មេបក្សប្រឆាំងថៃព្យាយាមទាញប្រធានាធិបតីបារាំង ម៉ាក្រុង ឲ្យមកប្រទេសថៃដើម្បីផលប្រយោជន៍ មុនពេលលោក ម៉ាក្រុង មកកម្ពុជានៅខែវិច្ឆិកា
មេបក្សប្រឆាំងថៃព្យាយាមទាញប្រធានាធិបតីបារាំង ម៉ាក្រុង ឲ្យមកប្រទេសថៃដើម្បីផលប្រយោជន៍ មុនពេលលោក ម៉ាក្រុង មកកម្ពុជានៅខែវិច្ឆិកា
មេបក្សប្រឆាំងដ៏ធំនៅថៃ គឺលោក ណាត់ថាផុង រឿងបញ្ញាវុធ បានជំរុញឲ្យនាយករដ្ឋមន្ត្រីថៃ អានុទីន ឆាន់វីរៈគុល អញ្ចើញប្រធានាធិបតីបារាំង លោក ម៉ាក្រុង មកបំពេញទស្សនកិច្ចនៅប្រទេសថៃឲ្យបានមុនពេលដែលប្រធានាធិបតីបារាំងត្រូវមកចូលរួមកិច្ចប្រជុំកំពូលហ្រ្វង់កូហ្វូនី នៅភ្នំពេញ នៅខែវិច្ឆិកាខាងមុខ។
លោកថា ប្រសិនបើប្រធានាធិបតីបារាំង អេម៉ានូអែល ម៉ាក្រុង មកប្រទេសថៃមុន នោះវានឹងមានផលប្រយោជន៍សេដ្ឋកិច្ច និងផលចំណេញលើបញ្ហាព្រំដែនដល់ប្រទេសថៃ។ នេះបើតាមការចុះផ្សាយរបស់កាសែតថៃ Bangkok post។
ថ្លែងនៅក្នុងរដ្ឋសភាកាលពីថ្ងៃព្រហស្បតិ៍ទី ២១ ខែឧសភា លោក ណាត់ថាផុង បាននិយាយថា លោកគាំទ្រដំណើរទស្សនកិច្ចរបស់នាយករដ្ឋមន្ត្រីថៃ អានុទីន ទៅកាន់ប្រទេសបារាំង ដែលធ្វើឡើងចាប់ពីថ្ងៃព្រហស្បតិ៍ដល់ថ្ងៃទី២៧ ខែឧសភា ដោយហេតុថា ដំណើរទស្សនកិច្ចនេះមានសារៈសំខាន់ និងចាំបាច់ ហើយលោកបានជំរុញឲ្យនាយករដ្ឋមន្ត្រី អានុទីន ប្រើប្រាស់ឱកាសនេះដើម្បីបញ្ជាក់យ៉ាងច្បាស់ អំពីតួនាទីយុទ្ធសាស្ត្ររបស់ប្រទេសថៃនៅលើឆាកអន្តរជាតិ។
មេបក្សប្រឆាំង ណាត់ថាផុង រូបនេះ ក៏បានស្នើឱ្យលោកអានុទីន ប្រើដំណើរទស្សនកិច្ចនេះដើម្បីពង្រឹងការគាំទ្រពីអន្តរជាតិសម្រាប់ប្រទេសថៃផងដែរ ហើយក្នុងនោះលោកបានស្នើលោក អានុទីនឱ្យអញ្ជើញប្រធានាធិបតីបារាំង ឲ្យមកបំពេញចូលទស្សនកិច្ចនៅក្នុងប្រទេសថៃ មុនដំណើរទស្សនកិច្ចរបស់លោកមកកាន់ប្រទេសកម្ពុជានៅខែវិច្ចកាខាងមុខ ដើម្បីចូលរួមកិច្ចប្រជុំកំពូល Francophonie។
កម្ពុជានឹងធ្វើជាម្ចាស់ផ្ទះរៀបចំកិច្ចប្រជុំកំពូលហ្វ្រង់កូហ្វូនី លើកទី២០ ចាប់ពីថ្ងៃទី១៤ ដល់ ថ្ងៃទី១៦ ខែវិច្ឆិកា ឆ្នាំ២០២៦ នៅរាជធានីភ្នំពេញ។ លោក ម៉ាក្រុង បានបញ្ជាក់ពីការធ្វើដំណើរមកចូលរួមកិច្ចប្រជុំនេះនៅភ្នំពេញរួចហើយ ក្នុងជំនួបជាមួយលោកនាយករដ្ឋមន្ត្រី ហ៊ុន ម៉ាណែត កាលពីកន្លងទៅ។
មេបក្សប្រឆាំងរូបនេះបាននិយាយថា «ប្រសិនបើប្រធានាធិបតីបារាំងលោក ម៉ាក្រុងអាចបំពេញទស្សនកិច្ចនៅប្រទេសថៃ មុនពេលធ្វើដំណើរទៅកម្ពុជា នោះវានឹងក្លាយជាឱកាសដ៏មានតម្លៃសម្រាប់កិច្ចពិភាក្សាអំពីការដោះស្រាយបញ្ហាព្រំដែនរវាងប្រទេសទាំងពីរ»។
មេដឹកនាំបក្សប្រឆាំងដដែលបាននិយាយថា អាទិភាពសំខាន់មួយទៀតសម្រាប់លោក អានុទីន គឺការបង្ហាញថា ថៃគឺជាសសរទ្រទ្រង់ស្ថិរភាពក្នុងអាស៊ាន និងជាស្ពានភ្ជាប់រវាងប្លុកតំបន់នេះជាមួយសហភាពអឺរ៉ុប។ ថៃអាចបង្ហាញពីការងាររបស់ខ្លួនក្នុងការបំពេញស្តង់ដារដែលកំណត់ដោយអង្គការសហប្រតិបត្តិការ និងអភិវឌ្ឍន៍សេដ្ឋកិច្ច ជាពិសេសក្នុងការពង្រឹងតម្លាភាព និងដោះស្រាយអំពើពុករលួយ។
គួររម្លឹកផងដែរថា កាលពីកន្លងមក លោកនាយករដ្ឋមន្ត្រី លោក ហ៊ុន ម៉ាណែតក៏បានបំពេញទស្សនកិច្ចទៅប្រទេសបារាំង នឹងបានរៀបរាប់ពីការឈ្លានពានរបស់ថៃមកលើប្រទេសកម្ពុជាប្រាប់លោក ម៉ាក្រុងផងដែរ និងបញ្ជាក់ពីជំហររបស់កម្ពុជាក្នុងការដោះស្រាយបញ្ហាដោយសន្តិវិធី ដោយផ្អែកលើច្បាប់អន្តរជាតិ និងសន្ធិសញ្ញាដែលមានស្រាប់។
លោក ហ៊ុន ម៉ាណែត មិនបានស្នើឲ្យបារាំងកាន់ជើងកម្ពុជាទេ ប៉ុន្តែលោកស្នើឲ្យប្រទេសបារាំងដឹកនាំដោយ លោក ម៉ាក្រុង បន្តលើកតម្កើងគោលការណ៍របស់ខ្លួនដែលស៊ីសង្វាក់គ្នាខ្លាំង ជាមួយនឹងគោលការណ៍របស់ប្រទេសកម្ពុជា នោះគឺគោលការណ៍គោរពគោរពច្បាប់អន្តរជាតិ គោរពអធិបតេយ្យភាព និងគោរពបូរណភាពទឹកដីនៃបណ្ដាប្រទេសនានានៅលើពិភពលោក៕
-Phnom Penh Post-
