ស្ងាត់តែមិនស្ងៀម៖ ថៃបន្តសង់លេណដ្ឋាន និងរុះរើសំណង់ពលរដ្ឋ យកការបង្ក្រាបឧក្រិដ្ឋកម្មអនឡាញជាលេសរំលោភទឹកដី

- A Thai soldier guards an alleged scam centre which has been occupied by Thai forces since December 2025. ANN

ភ្នំពេញៈ កម្ពុជាបានដាក់កំណត់ទូតតវ៉ាយ៉ាងខ្លាំងជាថ្មីប្រឆាំងនឹងថៃ ជុំវិញសកម្មភាពជាបន្តបន្ទាប់នៅតំបន់ព្រំដែន រួមមានការសាងសង់លេណដ្ឋាន ខួងអណ្ដូង រុះរើផ្ទះ និងសំណង់របស់ពលរដ្ឋខ្មែរ ព្រមទាំងការនាំក្រុមអ្នកសង្កេតការណ៍ និងអ្នកសារព័ត៌មានចូលតំបន់អូរស្មាច់ដោយគ្មានការអនុញ្ញាត។

ភ្នំពេញបានចាត់ទុកសកម្មភាពទាំងនេះថាជាការរំលោភអធិបតេយ្យភាព និងបូរណភាពទឹកដីកម្ពុជា ខណៈបដិសេធការប្រើការបង្ក្រាបឧក្រិដ្ឋកម្មជាលេសសម្រាប់ការចូលកាន់កាប់ ឬការអះអាងអំណាចរដ្ឋបាលរបស់ថៃលើទឹកដីកម្ពុជា។

ក្នុងសេចក្ដីប្រកាសព័ត៌មានចុះថ្ងៃទី៨ ខែកញ្ញា ក្រសួងការបរទេស និងសហប្រតិបត្តិការអន្តរជាតិបានឱ្យដឹងថា រាជរដ្ឋាភិបាលកម្ពុជាបានដាក់ការតវ៉ាយ៉ាងខ្លាំងមួយទៀតប្រឆាំងនឹងអ្វីដែលខ្លួនហៅថា «ការរំលោភជាបន្តបន្ទាប់» របស់ថៃនៅតំបន់ដែលកងកម្លាំងថៃបានចូលកាន់កាប់ដោយខុសច្បាប់ចាប់តាំងពីខែធ្នូ ឆ្នាំ២០២៥។

យោងតាមក្រសួង កាលពីថ្ងៃទី៣១ ខែសីហា កងកម្លាំងប្រដាប់អាវុធថៃបានរុះរើផ្ទះពលរដ្ឋខ្មែរចំនួន២ខ្នង នៅតំបន់បឹងត្រកួន ស្ថិតក្នុងភូមិត្រពាំងសំរោង ឃុំគោករមៀត ស្រុកថ្មពួក ខេត្តបន្ទាយមានជ័យ។

ក្រោយការរុះរើ កងកម្លាំងថៃបានប្រើគ្រឿងចក្រធុនធ្ងន់ឈូសឆាយដី និងសាងសង់ទំនប់ដី ដែលក្រសួងអះអាងថាជាការរៀបចំមូលដ្ឋានសម្រាប់សាងសង់ទីតាំងយោធាអចិន្ត្រៃយ៍។

ចាប់ពីថ្ងៃទី១ ដល់ថ្ងៃទី៣ ខែកញ្ញា ក្រសួងបានចោទថា កងកម្លាំងថៃបានបញ្ជូនគ្រឿងចក្រធុនធ្ងន់ទៅសាងសង់លេណដ្ឋានយោធានៅតំបន់វត្តអូរខ្លាឃ្មុំ ស្ថិតក្នុងសង្កាត់អូរស្មាច់ ក្រុងសំរោង ខេត្តឧត្តរមានជ័យ។

សកម្មភាពផ្សេងទៀតត្រូវបានរាយការណ៍នៅខេត្តបន្ទាយមានជ័យ ចាប់ពីថ្ងៃទី៤ ដល់ថ្ងៃទី៧ ខែកញ្ញា ដោយកងកម្លាំងថៃត្រូវបានចោទថាបានប្រើគ្រឿងចក្រខួងអណ្ដូងនៅភូមិជោគជ័យ ឃុំអូរបីជាន់ ស្រុកអូរជ្រៅ។

ក្រសួងបន្ថែមថា នៅថ្ងៃទី៧ ខែកញ្ញា កងកម្លាំងថៃក៏បានរុះរើសំណង់របស់ពលរដ្ឋខ្មែរនៅភូមិព្រៃចាន់ ក្នុងឃុំ និងស្រុកដដែល។

នៅថ្ងៃជាមួយគ្នានោះ លោក Prapas Somchaidee មន្ត្រីជាន់ខ្ពស់ថៃ បានដឹកនាំក្រុមអ្នកសង្កេតការណ៍អាស៊ានប្រចាំប្រទេសថៃ (AOT-TH) រួមជាមួយអ្នកសារព័ត៌មានថៃ និងបរទេស ទៅពិនិត្យអគារមួយចំនួនដែលស្ថិតនៅភាគអាគ្នេយ៍នៃសណ្ឋាគារ និងរមណីយដ្ឋាន Royal O Smach ក្នុងសង្កាត់អូរស្មាច់។

ក្រសួងការបរទេសកម្ពុជាអះអាងថា អគារទាំងនោះស្ថិតក្នុងទឹកដីកម្ពុជា ដែលកងកម្លាំងថៃបានចូលកាន់កាប់ដោយខុសច្បាប់ចាប់តាំងពីខែធ្នូ ឆ្នាំ២០២៥។

សេចក្ដីប្រកាសបានបញ្ជាក់ថា៖ «ដំណើរទស្សនកិច្ចដែលគ្មានការអនុញ្ញាតនេះ គឺជាការអះអាងដោយខុសច្បាប់នូវអំណាចរដ្ឋបាលរបស់ថៃលើទឹកដីកម្ពុជា។ កម្ពុជាបដិសេធការប្រើការបង្ក្រាបឧក្រិដ្ឋកម្មជាលេសសម្រាប់ការរំលោភទឹកដី»។

ការតវ៉ានេះត្រូវបានធ្វើឡើងមួយថ្ងៃក្រោយពីភាគីថៃបានរៀបចំដំណើរទស្សនកិច្ចសម្រាប់អ្នកសង្កេតការណ៍ និងអ្នកសារព័ត៌មានទៅកាន់តំបន់ព្រំដែន ដោយបានលើកឡើងពីបញ្ហាឧក្រិដ្ឋកម្មឆ្លងដែន និងអគារដែលសង្ស័យថាពាក់ព័ន្ធនឹងប្រតិបត្តិការឆបោកតាមប្រព័ន្ធអនឡាញ។

ទោះជាយ៉ាងណា កម្ពុជាបានប្រកាន់ជំហរថា កិច្ចខិតខំប្រឹងប្រែងប្រយុទ្ធប្រឆាំងឧក្រិដ្ឋកម្មមិនអាចត្រូវបានប្រើដើម្បីផ្ដល់ភាពស្របច្បាប់ដល់ការចូលកាន់កាប់ទឹកដី ឬការធ្វើសកម្មភាពរដ្ឋបាលដោយឯកតោភាគីឡើយ។

ក្រសួងការបរទេសបានបញ្ជាក់ថា សកម្មភាពរបស់ថៃមិនត្រឹមតែរំលោភអធិបតេយ្យភាព និងបូរណភាពទឹកដីកម្ពុជាប៉ុណ្ណោះទេ ប៉ុន្តែក៏រំលោភលើអនុស្សរណៈនៃការយោគយល់គ្នា ស្ដីពីការវាស់វែង និងខណ្ឌសីមាព្រំដែនគោក ដែលរដ្ឋាភិបាលប្រទេសទាំង២បានចុះហត្ថលេខាកាលពីថ្ងៃទី១៤ ខែមិថុនា ឆ្នាំ២០០០។

សកម្មភាពទាំងនេះក៏ត្រូវបានចោទថាផ្ទុយនឹងសេចក្ដីថ្លែងការណ៍រួមនៃកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី២៧ ខែធ្នូ ឆ្នាំ២០២៥។

ក្នុងសេចក្ដីថ្លែងការណ៍រួមនោះ ភាគីទាំង២បានព្រមព្រៀងប្រគល់ភារកិច្ចឱ្យគណៈកម្មការចម្រុះខណ្ឌសីមាព្រំដែនគោកកម្ពុជា-ថៃ (JBC) បន្តការងារវាស់វែង និងខណ្ឌសីមាព្រំដែនឱ្យបានឆាប់បំផុត ដោយអនុវត្តតាមកិច្ចព្រមព្រៀងដែលមានស្រាប់រវាងប្រទេសទាំង២។

ក្រសួងបានអះអាងថា ការសង់សំណង់យោធា ការផ្លាស់ប្ដូរស្ថានភាពដី ការរុះរើសំណង់ពលរដ្ឋ និងការដឹកនាំភាគីទី៣ចូលតំបន់ជម្លោះដោយឯកតោភាគី អាចបង្កើតស្ថានភាពថ្មីនៅលើដី និងប៉ះពាល់ដល់កិច្ចខិតខំប្រឹងប្រែងដោះស្រាយបញ្ហាព្រំដែនដោយសន្តិវិធី។

កម្ពុជាបានបញ្ជាក់ជាថ្មីថា ខ្លួនមិនទទួលយកខ្សែព្រំដែន ឬការទាមទារទឹកដីណាមួយដែលត្រូវបានកំណត់ដោយឯកតោភាគីពីសំណាក់ថៃឡើយ។ ក្រសួងបន្ថែមថា សកម្មភាពដែលខ្លួនចាត់ទុកថាខុសច្បាប់ទាំងនេះ មិនអាចធ្វើឱ្យប៉ះពាល់ដល់សិទ្ធិស្របច្បាប់ ឬជំហររបស់កម្ពុជាចំពោះព្រំដែនអន្តរជាតិរបស់ខ្លួនបានទេ។

រាជរដ្ឋាភិបាលកម្ពុជាបានទាមទារឱ្យថៃបញ្ឈប់សកម្មភាពទាំងនេះ និងគោរពការប្ដេជ្ញាចិត្តរបស់ខ្លួនក្នុងការបន្ធូរបន្ថយភាពតានតឹង កសាងទំនុកចិត្តរវាងគ្នា និងជំរុញការដោះស្រាយជម្លោះដោយសន្តិវិធី។

ក្រសួងបានបញ្ជាក់ថា ការអនុវត្តជំហរនេះមានគោលដៅស្ដារសន្តិភាព ស្ថិរភាព និងទំនាក់ទំនងជាអ្នកជិតខាងល្អនៅតាមបណ្ដោយព្រំដែនកម្ពុជា-ថៃ។

ជាមួយគ្នានេះ កម្ពុជាបានអះអាងថា ខ្លួននៅតែប្ដេជ្ញាដោះស្រាយវិវាទព្រំដែនជាមួយថៃ ក៏ដូចជាជាមួយប្រទេសជិតខាងដទៃទៀត តាមមធ្យោបាយសន្តិវិធី ស្របតាមច្បាប់អន្តរជាតិ និងកិច្ចព្រមព្រៀងទ្វេភាគីដែលមានស្រាប់។

ទោះជាយ៉ាងណា ភ្នំពេញបានគូសបញ្ជាក់ថា ខ្លួននឹងប្រកាន់ខ្ជាប់យ៉ាងម៉ឺងម៉ាត់នូវគោលការណ៍ដែលថា «ខ្សែព្រំដែនមិនត្រូវបានផ្លាស់ប្ដូរដោយការប្រើកម្លាំងឡើយ»។

គិតត្រឹមពេលចេញផ្សាយនេះ ភាគីថៃមិនទាន់មានប្រតិកម្មជាសាធារណៈចំពោះការតវ៉ាចុងក្រោយរបស់ក្រសួងការបរទេសកម្ពុជានៅឡើយទេ។

-post khmer-

– ទាហានថៃម្នាក់ឈរយាមនៅបរិវេណអគារមជ្ឈមណ្ឌលឆបោកអនឡាញ ដែលថៃបានវាយប្រហារ និងកាន់កាប់ចាប់តាំងពីពាក់កណ្ដាលខែធ្នូ ឆ្នាំ២០២៥។ THE STRAITS TIMES/ANN
– លោក Prapas Sornchaidee ឧត្តមសេនីយ៍ឯកកងទ័ពអាកាសថៃ ដឹកនាំក្រុមអ្នកសង្កេតការណ៍អាស៊ាន រួមជាមួយអ្នកសារព័ត៌មានថៃ និងបរទេស ទៅពិនិត្យអគារនានានៅភាគអាគ្នេយ៍នៃសណ្ឋាគារ និងរមណីយដ្ឋាន Royal O’Smach ក្នុងខេត្តឧត្តរមានជ័យ កាលពីថ្ងៃទី៧ ខែកញ្ញា។ រូបថត សារព័ត៌មានថៃ