សម្តេចបវរធិបតី ហ៊ុន ម៉ាណែត៖ បូរណភាពទឹកដី និងប្រជាជនកម្ពុជា ជាអាទិភាពចម្បងបំផុត, កម្ពុជានៅតែរក្សាសិទ្ធិយ៉ាងពេញលេញ ក្នុងការការពារខ្លួនស្របតាមច្បាប់អន្តរជាតិ ដើម្បីការពារទឹកដី និងអធិបតេយ្យជាតិ

សម្តេចបវរធិបតី ហ៊ុន ម៉ាណែត៖ បូរណភាពទឹកដី និងប្រជាជនកម្ពុជា ជាអាទិភាពចម្បងបំផុត, កម្ពុជានៅតែរក្សាសិទ្ធិយ៉ាងពេញលេញ ក្នុងការការពារខ្លួនស្របតាមច្បាប់អន្តរជាតិ ដើម្បីការពារទឹកដី និងអធិបតេយ្យជាតិ

(ភ្នំពេញ)៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា តាមរយៈសារលិខិតផ្ញើជូនជនរួមជាតិ ក្នុងឱកាសពិធីបុណ្យចូលឆ្នាំថ្មីប្រពៃណីជាតិ ឆ្នាំមមី អដ្ឋស័ក ព.ស.២៥៧០ បានបញ្ជាក់ថា រាជរដ្ឋាភិបាលសូមប្រកាសប្តេជ្ញាចិត្តថា បូរណភាពទឹកដី និងប្រជាជនកម្ពុជា គឺជាអាទិភាពចម្បងបំផុត ក្នុងការយកចិត្តទុកដាក់ខ្ពស់ ទាំងបច្ចុប្បន្ន និងអនាគត និងសូមបញ្ជាក់សាជាថ្មីម្តងទៀតថា កម្ពុជានៅតែរក្សាសិទ្ធិយ៉ាងពេញលេញ ក្នុងការការពារខ្លួនតាមគ្រប់មធ្យោបាយ ស្របតាមច្បាប់អន្តរជាតិ ដើម្បីការពារបូរណភាពទឹកដី និងអធិបតេយ្យជាតិ។

សម្តេចបវរធិបតី ហ៊ុន ម៉ាណែត បានបញ្ជាក់អំពីការប្តេជ្ញាចិត្តខ្ពស់ក្នុងការបន្តខិតខំប្រឹងប្រែងកសាង ការពារ និងអភិវឌ្ឍសង្គមជាតិ ឈរលើមាគ៌ាដ៏ត្រឹមត្រូវឆ្ពោះទៅរកភាពសុខដុមរមនា, សេចក្តីថ្លៃថ្នូរ និងសុខុមាលភាពសង្គម បើទោះជាត្រូវជួបប្រទះឧបសគ្គ និងបញ្ហាប្រឈម យ៉ាងណាក៏ដោយ។ យើងត្រូវតែប្រែក្លាយការលំបាកទាំងនេះឱ្យទៅជាបទពិសោធន៍ ប្រែក្លាយការឈឺចាប់ឱ្យទៅជាថាមពលដ៏រឹងមាំ និងប្រែក្លាយឧបសគ្គ ឱ្យទៅជាឱកាសដើម្បីជោគជ័យ។ ពិតណាស់ថា ក្នុងឆ្នាំកន្លងទៅ យើងបានឆ្លងកាត់នូវវិញ្ញាសាដ៏លំបាក និងថ្មីៗ ជាច្រើនមិនធ្លាប់មានដែលបាននិងកំពុងបង្កើតជាផលប៉ះពាល់ដោយផ្ទាល់ និងដោយប្រយោលមកលើសន្តិសុខ និងសង្គម-សេដ្ឋកិច្ចជាតិយើង។

ជាមួយគ្នានេះដែរ ក្នុងសារលិខិត សម្តេចបវរធិបតី ហ៊ុន ម៉ាណែត បានលើកឡើងថា ស្ថិតក្នុងសភាពការណ៍ចំពោះមុខ នៃការប្រឈមនឹងបញ្ហាជាបន្តបន្ទាប់ ទាំងកត្តាខាងក្រៅ និងកត្តាខាងក្នុង ជាមួយនឹងភាពមិនប្រាកដប្រជា និងហានិភ័យខ្ពស់ ពិភពលោក បាននឹងកំពុងរៀនរស់ក្នុងសភាពការណ៍ថ្មី និងកំពុងស្វែងរកប្រក្រតីភាពថ្មី (New normal)។ សម្រាប់កម្ពុជា ជម្រើសដែលប្រសើរបំផុត គឺត្រូវបន្តពង្រឹងខ្លួន ឱ្យកាន់តែរឹងមាំ និងបង្កើនភាពម្ចាស់ការលើមូលដ្ឋានសំខាន់ និងចាំបាច់ ដើម្បីបង្កើនសមត្ថភាពឆ្លើយតបទៅនឹងបញ្ហា និងវិបត្តិនានាប្រកបដោយភាពធន់។

តាមរយៈសារលិខិត សម្តេចបវរធិបតី ហ៊ុន ម៉ាណែត បានគូសបញ្ជាក់ថា៖ «រាជរដ្ឋាភិបាលសូមប្រកាសប្តេជ្ញាចិត្តថា បូរណភាពទឹកដី និងប្រជាជនកម្ពុជា គឺជាអាទិភាពចម្បងបំផុត ក្នុងការយកចិត្តទុកដាក់ខ្ពស់ ទាំងបច្ចុប្បន្ន និងអនាគត និងសូមបញ្ជាក់សាជាថ្មីម្តងទៀតថា កម្ពុជានៅតែរក្សាសិទ្ធិយ៉ាងពេញលេញ ក្នុងការការពារខ្លួនតាមគ្រប់មធ្យោបាយ ស្របតាមច្បាប់អន្តរជាតិ ដើម្បីការពារបូរណភាពទឹកដី និងអធិបតេយ្យជាតិ»។

ម្តេចបវរធិបតី ហ៊ុន ម៉ាណែត សូមបញ្ជាក់ជាថ្មីនូវការប្តេជ្ញាចិត្តរបស់រាជរដ្ឋាភិបាល ក្នុងការការពាររដ្ឋធម្មនុញ្ញ, ការពាររបបរាជានិយម ស្របតាមបាវចនា ជាតិ សាសនា ព្រះមហាក្សត្រ និងការពារនូវរាល់សមិទ្ធផលដែលរាជរដ្ឋាភិបាល និងប្រជាជនកម្ពុជាទាំងមូលសម្រេចបាន នាពេលកន្លងមក ឱ្យបានគង់វង្ស មិនឱ្យបុគ្គលណា ក្រុមណា ឬបរទេសណា មកបំផ្លាញបានឡើយ។

ក្នុងនាមប្រមុខរាជរដ្ឋាភិបាល, សម្តេចបវរធិបតី ហ៊ុន ម៉ាណែត សូមសម្តែងនូវកតញ្ញូតាធម៌ និងអំណរព្រះគុណដ៏ជ្រាលជ្រៅបំផុតថ្វាយ ព្រះករុណា ជាអម្ចាស់ជីវិតលើត្បូង ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរ ដែលជានិច្ចកាល ទ្រង់ទាំងទ្វេតែងតែផ្តល់ការគាំទ្រដល់រាជរដ្ឋាភិបាល ក្នុងការបំពេញបេសកម្មដើម្បីជាតិ និងមាតុភូមិ និងតែងយកព្រះទ័យទុកដាក់ខ្ពស់បំផុត ចំពោះសុខទុក្ខកូនចៅ ជាប្រជានុរាស្ត្ររបស់ព្រះអង្គ ក្នុងគ្រប់កាលៈទេសៈ ពិសេសក្នុងកាលៈទេសៈដ៏លំបាកនេះ។

ទន្ទឹមនេះ សម្តេចបវរធិបតី ហ៊ុន ម៉ាណែត ក៏សូមសម្តែងនូវការដឹងគុណ ដ៏ជ្រាលជ្រៅបំផុតចំពោះការលះបង់មិនអាចកាត់ថ្លៃបានរបស់វីរយុទ្ធជន និងកងកម្លាំងដ៏អង់អាចក្លាហានគ្រប់រូប ក្នុងការបំពេញភារកិច្ចដ៏ឧត្តុង្គឧត្តមនៃការកាពារអធិបតេយ្យជាតិ និងបូរណភាពទឹកដីកម្ពុជា។ ព្រមទាំងសូមសម្តែងនូវការកោតសរសើរ និងអំណរគុណយ៉ាងជ្រាលជ្រៅបំផុត ចំពោះស្មារតីស្នេហាជាតិមាតុភូមិ និងសាមគ្គីភាពជាតិជាធ្លុងមួយរបស់បងប្អូនជនរួមជាតិគ្រប់រូប និងគ្រប់ទិសទីទាំងក្នុង និង ក្រៅប្រទេស ក្នុងការការពារអធិបតេយ្យជាតិ បូរណភាពទឹកដី និងសន្តិភាពដែលមានតម្លៃមិនអាចកាត់ថ្លៃបាន ហើយត្រូវចារទុកក្នុងប្រវត្តិសាស្ត្រសម្រាប់ប្រជាជាតិខ្មែរ។ ក្នុងកាលៈទេសៈដូចបច្ចុប្បន្ន និងសម្រាប់ប្រទេសតូចដូចកម្ពុជា គឺមានតែស្មារតីស្នេហាជាតិ និងសាមគ្គីឯកភាពជាតិនេះទេ ដែលជាខែលការពារប្រទេស ជាតិយើងដ៏រឹងមាំបំផុត ហើយការបន្តរួបរួមគ្នាជាធ្លុងមួយ ប្រកបដោយភាពអត់ធ្មត់ មានវិន័យ និងទំនុកចិត្ត គឺជាកម្លាំងតស៊ូដ៏ខ្លាំងក្លា និងធ្វើឱ្យប្រទេសជាតិយើងអាចក្រោកឈរឡើងកាន់តែខ្ពស់។

ក្នុងន័យនេះ, សម្តេចបវរធិបតី ហ៊ុន ម៉ាណែត សូមអំពាវនាវដល់ខ្មែរគ្រប់រូបបន្តរួមគ្នាជាស្មារតីជាតិតែមួយ, រួបរួមសាមគ្គីគ្នា ជម្នះរាល់បញ្ហា និងស្នើគ្រប់ក្រសួងស្ថាប័ន និងគ្រប់វិស័យទាំងអស់ បន្តខិតខំដើរទៅមុខ ពោលគឺកាន់តែលំបាក កាន់តែខិតខំ ដើម្បីធ្វើឱ្យនាវាកម្ពុជាបន្តដំណើរឆ្ពោះទៅមុខជានិច្ច៕