Angelina Jolie ចែករំលែកក្ដីនឹករឭកដល់ជនភៀសខ្លួនកម្ពុជាក្នុងខួបមួយឆ្នាំនៃសង្គ្រាមឈ្លានពាន

PHOTO: - Hollywood star Angelina Jolie has dedicated herself to humanitarian work in the Kingdom, including a bee-keeping project in Battambang province. Supplied

ភ្នំពេញ៖ តារាភាពយន្តហូលីវូដ និងជាសកម្មជនមនុស្សធម៌ លោកស្រី Angelina Jolie បានទាក់ទាញការចាប់អារម្មណ៍ជាអន្តរជាតិជាថ្មី ចំពោះវិបត្តិជនភៀសខ្លួននៅតាមព្រំដែនកម្ពុជា ដោយបញ្ជាក់ថា «បេះដូងរបស់ខ្ញុំនៅជាមួយអ្នករាល់គ្នា ដែលនៅតែទន្ទឹងរង់ចាំថ្ងៃដែលអាចវិលត្រឡប់ទៅផ្ទះរបស់ខ្លួនវិញ» ខណៈកម្ពុជាប្រារព្ធខួបមួយឆ្នាំនៃការចាប់ផ្តើមជម្លោះប្រដាប់អាវុធនៅតាមព្រំដែនកម្ពុជា-ថៃ ដែលនៅតែធ្វើឱ្យប្រជាពលរដ្ឋជិត ៣ម៉ឺននាក់ មិនទាន់អាចវិលត្រឡប់ទៅលំនៅឋានរបស់ខ្លួនបាន។

នៅក្នុងសារដែលបានបង្ហោះលើគណនី Instagram ផ្លូវការរបស់លោកស្រី កាលពីថ្ងៃទី២៤ ខែកក្កដា លោកស្រី Angelina Jolie បានរំឭកពីផលប៉ះពាល់ផ្នែកមនុស្សធម៌នៃជម្លោះ និងបានបង្ហាញពីចំណងមិត្តភាពដ៏ជ្រាលជ្រៅរវាងគ្រួសាររបស់លោកស្រីជាមួយប្រទេសកម្ពុជា ដែលលោកស្រីចាត់ទុកថាជា «ប្រទេសដ៏ពិសេស» សម្រាប់ខ្លួន និងក្រុមគ្រួសារ។

លោកស្រីបានសរសេរថា៖ «កាលពីមួយឆ្នាំមុន ជម្លោះបានផ្ទុះឡើងនៅតាមព្រំដែនកម្ពុជា ដែលបានបំផ្លាញសុវត្ថិភាព និងស្ថិរភាពរបស់ប្រជាពលរដ្ឋជាច្រើន។ មកដល់ពេលនេះ ប្រជាពលរដ្ឋជិត ៣ម៉ឺននាក់ នៅតែជាជនភៀសខ្លួននៅក្នុងប្រទេស និងមិនទាន់អាចវិលត្រឡប់ទៅផ្ទះរបស់ខ្លួនវិញបាន»។

លោកស្រីបានបញ្ជាក់ថា កម្ពុជាមានទីតាំងពិសេសក្នុងជីវិតរបស់លោកស្រីអស់រយៈពេលជាងពីរទសវត្សរ៍មកហើយ ដោយកូនប្រុសច្បងរបស់លោកស្រី គឺ Maddox កើតនៅប្រទេសកម្ពុជា ហើយមូលនិធិ Maddox Foundation របស់គ្រួសារ ក៏បានអនុវត្តការងារអភិរក្ស និងអភិវឌ្ឍន៍សហគមន៍នៅក្នុងតំបន់ព្រំដែនអស់រយៈពេលជាង២០ឆ្នាំផងដែរ។

លោកស្រីបានសរសេរថា៖ «កម្ពុជាតែងតែជាប្រទេសដ៏ពិសេសសម្រាប់ខ្ញុំ និងគ្រួសាររបស់ខ្ញុំ។ នេះជាប្រទេសកំណើតរបស់កូនប្រុសខ្ញុំ ជាផ្ទះរបស់យើង ហើយអស់រយៈពេលជាង២០ឆ្នាំមកនេះ យើងបានធ្វើការជាមួយក្រុមការងារកម្ពុជាទាំងស្រុង លើការងារអភិរក្ស និងអភិវឌ្ឍន៍សហគមន៍។ ទីស្នាក់ការរបស់ Maddox Foundation ក៏ស្ថិតនៅតាមព្រំដែន ដែលជាកន្លែងកើតមានជម្លោះកាលពីឆ្នាំមុនផងដែរ»។

លោកស្រីបានឱ្យដឹងថា នៅពេលការប្រយុទ្ធបានផ្ទុះឡើងកាលពីឆ្នាំមុន មូលនិធិត្រូវបង្ខំចិត្តជម្លៀសបុគ្គលិក និងក្រុមគ្រួសាររបស់ពួកគេចេញពីតំបន់ ដែលជាបទពិសោធន៍ដ៏ឈឺចាប់ និងជាការរំឭកថា ជម្លោះអាចវិលត្រឡប់មកវិញបានយ៉ាងឆាប់រហ័ស។

ទោះបីជាបច្ចុប្បន្ន មូលនិធិបានបន្តសកម្មភាពការពារធនធានធម្មជាតិ និងគាំទ្រដល់សុខភាព និងជីវភាពរស់នៅរបស់សហគមន៍ឡើងវិញក៏ដោយ លោកស្រីបានបញ្ជាក់ថា មានប្រជាពលរដ្ឋជាច្រើននៅតែរង់ចាំថ្ងៃដែលអាចវិលត្រឡប់ទៅលំនៅឋានរបស់ខ្លួនវិញ។

លោកស្រីបានសរសេរថា៖ «ខ្ញុំស្រឡាញ់ប្រទេសមួយនេះ និងប្រជាជនដែលមានភាពរឹងមាំ ព្រមទាំងពោរពេញដោយភាពកក់ក្តៅ និងរួសរាយរាក់ទាក់។ ទោះបីជាយើងរីករាយដែលអាចបន្តការងារការពារដីធ្លី និងគាំទ្រដល់សុខភាព និងជីវភាពរបស់សហគមន៍ឡើងវិញក៏ដោយ បេះដូងរបស់ខ្ញុំនៅជាមួយអ្នករាល់គ្នា ដែលនៅតែទន្ទឹងរង់ចាំថ្ងៃដែលអាចវិលត្រឡប់ទៅផ្ទះរបស់ខ្លួនវិញ»។

សាររបស់លោកស្រី Angelina Jolie ត្រូវបានផ្សព្វផ្សាយស្របពេលកម្ពុជារំឭកខួបមួយឆ្នាំនៃការចាប់ផ្តើមការឈ្លានពានប្រដាប់អាវុធរបស់យោធាថៃមកលើទឹកដីកម្ពុជា កាលពីថ្ងៃទី២៤ ខែកក្កដា ឆ្នាំ២០២៥ ដែលបានបណ្តាលឱ្យប្រជាពលរដ្ឋរាប់សែននាក់ត្រូវជម្លៀសចេញពីលំនៅឋានរបស់ខ្លួន។

ទោះបីប្រជាពលរដ្ឋភាគច្រើនបានវិលត្រឡប់ទៅភូមិកំណើតវិញហើយក៏ដោយ ទិន្នន័យរបស់រាជរដ្ឋាភិបាលបង្ហាញថា នៅមានប្រជាពលរដ្ឋជិត៣ម៉ឺននាក់នៅតែជាជនភៀសខ្លួននៅក្នុងប្រទេស ដោយសារតែស្ថានភាពសន្តិសុខមិនទាន់អនុញ្ញាតឱ្យពួកគេវិលត្រឡប់ទៅលំនៅឋានវិញ។ បច្ចុប្បន្ន អាជ្ញាធរបានរៀបចំភូមិបណ្តោះអាសន្នសម្រាប់ពួកគេស្នាក់នៅ ខណៈរង់ចាំលក្ខខណ្ឌសមស្របក្នុងការវិលត្រឡប់។

មូលនិធិ Maddox Foundation ដែលពីមុនមានឈ្មោះថា Maddox Jolie-Pitt Foundation បានធ្វើការនៅកម្ពុជាអស់រយៈពេលជាង២០ឆ្នាំ ដោយផ្តោតលើការដោះមីន ការអភិរក្សធនធានធម្មជាតិ ការថែទាំសុខភាព ការអប់រំ និងការអភិវឌ្ឍជីវភាពសហគមន៍ តាមរយៈក្រុមការងារដែលដឹកនាំដោយជនជាតិកម្ពុជា។ ទីស្នាក់ការរបស់មូលនិធិស្ថិតនៅក្នុងតំបន់ព្រំដែន ដែលរងផលប៉ះពាល់ដោយជម្លោះកាលពីឆ្នាំមុន។

ទោះបីជាសាររបស់លោកស្រី Angelina Jolie មិនបានលើកឡើងអំពីទិដ្ឋភាពនយោបាយ ឬការទូតនៃជម្លោះក៏ដោយ ប៉ុន្តែបានរំលេចពីផលប៉ះពាល់ផ្នែកមនុស្សធម៌ និងការលំបាកដែលប្រជាពលរដ្ឋរាប់ម៉ឺននាក់នៅតែប្រឈម ខណៈពួកគេកំពុងរង់ចាំថ្ងៃដែលអាចវិលត្រឡប់ទៅផ្ទះ និងស្ដារជីវិតរបស់ខ្លួនឡើងវិញ។

-Post Khmer-