ភ្នំភ្លើង Anak Krakatau នៅឥណ្ឌូណេស៉ី ផ្ទុះពីរលើកក្នុងថ្ងៃសុក្រនេះ ជះកម្ទេចផេះនិងផ្សែងឡើងលើអាកាសកម្ពស់៣គីឡូម៉ែត្រ
ភ្នំភ្លើង Anak Krakatau នៅឥណ្ឌូណេស៉ី ផ្ទុះពីរលើកក្នុងថ្ងៃសុក្រនេះ ជះកម្ទេចផេះនិងផ្សែងឡើងលើអាកាសកម្ពស់៣គីឡូម៉ែត្រ
(ហ្សាការតា)៖ ភ្នំភ្លើង អាណាក ក្រាកាទូ (Anak Krakatau) នៃប្រទេសឥណ្ឌូណេស៉ី បានផ្ទុះចំនួន២លើកក្នុងចន្លោះពេលត្រឹមតែ១ម៉ោងប៉ុណ្ណោះ នាថ្ងៃសុក្រនេះ ដោយវាបានបញ្ចេញផេះផង់និងផ្សែងឡើងទៅដល់កម្ពស់៣,០០០ម៉ែត្រលើផ្ទៃអាកាស។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី៩ ខែមិថុនា ឆ្នាំ២០២៣។
ក្នុងថ្ងៃសុក្រនេះ ភ្នំភ្លើងខាងលើបានផ្ទុះមួយលើកដំបូង កាលពីវេលាម៉ោង៧៖៤៦នាទីព្រឹក និងមួយលើកទៀតនៅរយៈពេល៦២នាទីក្រោយមក។ ដោយមានកម្ពស់ត្រឹម១៥៧ម៉ែត្រ ភ្នំភ្លើង Anak Krakatau ស្ថិតនៅច្រកសមុទ្រស៊ុនដា (Sunda Strait) រវាងកោះជ្វានិងកោះស៊ូម៉ាត្រានៃប្រទេសឥណ្ឌូណេស៉ី។ ក្នុងឆ្នាំ២០២៣នេះ វាបានផ្ទុះឡើងសរុបជាង១០លើកហើយ គិតចាប់តាំងពីខែមីនាមក ខណៈកន្លែងដែលមានមនុស្សរស់នៅកៀកនឹងភ្នំភ្លើងនេះបំផុត គឺចម្ងាយ១៦.៥គីឡូម៉ែត្រ។
អាជ្ញាធរបានចេញការប្រកាសអាសន្នកម្រិតខ្ពស់បំផុតទី២ សម្រាប់ភ្នំភ្លើង Anak Krakatau។ ស្របពេលមិនមានការតម្រូវឱ្យជម្លៀសមនុស្សក៏ដោយក្តី ប្រជាជនក្នុងតំបន់និងភ្ញៀវទេសចរ ត្រូវបានណែនាំកុំឱ្យធ្វើដំណើរទៅក្បែរភ្នំភ្លើងឱ្យសោះ។ គិតត្រឹមថ្ងៃសុក្រនេះ ភ្នំភ្លើងសរុបចំនួន៤ របស់ឥណ្ឌូណេស៉ី ត្រូវបានដាក់ឱ្យស្ថិតក្រោមការប្រកាសអាសន្នកម្រិតខ្ពស់បំផុតទី២ រួមមាន Anak Krakatau ផ្ទាល់ ហើយនិងភ្នំភ្លើង មេរ៉ាពី (Merapi) នៅខេត្តជ្វាកណ្តាល, សេមេរូ (Semeru) នៅខេត្តជ្វាខាងកើត និង ការ៉ានហ្គេតាង (Karangetang) នៅខេត្តស៊ូឡាវេស៉ីខាងជើង។
គួរបញ្ជាក់ថា បន្ទុះមួយកាលពីខែធ្នូ ឆ្នាំ២០១៨ របស់ភ្នំភ្លើង Anak Krakatau បានបង្កឱ្យជារលកស៊ូណាមិ វាយប្រហារលើខេត្តជ្វាខាងលិច និងខេត្តឡាពូងរបស់ប្រទេសឥណ្ឌូណេស៉ី ដែលបានផ្តាច់ជីវិតមនុស្សយ៉ាងហោច៤៣០នាក់៕
