សម្តេចធិបតី ហ៊ុន ម៉ាណែត៖ កងទ័ពត្រូវការពារឱ្យបានដាច់ខាតនូវស្ថាប័នជាតិ សាសនា ព្រះមហាក្សត្រ
សម្តេចធិបតី ហ៊ុន ម៉ាណែត៖ កងទ័ពត្រូវការពារឱ្យបានដាច់ខាតនូវស្ថាប័នជាតិ សាសនា ព្រះមហាក្សត្រ
ក្នុងពិធីអបអរសាទរខួបអនុស្សាវរីយ៍លើកទី២៥ ថ្ងៃបង្កើតបញ្ជាការដ្ឋានកងទ័ពជើងគោក នៃកងយោធពលខេមរភូមិន្ទ ២៤ មករា ១៩៩៩ – ២៤ មករា ២០២៤ ដែលប្រារព្ធនៅខណ្ឌកំបូល រាជធានីភ្នំពេញ នៅព្រឹកថ្ងៃទី២៤ ខែមករា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា កងទ័ពពិតជាបានដើរតួយ៉ាងសំខាន់មិនអាចខ្វះបាន ក្នុងការការពារឱ្យបានដាច់ខាតនូវស្ថាប័នជាតិ សាសនា ព្រះមហាក្សត្រ ជាពិសសកងទ័ពត្រូវប្តេជ្ញាការពារជាតិឱ្យខាងតែបាន ពីការប៉ុនប៉ងធ្វើរដ្ឋប្រហារផ្តួលរំលំរាជរដ្ឋាភិបាលស្របច្បាប់ ដូចកាលពីអតីតកាល។
សម្តេចធិបតី ហ៊ុន ម៉ាណែត បានគូសបញ្ជាក់ថា ការបង្កើតបញ្ជាការដ្ឋានកងទ័ពជើងគោក កាលពីឆ្នាំ១៩៩៩ គឺជាចំណាត់ការដ៏ត្រឹមត្រូវបំផុត ខណៈកងទ័ពជើងគោកបានចូលរួមប្រតិបត្តិការយ៉ាងសកម្ម ក្នុងការប្រមូលផ្តុំកងទ័ពគ្រប់ភាគីទាំងអស់ ចូលរួមក្នុងការអនុវត្តប្រកបដោយជោគជ័យនូវនយោបាយឈ្នះឈ្នះ រួមទាំងបានការពារនូវយន្តការជាច្រើនទៀត ធ្វើឱ្យកម្ពុជាមានសុខសន្តិភាពនិងការអភិវឌ្ឍ រហូតដល់សព្វថ្ងៃនេះ។
លើសពីនេះ សម្តេចធិបតី ហ៊ុន ម៉ាណែត បានណែនាំឱ្យកងទ័ពទាំងអស់ ត្រូវតែចូលរួមថែរក្សាឱ្យបាននូវសមិទ្ធផលសុខសន្តិភាពដែលយើងរកបានដោយលំបាក ព្រមទាំងការពារនូវសមិទ្ធផលទាំងឡាយនៅកម្ពុជា ទោះក្នុងតម្លៃណាក៏ដោយ។ សម្តេចធិបតី បានបន្តថា កងទ័ពក៏ត្រូវពង្រឹងខ្លួនដើម្បីកសាងនូវសមិទ្ធផលថ្មីៗបន្ថែមទៀតជូនជាតិនិងប្រជាជនកម្ពុជាផងដែរ៕
