ព្រឹកនេះសម្តេចតេជោ ហ៊ុន សែន អញ្ជើញប្រគល់សញ្ញាបត្រ ជូននិស្សិតពេទ្យជាង ១ពាន់នាក់
ព្រឹកនេះសម្តេចតេជោ ហ៊ុន សែន អញ្ជើញប្រគល់សញ្ញាបត្រ ជូននិស្សិតពេទ្យជាង ១ពាន់នាក់
(ភ្នំពេញ)៖ នៅព្រឹកថ្ងៃព្រហស្បតិ៍ ១៤រោច ខែពិសាខ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៨ ខែឧសភា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នឹងអញ្ជើញជាអធិបតីក្នុងពិធីប្រគល់សញ្ញាបត្រដល់និស្សិតពេទ្យបញ្ចប់ការសិក្សាពីសាកលវិទ្យាល័យវិទ្យាសាស្ត្រសុខាភិបាលចំនួន ១,៣៩៦នាក់។ ពិធីនេះ នឹងធ្វើឡើងនៅសណ្ឋាគារសុខាភ្នំពេញ។
សាកលវិទ្យាល័យវិទ្យាសាស្ត្រសុខាភិបាល គឺជាគ្រឹះស្ថានអប់រំមួយរបស់រដ្ឋបណ្តុះបណ្តាលចំណេះជំនាញផ្នែកសុខាភិបាល។ សាកលវិទ្យាល័យវិទ្យាសាស្រ្តសុខាភិបាលទទួលបានការទទួលស្គាល់គុណភាពពេញសិទ្ធិរយៈពេល០៥ឆ្នាំ ពីឆ្នាំ២០១៩ ដល់ឆ្នាំ២០២៣ ពីគណៈកម្មការទទួលស្គាល់គុណភាពអប់រំនៅកម្ពុជា។
លើសពីនេះ សាកលវិទ្យាល័យបានទទួលចំណាត់ថ្នាក់ ៥១-១០០ ក្នុងចំណោមសាកលវិទ្យាល័យនៅលើពិភពលោក សម្រាប់ការជ្រើសរើសដោយ The World’s Universities With Real Impact (WURI) ក្នុងឆ្នាំ២០២២ ជាសាកលវិទ្យាល័យមួយ ប្រកបដោយភាពច្នៃប្រឌិត លើការផ្លាស់ប្តូរនិស្សិត និងកិច្ចសហប្រតិបត្តិការ (Real Impact in Student Mobility and Openness)។ បច្ចុប្បន្ននេះ សាកលវិទ្យាល័យវិទ្យាសាស្រ្តសុខាភិបាលបាន និងកំពុងដើរតួរយ៉ាងសំខាន់ក្នុងការជួយជ្រោមជ្រែងដល់ក្រសួងសុខាភិបាលក្នុងការធ្វើទំនើបកម្មបណ្តុះបណ្តាលវិស័យសុខាភិបាល ដោយឈរលើសមត្ថភាពស្នូលជាគោល ដើម្បីធ្វើយ៉ាងណាធានាឱ្យបានថា អនាគតនៃធនធានមនុស្សសុខាភិបាលនៅកម្ពុជា ត្រូវបានបណ្តុះបណ្តាលស្របតាមស្តង់ដារជាតិ តំបន់ និងអន្តរជាតិ។
លោកបណ្ឌិតសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានឱ្យដឹងថា គិតចាប់ពីឆ្នាំ២០០១ ដែលសាកលវិទ្យាល័យបានក្លាយជាគ្រឹះស្ថានសាធារណរដ្ឋរហូតមកដល់បច្ចុប្បន្ន សាកលវិទ្យាល័យបានសាងសង់បន្ថែមអគារសិក្សាចំនួន ០៤អគារ មានចំនួន ៨០បន្ទប់ និងសហសាលសម្រាប់និស្សិតសិក្សា។ សាកលវិទ្យាល័យ ក៏កំពុងសាងសង់អគារបន្ថែម ចំនួន ០១ នៅទីតាំងទី១ របស់សាកលវិទ្យាល័យ កម្ពស់ ៨ជាន់ មានចំនួន ៥១បន្ទប់ និងក្នុងពេលឆាប់ៗខាងមុខនេះ គ្រោងរៀបចំសាងសង់អគារសិក្សា ១បន្ថែមទៀត ដែលមានកម្ពស់ ៨ជាន់ នៅទីតាំងទី២ របស់សាកលវិទ្យាល័យ។
ក្រៅពីការងារបណ្តុះបណ្តាល និងស្រាវជ្រាវ សាកលវិទ្យាល័យបានពង្រីកការផ្តល់សេវាសុខភាពជូនប្រជាជនក្នុងសហគមន៍ផងដែរ ជាពិសេសសាកលវិទ្យាល័យបានសហការជាមួយក្រុមគ្រូពេទ្យយុវជនស្ម័គ្រចិត្ត សម្តេចតេជោ ក្រុមគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ក្នុងការចុះផ្តល់សេវាព្យាបាលជំងឺ ដោយពុំគិតថ្លៃជូនប្រជាពលរដ្ឋនៅតាមសហគមន៍។
លោករដ្ឋមន្ត្រី ម៉ម ប៊ុនហេង បានឱ្យដឹងថា ក្នុងឆ្នាំសិក្សា២០២២-២០២៣ នេះ សាកលវិទ្យាល័យវិទ្យាសាស្រ្តសុខាភិបាលមាន ក្រុមប្រឹក្សាភិបាល គណៈគ្រប់គ្រង មន្រ្តីរាជការ បុគ្គលិក សាស្រ្តាចារ្យ ចំនួន ២,៣៨៤នាក់ និងមាននិស្សិតកំពុងសិក្សាចំនួន ៥,៩៥៣នាក់ (ស្រីចំនួន ៣,៤០១នាក់) ដែលក្នុងនោះ និស្សិតចំនួន ៤៤៤នាក់ (ស្រ្តីចំនួន ២៦៩នាក់) បានទទួលអាហារូបករណ៍បង់ថ្លៃជំនួសពីរាជរដ្ឋាភិបាល និងនិស្សិតវេជ្ជបណ្ឌិតឯកទេស ចំនួន ៨៦នាក់ (ស្រី្តចំនួន ២៨នាក់) បានទទួលអាហារូបករណ៍ផ្ទាល់ពី សម្តេចតេជោ និងសម្តេចកិត្តិព្រឹទ្ធបណ្ឌិត។
ចាប់តាំងពីឆ្នាំ១៩៨០ មកដល់បច្ចុប្បន្ននេះ និស្សិតដែលបានបញ្ចប់ការសិក្សាដោយជោគជ័យពីសាកលវិទ្យាល័យវិទ្យាសាស្រ្តសុខាភិបាលមានចំនួន ៣១,២០២នាក់។ គិតមកដល់ពេលបច្ចុប្បន្ននេះ សាកលវិទ្យាល័យបានបញ្ជូននិស្សិតចំនួន ១,២០៧នាក់ ទៅធ្វើកម្មសិក្សា និងបន្តសិក្សាថ្នាក់បរិញ្ញាបត្រជាន់ខ្ពស់ ថ្នាក់វេជ្ជបណ្ឌិតឯកទេស និងបណ្ឌិតនៅក្រៅប្រទេសដូចជា នៅបារាំង បែលហ្សិក អាមេរិក អូស្ត្រាលី ជប៉ុន និងកូរ៉េផងដែរ។
ទន្ទឹមនឹងនោះដែរសាកលវិទ្យាល័យក៏បានទទួលនិសិ្សតបរទេសជិត ១,០០០នាក់ មកធើ្វកម្មសិក្សារយៈពេលខ្លីនៅកម្ពុជាផងដែរ។ តាមរយៈកម្មវិធីថ្នាក់បណ្តុះបណ្តាលរួមគ្នា រវាងសាកលវិទ្យាល័យវិទ្យាសាស្រ្តសុខាភិបាល និងសាកលវិទ្យាល័យ Paris Saclay នៃប្រទេសបារាំង ចាប់តាំងពីឆ្នាំ២០១៩មក សាកលវិទ្យាល័យ បានទទួលនិស្សិតបរទេស មកសិក្សានៅសាកលវិទ្យាល័យវិទ្យាសាស្រ្តសុខាភិបាល បានចំនួន ៣១នាក់ ដែលមកពីប្រទេសបារាំង អេស្បាញ ព័រទុយហ្គាល់ ស៊ុយអែត ស្វីស កូរ៉េ ឥណ្ឌា ហា្គណា កាម៉េរូន បង់ក្លាដេស ម៉ារ៉ុក ប៉ាគីស្ថាន ឥណ្ឌូនេស៊ី ហ្វីលីពីន និងថៃ។
លោករដ្ឋមន្ត្រី បានគូសបញ្ជាក់ថា សមិទ្ធផលដ៏ធំធេងនេះ កើតចេញពីការដឹកនាំប្រកបដោយស្មារតីបុរេសកម្ម ចក្ខុវិស័យវែងឆ្ងាយ ឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ជាពិសេសការរក្សាបានសន្តិភាព ស្ថិរភាពនយោបាយ សន្តិសុខសណ្តាប់ធ្នាប់និងសុវត្ថិភាពសង្គម ការគ្រប់គ្រងបានជំងឺកូវីដ១៩ ការរក្សាកំណើនសេដ្ឋកិច្ច និងលំនឹងជីវភាពប្រជាជន ការលើកកម្ពស់កិត្យានុភាពកម្ពុជានៅលើឆាកតំបន់ និងអន្តរជាតិ តាមរយៈនយោបាយការបរទេសឯករាជ្យ ដោយផ្អែកលើច្បាប់។ល។ ដូច្នេះតម្លៃសន្តិភាព ដែលកម្ពុជាកំពុងតែមាន និងខិតខំថែរក្សានៅពេលនេះ គឺពិតជាកត្តាសំខាន់បំផុត ដែលបងប្អូនជនរួមជាតិកម្ពុជាទាំងអស់ ត្រូវតែ ចងចាំជានិច្ច និងចូលរួមថែរក្សាការពារសន្តិភាពនេះឱ្យឋិតថេរជាអមតៈ។
បើតាមលោករដ្ឋមន្ត្រី ការស្ទង់មតិរបស់សាកលវិទ្យាល័យវិទ្យាសាស្រ្តសុខាភិបាល ក្នុងចំណោមនិស្សិតបញ្ចប់ការសិក្សាចាប់ពីឆ្នាំ២០២០ មកដល់ឆ្នាំ២០២២នេះ បានបង្ហាញថា អ្នកមានការងារធ្វើមានចំនួន ៩៧ភាគរយ៕
