នៅថ្ងៃទី២៣ ខែឧសភា ឆ្នាំ២០១៧នេះ ក្រសួងទេសចរណ៍បានរៀបចំសិក្ខាសាលាផ្សព្វផ្សាយពី “គោលការណ៍ណែនាំស្តីពីបដិសណ្ឋារកិច្ចល្អក្នុងវិស័យទេសចរណ៍” ទីស្នាក់ការគណៈកម្មាធិការជាតិអូឡាំពិកកម្ពុជា (NOCC) ដោយមានអ្នកចូលរួមពី ផ្នែកឯកជន ម្ចាស់អាជីវកម្មទេសចរណ៍ សមាគមន៍ CATA , PATA, សមាគមន៍សណ្ឋាគារ សមាគមន៍ភោជនីយដ្ឋាន និសិ្សតសាកលវិទ្យាល័យ និងមន្ត្រីក្រសួងទេសចរណ៍។
សូមជម្រាបផងដែរថា គោលបំណងនៃសិក្ខាសាលានេះគឺ ផ្សព្វផ្សាយគោលការណ៍ណែនាំបដិសណ្ឋារកិច្ចល្អក្នុងវិស័យទេសចរណ៍ ចលនាប្រឡងប្រណាំងបដិសណ្ឋារកិច្ចល្អ និងនីតិវិធីនៃការប្រឡងប្រណាំងនេះជូនដល់ប្រតិបត្តិករទេសចរណ៍ ដើម្បីជំរុញ និងលើកទឹកចិត្តដល់អាជីវកម្មទេសចរណ៍ឲ្យខិតខំប្រឹងប្រែងអភិវឌ្ឍសម្បទាឲ្យប្រកបដោយស្តង់ដាត្រឹមត្រូវ អភិរក្សវប្បធម៌ ប្រពៃណីរបស់ជនជាតិខ្មែរ លើកកំពស់ធនធានមនុស្ស ជំរុញប្រសិទ្ធភាព គុណភាព និងសុវត្ថិភាព នៃការផ្តល់សេវាទេសចរណ៍ សំដៅទាក់ទាញភ្ញៀវទេសចរជាតិ និងអន្តរជាតិ ព្រមទាំងអាចពន្យារពេលស្នាក់នៅ ចូលរួមអភិវឌ្ឍឧស្សាហកម្មទេសចរណ៍កម្ពុជា។
សូមរំលឹកផងដែរថា កាលពីថ្ងៃទី២២ ខែមិថុនា ឆ្នាំ២០១៦ រាជរដ្ឋាភិបាលបានប្រកាសដាក់ចេញនូវចលនាប្រឡងប្រណាំង “បដិសណ្ឋារកិច្ចល្អ” ផ្តោតទៅលើ ទី១-“បដិសណ្ឋារកិច្ចល្អក្នុងសេវាទេសចរណ៍” ទី២-“បដិសណ្ឋារកិច្ចល្អក្នុងសេវាសាធារណៈរបស់ក្រុង/ខណ្ឌបេក្ខភាពក្នុងចលនាទីក្រុងស្អាត” និងទី៣- “បដិសណ្ឋារកិច្ចល្អរបស់ច្រកទ្វារអន្តរជាតិ” និងត្រូវចូលរួមដោយប្រជាពលរដ្ឋ ភ្ញៀវទេសចរ ផ្តល់មតិយោបល់វាយតម្លៃ (Vote-Online) លើការផ្តល់សេវារបស់ប្រតិបត្តិករ-អាជីវករទេសចរណ៍ ឬមន្ត្រីច្រកទ្វារអន្តរជាតិ ឬប្រសិទ្ធភាពនៃការផ្តល់សេវាសាធារណៈពីខណ្ឌ/ក្រុងជាបេក្ខភាពក្នុងចលនាប្រឡងប្រណាំងទីក្រុងស្អាត សំដៅបង្កើនប្រសិទ្ធភាពនៃការផ្តល់សេវារបស់យើងឲ្យបានកាន់តែល្អពេញចិត្ត។ ជាលទ្ធផលរាជរដ្ឋាភិបាលបានប្រកាសជ័យលាភីបដិសណ្ឋារកិច្ចល្អក្នុងសេវាសាធារណៈសម្រាប់ក្រុង/ខណ្ឌបេក្ខភាពក្នុងចលនាប្រឡងប្រណាំងទីក្រុងស្អាត និងច្រកទ្វារអន្តរជាតិកាលពីថ្ងៃទី ២៧ ខែកុម្ភៈ ឆ្នាំ២០១៧។
ព័ត៌មានបន្ថែមស្ដីពីចលនាប្រឡងប្រណាំងបដិសណ្ឋារកិច្ចល្អក្នុងវិស័យទេសចរណ៍សូមចូលក្នុងវេបសាយ www.cambodiabesthospitality.org ឬសូមទំនាក់ទំនងលោក ហ៊ួត រិទ្ធី ប្រធាននាយកដ្ឋានសេវាគាំពារទីក្រុងស្អាត និងជម្រុញចលនាប្រឡងប្រណាំង តាមរយៈទូរស័ព្ទលេខ៖ ០៧៨ ៧៧៧ ១៦៧, ០៩៥ ៩៤៤ ៤៩៨៕
