ក្បួនឃោសនារកសំឡេងឆ្នោតក្នុងថ្ងៃបិទបញ្ចប់យុទ្ធនាការឃោសនារកសំឡេងឆ្នោតនៅរាជធានីភ្នំពេញ ដែលដឹកនាំផ្ទាល់ដោយលោក ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្រ្តីនៃកម្ពុជាដ៏មានឥទ្ធិពល នៅព្រឹកថ្ងៃទី០២ ខែមិថុនា ឆ្នាំ២០១៧ មានការចូលរួមដង្ហែ និងគាំទ្រយ៉ាងច្រើនសន្ធឹកសន្ធាប់ពីថ្នាក់ដឹកនាំ សមាជិក សមាជិកា និងប្រជាពលរដ្ឋអ្នកស្រឡាញ់ពេញចិត្តចំពោះគណបក្សដឹកនាំរាជរដ្ឋាភិបាលមួយនេះ។
លោកនាយករដ្ឋមន្រ្តី ហ៊ុន សែន បានបញ្ជាក់ថា គណបក្សប្រជាជនកម្ពុជា គឺជាគណបក្សនយោបាយថ្លៃថ្នូរ មានភាពចាស់ទុំ ជាពិសេសមានរចនាសម្ព័ន្ធដឹកនាំប្រទេសយ៉ាងរឹងមាំ។ គណបក្សប្រជាជនកម្ពុជា គឺជាគណបក្សនយោបាយ ដែលបានប្រឹងប្រែងនាំមកនូវសុខសន្តិភាព និងអភិវឌ្ឍន៍ឱ្យមានអគារខ្ពស់ៗក្នុងរាជធានីភ្នំពេញ និងសាលារៀនល្អៗឱ្យកូនចៅប្រជាពលរដ្ឋបានសិក្សារៀនសូត្រផងដែរ។
នៅពេលក្បួនរថយន្តអមសងខាងមុខក្រោយដោយក្បួនម៉ូតូប្រមាណ៥០០គ្រឿង បានធ្វើដំណើរមកដល់ព្រះសក្យមុនីចេតិយមុខស្ថាននីយរថភ្លើង លោក ហ៊ុន សែន ក៏បានឈប់ក្បួនរថយន្តថ្លែងសារទៅកាន់ប្រជាពលរដ្ឋ។ ក្រៅពីការថ្លែងសារទៅកាន់ប្រជាពលរដ្ឋ លោក ហ៊ុន សែន បានថ្លែងសច្ចាចំពោះសារីរិកធាតុរបស់ព្រះសម្មាសម្ពុទ្ធនៅព្រះសក្យមុនីចេតិយថា នឹងប្រឹងប្រែងដឹកនាំប្រទេសជាតិឱ្យកាន់តែរីកចម្រើន និងធ្វើឱ្យប្រជាពលរដ្ឋមានជីវភាព កាន់តែល្អប្រសើរ។
ទាំងប្រជាពលរដ្ឋដែលបានចូលរួមដង្ហែក្បួន ក៏ដូចជាប្រជាពលរដ្ឋឈរអមតាមដងផ្លូវសុទ្ធតែបានបង្ហាញការយល់ឃើញដូចៗគ្នាថា គណបក្សប្រជាជនកម្ពុជា គឺជាគណបក្សនយោបាយតែមួយគត់ ដែលពួកគាត់ជឿថា អាចរក្សាបាននូវសុខសន្តិភាព និងកសាងអភិវឌ្ឍន៍ជាតិ ឱ្យកាន់តែរីកចម្រើនថែមទៀត៕
