បទវិភាគ៖ កម្ពុជា ឡាវ ត្រូវការចាប់ដៃគ្នា នៅពេលប្រទេសថៃ បង្ហាញសាច់ដុំជាបងធំ
បទវិភាគ៖ កម្ពុជា ឡាវ ត្រូវការចាប់ដៃគ្នា នៅពេលប្រទេសថៃ បង្ហាញសាច់ដុំជាបងធំ
#opinion
ក្នុងអំឡុងដំណើរទស្សនកិច្ចរបស់លោក បណ្ឌិត ថងលុន ស៊ីសុលីត អគ្គលេខាធិការបក្សប្រជាជនបដិវត្តន៍ឡាវ និងជាប្រធានរដ្ឋ នៃសាធារណរដ្ឋប្រជាធិបតេយ្យប្រជាមានិតឡាវ ក្នុងទីក្រុងភ្នំពេញ កាលពីសប្តាហ៍មុន ប្រទេសកម្ពុជា និងឡាវ បានប្រកាសយ៉ាងច្បាស់ៗថា ប្រទេសទាំងពីរ «ប្តេជ្ញាមិនអនុញ្ញាតឱ្យកម្លាំងអមិត្តណាមួយប្រើប្រាស់ទឹកដីរបស់ប្រទេសមួយ ដើម្បីបំផ្លាញសន្តិសុខ ស្ថិរភាព ឬអធិបតេយ្យរបស់ប្រទេសមួយទៀតឡើយ»។
ការគូសបញ្ជាក់នេះ ធ្វើឡើងក្នុងជំនួបរវាងសម្តេច ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា ជាមួយ លោក ថងលុន ស៊ីសុលីត។
ការលើកឡើងនេះ ធ្វើឡើងខណៈដែលកម្ពុជាកំពុងប្រឈមនឹងភាពតានតឹងផ្នែកព្រំដែនជាមួយប្រទេសថៃ។ ហើយប្រទេសថៃ ត្រូវបានគេរាយការណ៍ថា បានទន្រ្ទានចូលកាន់កាប់ទឹកដីអធិបតេយ្យរបស់ប្រទេសកម្ពុជាយ៉ាងតិចចំនួន ១៤កន្លែង ក្រោយពីបង្កសង្គ្រាមយ៉ាងហឹង្សាកាលពីខែធ្នូ ឆ្នាំ ២០២៥។
លោកបណ្ឌិត យង់ ពៅ អ្នកជំនាញវិទ្យាសាស្ត្រនយោបាយ លើកឡើងថា ចំណងមិត្តភាពរវាងកម្ពុជា និងឡាវ គឺជាសម្ព័ន្ធភាពដែលមានឫសគល់យ៉ាងរឹងមាំតាំងពីអតីតកាលមក។
បើតាមលោកបណ្ឌិត យង់ ពៅ ប្រទេសភូមិផងរបងជាមួយគ្នាទាំងពីរនេះ នៅតែបន្តរក្សា និងពង្រឹងកិច្ចសហប្រតិបត្តិការយុទ្ធសាស្ត្រលើគ្រប់វិស័យយ៉ាងល្អប្រសើរ ដែលនេះគឺជាគ្រឹះដ៏មានសារៈសំខាន់បំផុតសម្រាប់ស្ថិរភាពក្នុងតំបន់។
អ្នកឃ្លាំមើលសង្គមបានវាយតម្លៃថា ការរួបរួមកម្លាំងយ៉ាងស្អិតរមួតរវាងកម្ពុជា និងឡាវ បានក្លាយជាសសរស្តម្ភយុទ្ធសាស្ត្រដ៏រឹងមាំ ដែលអនុញ្ញាតឱ្យប្រទេសទាំងពីរអាចបន្លឺសំឡេងរួមគ្នាយ៉ាងមានទម្ងន់នៅលើឆាកអន្តរជាតិ ជាពិសេសក្នុងក្របខណ្ឌអាស៊ាន។
ទាំងកម្ពុជា និងឡាវ សុទ្ធតែមានព្រំប្រទល់ជាប់នឹងប្រទេសថៃ ហើយប្រជាជាតិទាំងពីរតែងតែជួបប្រទះនូវបញ្ហាវិវាទព្រំដែនជាមួយប្រទេសថៃដូចៗគ្នា។ ប្រវត្តិសាស្ត្របានបង្ហាញថា ភាពមិនច្បាស់លាស់នៃបន្ទាត់ព្រំដែន និងមហិច្ឆតាពង្រីកឥទ្ធិពលរបស់យោធាថៃ គឺជាដើមចមនៃភាពតានតឹងដែលបង្កការរំខានដល់សន្តិភាពក្នុងតំបន់ជាញឹកញាប់។
កាលពីខែ កុម្ភៈ ឆ្នាំ ២០២៥ ក្នុងជំនួបរវាងសម្តេច ហ៊ុន សែន ជាមួយលោក សនសៃ ស៊ីផាន់ដន នាយករដ្ឋមន្រ្តីឡាវ ក្នុងទីក្រុងវៀងចន្ទន៍ ប្រទេសទាំងពីរក៏បានគូសបញ្ជាក់ជំហររួមគ្នាដូចគ្នានេះដែរ។
អ្នកវិភាគនយោបាយកម្ពុជា មើលឃើញថា ជំហររួមនេះគឺជាសារនយោបាយយ៉ាងច្បាស់លាស់ផ្ញើទៅកាន់ទីក្រុងបាងកកថា ប្រជាជាតិក្នុងភូមិភាគឥណ្ឌូចិនទាំងនេះ មានឯករាជភាពពេញលេញ និងមិនមែនជាទម្រង់នៃរដ្ឋដែលងាយនឹងឱ្យនរណាម្នាក់មកដាក់សម្ពាធ ត្រួតត្រា ឬបង្គាប់បញ្ជាតាមអំពើចិត្តបាននោះឡើយ។
កម្ពុជា និងឡាវ មានខ្សែបន្ទាត់ព្រំដែនសរុបប្រវែងជាង ៥៥០ គីឡូម៉ែត្រ ហើយខេត្តរបស់កម្ពុជាដែលជាប់ព្រំដែនឡាវ រួមមាន ខេត្តព្រះវិហារ ស្ទឹងត្រែង និងខេត្តរតនគិរី។ ដោយឡែកសម្រាប់ភាគីឡាវ ខេត្តដែលមានព្រំប្រទល់ជាប់នឹងកម្ពុជា រួមមាន ខេត្តអាតាពឺ និងខេត្តចម្ប៉ាសាក់។
ក្នុងជំនួបក្នុងទីក្រុងភ្នំពេញ កាលពីសប្តាហ៍មុន ថ្នាក់ដឹកនាំកំពូលនៃប្រទេសទាំងពីរ បានសង្កត់ធ្ងន់អំពីសារៈសំខាន់នៃការរឹតចំណងមិត្តភាពរវាងប្រទេសទ្វេភាគីឱ្យកាន់តែកក់ក្តៅ និងជិតស្និទ្ធថែមទៀត ក្នុងបរិបទដែលសភាពការណ៍តំបន់ និងពិភពលោកកំពុងវិវត្តយ៉ាងឆាប់រហ័ស និងស្មុគស្មាញ៕ ដោយ ទួន សុផល
-AMS-
