អ្នកវិភាគ៖ កម្ពុជាកំពុងស្ថិតនៅក្នុង «វិបត្តិនៃទំនុកចិត្ត» ធ្ងន់ធ្ងរបំផុត

អ្នកវិភាគ៖ កម្ពុជាកំពុងស្ថិតនៅក្នុង «វិបត្តិនៃទំនុកចិត្ត» ធ្ងន់ធ្ងរបំផុត

អ្នកតាមដានសង្គមយល់ថាសង្គមកម្ពុជាកំពុងស្ថិតក្នុង «វិបត្តិនៃទំនុកចិត្ត» យ៉ាងធ្ងន់ធ្ងរបំផុត ដោយផ្អែក លើករណីនៃការលួចនាំចូលទុរេនពីប្រទេសថៃ ដោយឈ្មួញអះអាងថាជា «ទុរេនខ្មែរ» រាស្ត្រថា «ទុរេនថៃ» រីឯមន្ត្រីថា «ទុរេនទិញមកពីផ្សារនាគមាស​ និងកំពង់ចាម»។

នាពេលថ្មីៗមានករណីមួយដែលនាំឱ្យប្រជាជននាំគ្នាប្រតិកម្មយ៉ាងខ្លាំងទាក់ទងនឹងការលួចនាំចូលទុរេន ពីប្រទេសថៃយកមកលក់នៅក្នុងទឹកដីកម្ពុជា ស្របពេលដែលប្រជាជនខ្មែរនាំគ្នាពហិការមិនប្រើប្រាស់ ឬគាំទ្រផលិតផលថៃ ដែលកើតចេញពីសកម្មភាពឈ្លានពានរបស់ថៃមកលើទឹកដីកម្ពុជា។

ទាក់ទងនឹងបញ្ហានាំលួចចូលទុរេននេះនាំមានការអះអាងរៀងៗខ្លួនដែលចំណុចនេះបានធ្វើឱ្យ លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា និងជាអ្នកតាមដានសង្គមយល់ថា

នេះគឺជា «វិបត្តិនៃទំនុកចិត្ត» យ៉ាងធ្ងន់ធ្ងរបំផុត» ត្បិតមនុស្សក្នុងសង្គមនេះលែងជឿ​ជាក់លើគ្នាទៅវិញ​ទៅមកហើយ ព្រោះនៅពេលមានព័ត៌មានពីការលួចនាំចូលទុរេនថៃ ក្រុមមន្ត្រីក៏ចុះ​ទៅពិនិត្យទាំងយប់ តែមិនមិនបានធ្វើការទាំងយប់នោះទេ លុះព្រឹកឡើងការពិនិត្យបានចាប់ផ្ដើម ឈ្មួញអះអាងថា «ទុរេនខ្មែរ» តែរាស្ត្រថា «ទុរេនថៃ» រីឯមន្ត្រីថា «ទុរេនទិញមកពីផ្សារនាគមាស​និងកំពង់ចាម»។ រហូតមានមានបងប្អូនខ្លះលើកឡើងដោយក្តីមន្ទិលសង្ស័យយ៉ាងខ្លាំងថា បើពិតជា​ធុរេនខ្មែរមែន ពួកគាត់ហ៊ានកាត់ដៃគាត់ចោលមួយចំហៀងទៀតផង។

លោកគិន ភា ពន្យល់ថា «វិបត្តិនៃទំនុកចិត្ត នេះ មិនមែនកើតឡើងដោយចៃដន្យនោះទេ គឺវាបានប្រសូត​ចេញការភូតភរ ការបោកប្រាស់ និងការក្បត់សីលធម៌ ហើយវិវឌ្ឍន៍ខ្លួនក្លាយជាវប្បធម៌​ទូទៅក្នុងសង្គម​ទៅហើយ ព្រោះឱ្យតែបានផលប្រយោជន៍ផ្ទាល់ខ្លួន ជនទុច្ចរិតហ៊ានធ្វើគ្រប់បែប​យ៉ាងដោយគ្មាន​សេចក្ដីអៀនខ្មាសបន្តិចណាឡើយ។

លោកបន្តថា នៅពេលដែលរាស្ត្រនៅតែសង្ស័យថា ឈ្មួញប្រើល្បិចបោកប្រាស់ មន្ត្រីភូតកុហកថ្ពិនភ្នែក​និងឃុបឃិតជាមួយឈ្មួញ​ដើម្បីផលប្រយោជន៍ផ្ទាល់ខ្លួន ហើយអ្នកនយោបាយមានចរិតក្រឡេចក្រឡុច​និយាយឱ្យតែពិរោះស្ដាប់ នោះវានឹងធ្វើឱ្យរាស្ត្រលែងទុកចិត្តមន្ត្រី មន្ត្រីលែងខ្វល់ពីគុណធម៌ ហើយឈ្មួញ​លែងស្គាល់បុណ្យបាប រីឯអ្នកនយោបាយខ្វល់តែសន្លឹកឆ្លោតនិងលាភសក្ការៈ។

សកម្មភាពទាំងអស់នេះ គឺជាលទ្ធផល ទោះបីជាអ្នកនយោបាយ មន្ត្រី ឬឈ្មួញ និយាយការពិត ក៏គ្មាននរណាជឿដែរ។ ក្នុងសង្គមដែលសីលធម៌ គុណធម៌ និងសច្ចធម៌ ត្រូវបានគេបោះបង់ចោល មនុស្សនឹងរស់នៅដោយមន្ទិលសង្ស័យលើគ្នាជានិច្ច។ រាល់សកម្មភាពដែលម​ន្ត្រីឬអ្នកនយោ​បាយ​បង្ហាញ​ដល់រាស្ត្រ នឹងត្រូវគេចាត់ទុកថាជា​ការសម្ដែង​ទាំងអស់ គ្មានឡើយនូវភាពបរិសុទ្ធ​ដែលចេញពីបេះដូងពិតប្រាកដ។

បើតាមលោកគិន ភា គ្រាន់តែរឿង «ទុរេន» ប៉ុណ្ណឹង យើង​មិនអាចស្វែងរកសច្ចភាព​ដើម្បីកសាង​ទំនុកចិត្តគ្នាបានផង តើយើងអាចរំពឹងឱ្យសង្គមនេះវេញត្របាញ់ចូលគ្នាជាធ្លុងមួយ ដើម្បីទប់ទល់​នឹងសត្រូវឈ្លានពានដោយរបៀបណាទៅ?

អ្នកតាមដានសង្គមរូបភាពសង្កត់ធ្ងន់ថា៖ «ក្នុងនាមយើងជាខ្មែរទាំងអស់គ្នា ទាំងរាស្ត្រ ទាំងឈ្មួញ ទាំងមន្ត្រី និងទាំងអ្នកនយោបាយ សូមឈប់កុហក ឈប់ភូតភរ និងឈប់បោកប្រាស់ខ្មែរគ្នាឯងទៀតទៅ ឈប់សម្ដែងទៀតទៅ ហើយចាប់ផ្ដើមរួមគ្នាកសាង​ទំនុកចិត្ត​គ្នាឡើងវិញ ដើម្បីភាពរឹងមាំនិងសេចក្ដីថ្លៃថ្នូរ​នៃសង្គមជាតិយើង៕

ដោយ៖បណ្ឌិត គិន ភា