វេបសាយ Booking.com ត្រូវបាន Hacker វាយប្រហារ (Data Breach)

ថ្មីៗនេះ វេបសាយកក់កន្លែងស្នាក់នៅដ៏ធំ Booking.com បានបញ្ជាក់ពីការរងការវាយប្រហារលួចទិន្នន័យ ដែលធ្វើឲ្យប៉ះពាល់ដល់ទិន្នន័យឯកជនភាពរបស់អតិថិជនជាច្រើន។

ចំណុចសំខាន់ៗដែលអ្នកគួរដឹង៖

🔹 ទិន្នន័យដែលលេចធ្លាយ៖ Hacker បានលួចចូលទៅយកព័ត៌មានផ្ទាល់ខ្លួនរបស់អតិថិជនមួយចំនួន ដូចជា ឈ្មោះ ព័ត៌មានសម្រាប់ទំនាក់ទំនង (អ៊ីមែល/លេខទូរស័ព្ទ) និងព័ត៌មានលម្អិតនៃការកក់កន្លែងស្នាក់នៅ។

🔹 ព័ត៌មានហិរញ្ញវត្ថុ៖ ជាសំណាងល្អ មកទល់ពេលនេះ ក្រុមហ៊ុនបានបញ្ជាក់ថា មិនមានទិន្នន័យកាតធនាគារ ឬព័ត៌មាននៃការទូទាត់ប្រាក់ត្រូវបានលួចនោះទេ។

🔹 ទម្រង់នៃការបោកប្រាស់ (Phishing)៖ Hacker បានប្រើប្រាស់គណនីរបស់សណ្ឋាគារដែលពួកគេ Hack បាន ដើម្បីផ្ញើសារបោកប្រាស់ដោយផ្ទាល់ទៅកាន់អតិថិជនក្នុងគោលបំណងលួចប្រាក់។

🔹 ចំណាត់ការរបស់ក្រុមហ៊ុន៖ Booking.com បានចាត់វិធានការទប់ស្កាត់ភ្លាមៗ ដោយតម្រូវឲ្យមានការកំណត់លេខកូដ (PIN Reset) ឡើងវិញ និងបានផ្ញើអ៊ីមែលទៅកាន់អ្នកដែលរងផលប៉ះពាល់ដោយផ្ទាល់។

⚠️ ការណែនាំដើម្បីសុវត្ថិភាព (សូមប្រុងប្រយ័ត្នខ្ពស់)៖

❌ កុំចុចលើតំណភ្ជាប់ (Links) គួរឲ្យសង្ស័យដែលផ្ញើមកតាមរយៈអ៊ីមែល ឬសារ ទោះបីជាសារនោះមើលទៅដូចជាផ្ញើចេញពី App Booking.com ឬខាងសណ្ឋាគារក៏ដោយ។

❌ ប្រសិនបើសណ្ឋាគារផ្ញើសារទាមទារឲ្យបង់ប្រាក់ ឬបញ្ចូលព័ត៌មានកាតធនាគារឡើងវិញ សូមកុំធ្វើតាមឲ្យសោះ។ ត្រូវទាក់ទងទៅកាន់សណ្ឋាគារដោយផ្ទាល់តាមរយៈលេខទូរស័ព្ទផ្លូវការដើម្បីបញ្ជាក់ការពិត។

✅ សូមចូលទៅផ្លាស់ប្តូរលេខសម្ងាត់ (Password) គណនី Booking.com របស់អ្នកជាបន្ទាន់។

https://www.theguardian.com/technology/2026/apr/13/booking-com-customers-hack-exposed-data

@OUPNarith