតំបន់សមុទ្រមិនត្រូវបានប៉ះពាល់ឡើយ។
លោករដ្ឋមន្ដ្រីក្រសួងការបរទេស បានបញ្ជាក់ថា៖ «ការបញ្ចប់អនុស្សរណៈយោគយល់ឆ្នាំ២០០១ មិនប៉ះពាល់ដល់សិទ្ធិស្របច្បាប់របស់កម្ពុជាលើតំបន់សមុទ្ររបស់ខ្លួនឡើយ»។
លោកបានបញ្ជាក់ឡើងវិញពីការប្តេជ្ញារបស់កម្ពុជា ក្នុងការដោះស្រាយវិវាទដោយសន្តិវិធី និងគោរពតាមច្បាប់អន្តរជាតិ។
ការអភិវឌ្ឍន៍ថ្មីនេះបង្ហាញពីការផ្លាស់ប្តូរពីការចរចាទ្វេភាគី ទៅរកដំណើរការផ្នែកច្បាប់អន្តរជាតិ ដែលអាចនឹងប៉ះពាល់ដល់ទិសដៅនាពេលអនាគតនៃការចរចាព្រំដែនសមុទ្ររវាងកម្ពុជា និងថៃ៕
-Phnom Penh Post-
