កម្ពុជាងាកទៅរកពិភពលោកតាមរយៈមធ្យោបាយផ្លូវច្បាប់ ក្រោមសម្ពាធយោធាឈ្លានពានរបស់ថៃ
លោក ប្រាក់ សុខុន រដ្ឋមន្ត្រីក្រសួងការបរទេស និងលោក ខូយ រីដា អភិបាលខេត្តពោធិ៍សាត់ បានពន្យល់ថា ថៃកំពុងគ្រប់គ្រងទឹកដីកម្ពុជាយ៉ាងជ្រៅក្នុងចម្ងាយប្រហែល ៨០០ ម៉ែត្រពីចំណុចព្រំដែន នៅតំបន់ថ្មដា ក្នុងខេត្តពោធិ៍សាត់ កាលពីថ្ងៃទី ២៧ ខែមីនា។ រូបថត ហុង រស្មី
#ព័ត៌មានជាតិ
ខេត្ដពោធិ៍សាត់៖ រដ្ឋមន្ដ្រីក្រសួងការបរទេសកម្ពុជា បានលើកឡើងថា កម្ពុជាបង្ហាញពិភពលោកចំពោះមធ្យោបាយ ដោះស្រាយវិវាទព្រំដែនជាមួយប្រទេសថៃតាមផ្លូវច្បាប់ និងការទូត ខណៈថៃសម្អាងលើអំណាចយោធា។
ថ្លែងក្នុងអំឡុងពេលជួបសួរសុខទុក្ខពលរដ្ឋភៀសសឹកនៅតំបន់ថ្មដា ខេត្តពោធិ៍សាត់ នៅថ្ងៃទី២៧ ខែមីនា ឆ្នាំ២០២៦ រដ្ឋមន្ដ្រីក្រសួងការបរទេស និងសហប្រតិបត្ដិការអន្ដរជាតិ លោក ប្រាក់ សុខុន បានថ្លែងថា កម្ពុជានៅតែប្តេជ្ញាចិត្តដោះស្រាយដោយសន្តិវិធី ។
លោកបានថ្លែងថា៖ «យើងធ្វើទៅតាមយន្ដការផ្លូវច្បាប់ទាំងអស់ដែលមាន។ ប៉ុន្ដែពិបាកនិយាយគ្នាណាស់ និយាយគ្នាជាមួយអ្នកមានអំណាច កាំភ្លើង មានអំណាចយោធា មានអំណាចអាវុធនេះ គឺគេមិនចង់ស្ដាប់ទេ»។
លោករដ្ឋមន្ត្រីក៏បានដឹកនាំគណៈប្រតិភូអគ្គរាជទូត/រដ្ឋទូត តំណាងអង្គទូតបរទេស និងតំណាងអង្គការអន្ដរជាតិជាង២០ ប្រទេស ទៅពិនិត្យអំពីសកម្មភាពនៃការឈ្លានពានរបស់យោធាថៃលើដែនអធិប្បតេយ្យភាពដោយព័ទ្ធបន្លាលួស ទូកុងតឺន័រ និងដោតទង់ជាតិថៃលើទឹកដីកម្ពុជាជម្រៅ ៨០០ម៉ែត្រ។
បើទោះបីជាមានការអភិវឌ្ឍន៍ទាំងនេះក៏ដោយ លោក សុខុន បានបញ្ជាក់ឡើងវិញថា កម្ពុជាមិនជ្រើសរើសជម្រើសផ្នែកយោធានោះទេ ដោយបានបញ្ជាក់ពីគោលជំហររយៈពេលវែងរបស់រាជរដ្ឋាភិបាល ដែលមានមូលដ្ឋានលើបទពិសោធន៍ឈឺចាប់ពីសង្គ្រាមជាច្រើនទសវត្សរ៍កន្លងមក។
លោកបានថ្លែងថា៖ «កម្ពុជាស្រឡាញ់សន្ដិភាព។ ប្រជាជនយើងបានរងទុក្ខពីសង្គ្រាមគ្រប់គ្រាន់ហើយ។ សន្ដិភាព និងការអភិវឌ្ឍផ្សារភ្ជាប់គ្នា»។
នៅពេលដូចគ្នានេះ លោកបានបញ្ជាក់ថា កម្ពុជានឹងបន្តការពារបូរណភាពទឹកដីរបស់ខ្លួន តាមរយៈផ្លូវការទូត និងច្បាប់អន្ដរជាតិជាចម្បង។
លោកបានយោងទៅលើអនុសញ្ញា និងផែនទីប្រវត្តិសាស្ត្រដែលកំណត់ក្នុងអំឡុងពេលវាស់វែងព្រំដែនបារាំង-សៀម នៅដើមសតវត្សទី២០ ជាមូលដ្ឋានផ្លូវច្បាប់សម្រាប់ការអះអាងរបស់កម្ពុជា។
លោកបានថ្លែងថា៖ «យើងយកផ្លូវច្បាប់ សើរើសឯកសារចាស់ សើររើសិទ្ធិសញ្ញា អនុសញ្ញា និងផែនទីដែលគូសដោយគណកម្មការចម្រុះបារាំង-សៀម ក្នុងឆ្នាំ១៩០៨-១៩០៩ ជាខ្សែបន្ទាត់អន្ដរជាតិ»។
យ៉ាងណាក៏ដោយ លោកបានបង្ហាញការខកចិត្តថា យន្ដការទាំងនេះមិនទាន់អាចនាំឱ្យមានការរីកចម្រើនលើដីពិតបានឡើយ ដោយចោទថា ភាគីថៃប្រើកម្លាំងយោធាកាន់កាប់ជំនួសការចូលរួមចរចាតាមយន្ដការទ្វេភាគី។
យោងតាមមន្ត្រីកម្ពុជា យោធាថៃបានបន្តឈរជើង និងកាន់កាប់តំបន់មួយចំនួនចាប់តាំងពីការវាយប្រហារឈ្លានពានដ៏ឃោរឃៅនៅចុងឆ្នាំ២០២៥ ហើយបន្តពង្រឹងវត្តមានរបស់ខ្លួនតាមរយៈការសាងសង់របាំង និងហេដ្ឋារចនាសម្ព័ន្ធផ្សេងៗ។
ស្ថានភាពនេះក៏បានប៉ះពាល់យ៉ាងខ្លាំងដល់ប្រជាពលរដ្ឋផងដែរ។ អភិបាលខេត្តពោធិ៍សាត់ លោក ខូយ រីដា បានឲ្យដឹងថា មានពលរដ្ឋជាង៦០០គ្រួសារ ត្រូវបានជម្លៀសចេញពីលំនៅឋាន ខណៈបច្ចុប្បន្នមានគ្រួសារមួយចំនួនកំពុងស្នាក់នៅវិទ្យាល័យ ហ៊ុន សែន ប្រម៉ោយ ដោយមិនអាចត្រឡប់ទៅផ្ទះវិញបាន។
លោក សុខុន បានថ្លែងថា៖ «បងប្អូនមិនអាចប្រកបមុខរបររបស់ខ្លួនដូចធម្មតាបានទេ» ហើយបានបន្ថែមថា រាជរដ្ឋាភិបាលកំពុងផ្ដល់ជម្រក សុខាភិបាល និងជំនួយចាំបាច់ផ្សេងៗដល់ពលរដ្ឋរងគ្រោះ។
លោកបានបន្ថែមថា កម្ពុជានឹងបន្តស្វែងរកការគាំទ្រពីមិត្តនៅក្នុងតំបន់ និងលើឆាកអន្ដរជាតិ ដើម្បីពង្រឹងទីតាំងរបស់ខ្លួន។
លោកបានថ្លែងថា៖ «យើងនៅបន្ដតស៊ូ យើងនៅបន្ដស្វែងរកការគាំទ្រពីមិត្ដនៅក្នុងតំបន់ និងលើឆាកអន្ដរជាតិ»។
ដំណើរទស្សនកិច្ចរបស់អង្គទូតបរទេសនេះ គឺជាផ្នែកមួយនៃយុទ្ធសាស្ត្ររបស់រាជរដ្ឋាភិបាលក្នុងការនាំបញ្ហានេះទៅកាន់អន្ដរជាតិ និងបង្ហាញ «ការពិតលើដី» ដល់សហគមន៍អន្ដរជាតិ ខណៈកម្ពុជាបន្តជំរុញដំណោះស្រាយតាមផ្លូវច្បាប់ និងការទូត ជំនួសការបង្កភាពតានតឹង។
ទោះបីជាទទួលស្គាល់ថា ដំណើរការនេះអាចចំណាយពេលយូរក៏ដោយ លោក សុខុន បានបញ្ជាក់ថា កម្ពុជានឹងបន្តការខិតខំដោយមិនចុះចាញ់។
លោកបានបន្ថែមថា៖ «សម្ដេចនាយករដ្ឋមន្ដ្រីរបស់យើងធ្វើយុទ្ធនាការទៅដល់អឺរ៉ុប អាមេរិក និងគ្រប់ទីកន្លែងដែលអាចទៅបាន ដើម្បីប្រាប់ការពិតដល់ពិភពលោក — មិនអាចបិទមាត់យើងបានទេរឿងនេះ។ វាអាចត្រូវការពេលវេលា ពីព្រោះនៅលើលោកនេះ មិនសូវមានយុត្តិធម៌។ អ្នកដែលមានកម្លាំងយោធាខ្លាំង តែងតែទៅចង់ស្ដាប់អ្នកខ្សោយជាង»។
លោកបានបន្តថា កម្ពុជានៅតែអំពាវនាវឱ្យគោរពគោលការណ៍អាស៊ាន រួមមានការគោរពគ្នាទៅវិញទៅមក ស្មើភាព អធិប្បតេយ្យភាព និងបូរណភាពទឹកដី។
លោក សុខុន បានថ្លែងថា៖ «យើងសុំតែប៉ុណ្ណោះ។ បើអ្នកគោរពច្បាប់ដូចយើង អ្នកមិនត្រូវខ្លាចក្នុងការចូលមកចរចា និងនិយាយគ្នាតាមផ្លូវច្បាប់ទេ»។
ក្នុងការនិយាយទៅកាន់ពលរដ្ឋភៀសសឹកពីតំបន់ថ្មដា ដែលកំពុងស្នាក់នៅភូមិប្រម៉ោយ លោក សុខុន បានបញ្ជាក់ថា រាជរដ្ឋាភិបាលនៅតែប្តេជ្ញាចិត្តធានាឲ្យពួកគេអាចត្រឡប់ទៅរស់នៅវិញដោយសុវត្ថិភាព។
លោកបានថ្លែងថា៖ «រាជរដ្ឋាភិបាលកំពុងតស៊ូផ្លូវទូត និងផ្លូវច្បាប់ ដើម្បីទាមទារយកមកវិញនូវដីធ្លី និងផ្ទះសម្បែងរបស់បងប្អូន ដើម្បីឱ្យបងប្អូនអាចរស់នៅទីនោះវិញដោយសុខសុវត្ថិភាពដូចដើមវិញ»។
-Phnom Penh Post-
