វិចារណកថា៖ ដើមឈើ៖ អ្នកការពារប្រភពទឹកស្អាតធម្មជាតិដ៏អស្ចារ្យ
វិចារណកថា៖ ដើមឈើ៖ អ្នកការពារប្រភពទឹកស្អាតធម្មជាតិដ៏អស្ចារ្យ
ថ្ងៃទី២៨ ខែកក្កដា ឆ្នាំ២០២៦ –
ទឹកគឺជាជីវិត ហើយដើមឈើគឺជាអ្នកការពារដ៏អស្ចារ្យបំផុតមួយនៃប្រភពធនធានដ៏មានតម្លៃមួយនេះ។
នៅពេលដែលមនុស្សភាគច្រើនគិតអំពីសារៈសំខាន់នៃដើមឈើ ពួកគេតែងតែនឹកឃើញដល់ ម្លប់ សម្រស់ ឬខ្យល់អាកាសបរិសុទ្ធ។ ទោះជាយ៉ាងណាក៏ដោយ អំណោយទានដ៏អស្ចារ្យបំផុតមួយដែលដើមឈើផ្តល់ឱ្យយើង គឺ «ទឹកស្អាត និងភាពស្រស់ស្រាយ»។ ព្រៃឈើដែលមានសុខភាពល្អ តែងតែត្រូវបានគេប្រសិទ្ធនាមថាជា «តម្រងទឹកធម្មជាតិ» នៃភពផែនដី ពីព្រោះ។ ព្រៃឈើបានការពារទាំងគុណភាព និងបរិមាណទឹក ដែលយើងត្រូវពឹងផ្អែកជារៀងរាល់ថ្ងៃ។
នៅពេលភ្លៀងធ្លាក់ ដើមឈើជួយបង្អង់ល្បឿននៃតំណក់ទឹកភ្លៀងមកលើដី។ ស្លឹកឈើជួយបន្ធូរកម្លាំងទង្គិចនៃតំណក់ទឹកភ្លៀង ខណៈដែលប្រព័ន្ធឫសឈើចាប់ទប់ដីយ៉ាងរឹងមាំនៅមួយកន្លែង។ ជំនួសឱ្យទឹកភ្លៀងហូរយ៉ាងគំហុកលើផ្ទៃដីដោយនាំយកភក់ កាកសំណល់ និងសារធាតុបំពុលចូលទៅក្នុងទន្លេ និងបឹងបួ ទឹកភ្លៀងត្រូវបានជ្រាបចូលទៅក្នុងដីយ៉ាងសន្សឹមៗ។ នៅទីនោះ ស្រទាប់ដី និងឫសឈើបានធ្វើការច្រោះបន្សុទ្ធទឹកដោយធម្មជាតិ មុនពេលវាហូរទៅបំពេញបន្ថែមតាមអូរ ប្រព័ន្ធដីសើម ប្រភពទឹកក្រោមដី និងអាងស្តុកទឹក។
ដើមឈែក៏ជួយការពារការកាត់ច្រោះដីផងដែរ។ បើគ្មានព្រៃឈើទេ មេឃភ្លៀងធ្លាក់ខ្លាំងអាចលាងសម្អាតដីជីជាតិឱ្យហូរចូលទៅក្នុងទន្លេ ធ្វើឱ្យទឹកល្អក់កក និងកាត់បន្ថយគុណភាពទឹក។ ល្បាប់ដីអាចកកស្ទះអាងស្តុកទឹក បំផ្លាញជម្រកសត្វទឹក និងបង្កើនការចំណាយលើការប្រព្រឹត្តិកម្មទឹកសម្រាប់មនុស្សប្រើប្រាស់។ ដោយសារការចាប់ទប់ដីឱ្យនៅជិតគ្នា ដើមឈើបានរក្សាទន្លេ និងបឹងបួឱ្យកាន់តែស្អាត និងមានសុខុមាលភាពល្អ។
ព្រៃឈើដើរតួនាទីយ៉ាងសំខាន់មួយទៀត តាមរយៈការសម្រួលវដ្តទឹកធម្មជាតិ។ ។ ព្រៃឈើជួយរក្សាកម្រិតទឹកក្រោមដី ទ្រទ្រង់លំហូរទឹកទន្លេនៅរដូវប្រាំង និងកាត់បន្ថយភាពធ្ងន់ធ្ងរនៃជំនន់ទឹកភ្លៀងនៅរដូវវស្សា។ ជម្រាលប្រភពទឹក (Watersheds) ដែលពោរពេញដោយដើមឈើ មានសុខភាពល្អ ផ្តល់នូវប្រភពផ្គត់ផ្គង់ទឹកដ៏ទៀងទាត់ និងគួរឱ្យទុកចិត្តសម្រាប់គ្រួសារ កសិកម្ម ឧស្សាហកម្ម និងសត្វព្រៃ។
ទឹកស្អាតជាតម្រូវការចាំបាច់បំផុតសម្រាប់សុខភាពមនុស្ស។ ព្រៃឈើជួយកាត់បន្ថយការហូរចូលនៃសារធាតុបំពុលទៅក្នុងប្រភពទឹក ដោយជួយកាត់បន្ថយហានិភ័យនៃជំងឺឆ្លងតាមទឹក និងការពារសហគមន៍ទាំងឡាយណាដែលពឹងផ្អែកលើទន្លេ បឹង និងប្រភពទឹកក្រោមដីសម្រាប់ប្រើប្រាស់ និងបរិភោគ។ ទីក្រុងធំៗជាច្រើននៅលើពិភពលោក តែងតែពឹងផ្អែកលើតំបន់ការពារប្រភពទឹកជុំវិញព្រៃឈើ ដើម្បីផ្គត់ផ្គង់ទឹកប្រកបដោយសុវត្ថិភាព និងតម្លៃសមរម្យជូនដល់ប្រជាជនរាប់លាននាក់។
សត្វព្រៃក៏ពឹងផ្អែកលើទឹកស្អាតដូចគ្នា។ ត្រី សត្វលូន វារ បក្សាបក្សី និងប្រជាកាសត្វរាប់មិនអស់ រស់នៅយ៉ាងរុងរឿងតាមដងទន្លេ និងតំបន់ដីសើម ដែលការពារដោយព្រៃឈើមានសុខភាពល្អ។ នៅពេលដើមឈើត្រូវបានបាត់បង់ គុណភាពទឹកនឹងធ្លាក់ចុះ ជម្រកត្រូវខូចខាត ហើយជីវៈចម្រុះនឹងរងការប៉ះពាល់យ៉ាងធ្ងន់ធ្ងរ។
ប្រជាពលរដ្ឋគ្រប់រូបសុទ្ធតែមានតួនាទីក្នុងការការពារប្រព័ន្ធធម្មជាតិនេះ។ ការដាំដើមឈើតាមដងទន្លេ បឹង កសិណ និងអាងស្តុកទឹក ជួយបង្កើតជា «របាំងបៃតងការពារ» ដែលជួយច្រោះបន្សុទ្ធទឹកហូរមុនពេលវាធ្លាក់ចូលទៅក្នុងប្រភពទឹក។ ការអភិរក្សព្រៃឈើ ការទប់ស្កាត់ការកាប់បំផ្លាញព្រៃឈើខុសច្បាប់ និងការស្តារឡើងវិញនូវតំបន់រងការខូចខាត មិនត្រឹមតែជាការវិនិយោគលើធម្មជាតិប៉ុណ្ណោះទេ ប៉ុន្តែថែមទាំងជាការវិនិយោគលើសុខភាពសាធារណៈ សន្តិសុខស្បៀង និងវិបុលភាពសេដ្ឋកិច្ចទៀតផង។
ដើមឈើមួយដើមដែលបានដាំនាថ្ងៃនេះ មិនត្រឹមតែលូតលាស់ទៅជាប្រភពនៃម្លប់ត្រជាក់ប៉ុណ្ណោះទេ។ ។ ដើមឈើទាំងនោះបានក្លាយជាផ្នែកមួយនៃប្រព័ន្ធបណ្តាញរស់ ដែលជួយបន្សុទ្ធទឹក ការពារទឹកជំនន់ ការពារសត្វព្រៃ ទ្រទ្រង់វិស័យកសិកម្ម និងធានានូវប្រភពទឹកបរិភោគស្អាតសម្រាប់ជំនាន់ក្រោយៗ។
ទឹកស្អាតគ្រប់ដំណក់ ចាប់ផ្តើមចេញពីបរិស្ថានដែលមានសុខភាពល្អ។ តាមរយៈការដាំ ការការពារ និងការថែទាំដើមឈើ យើងកំពុងការពារនូវទ្រព្យសម្បត្តិដ៏មានតម្លៃបំផុតមួយនៃភពផែនដី។ ព្រៃឈើមានសុខភាពល្អ នាំមកនូវប្រភពទឹកមានសុខភាពល្អ ហើយប្រភពទឹកមានសុខភាពល្អ នាំមកនូវជីវិតប្រកបដោយសុខុមាលភាព!
-ក្រសួងបរិស្ថាន-
