សម្តេចធិបតី ហ៊ុន ម៉ាណែត៖ ការធ្វើសន្តិភាវូបនីយកម្ម គឺជាស្នូលនៃការបង្រួបបង្រួមជាតិ
សម្តេចធិបតី ហ៊ុន ម៉ាណែត៖ ការធ្វើសន្តិភាវូបនីយកម្ម គឺជាស្នូលនៃការបង្រួបបង្រួមជាតិ
សម្តេចធិបតី ហ៊ុន ម៉ាណែត បានថ្លែងថា ស្នូលនៃការបង្រួបបង្រួមជាតិគឺការធ្វើសន្តិភាវូបនីយកម្ម ហើយសន្តិភាវូបនីយកម្មនេះបានន័យថា គឺការធ្វើយ៉ាងណាអោយសន្តិភាពដែលយើងទើបតែទទួលបាននៅឆ្នាំ ១៩៩៨ មានចរីភាព និងមាននិរន្តភាព។
សម្តេចធិបតី ហ៊ុន ម៉ាណែត បានថ្លែងបន្តថា ការអនុវត្តជោគជ័យនូវនយោបាយឈ្នះឈ្នះ បានធ្វើឱ្យប្រទេសជាតិចប់សង្រ្គាម ថែរក្សាបាននូវសន្តិភាព ការឯកភាពទឹកដីពេញលេញ ការបង្រួបបង្រួមឯកភាពជាតិពេញលេញ និងការបង្រួបបង្រួមទឹកដី ដែល ៥០០ ឆ្នាំកន្លងទៅ យើងមិនដែលមាន។ សម្ដេចបន្តថា នេះគឺជាការចូលរួមចំណែកយ៉ាងសំខាន់របស់ថ្នាក់ដឹកនាំ នាយទាហាន នាយទាហានរង ពលទាហាននៃកងយោធពលខេមរភូមិន្ទទាំងអស់ ជាពិសេសកងទ័ពជើងគោក។
នៅក្នុងឱកាសដែលសម្តេចអញ្ជើញជាអធិបតីក្នុងពិធីអបអរសាទរ «ខួបអនុស្សាវរីយ៍លើកទី២៥ ថ្ងៃបង្កើតបញ្ជាការដ្ឋានកងទ័ពជើងគោក នៃកងយោធពលខេមរភូមិន្ទ ២៤ មករា ១៩៩៩ – ២៤ មករា ២០២៤» នៅព្រឹកថ្ងៃទី ២៤ ខែមករា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងអបអរសាទរ និងដឹងគុណចំពោះនាយទាហានទាំងអស់នៅក្នុងដំណាក់កាលដ៏លំបាកនេះ៕
