កាលពីល្ងាចថ្ងៃទី២១ ខែឧសភា ឆ្នាំ២០១៧ លោកឧត្តមសេនីយ៍ទោ ឌៀប វណ្ឌី នាយរងសេនាធិការដ្ឋាន កងរាជអាវុធហត្ថលើផ្ទៃប្រទេស និងលោកអនុសេនីយ៍ឯក ម៉ាន់ ដាវីត អ្នកសម្របសម្រួលមូលនិធិមហាគ្រួសារ កងរាជអាវុធហត្ថ និងក្រុមការងារតំណាង នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បាននាំយកថវិការបស់មូលនិធិមហាគ្រួសារ កងរាជអាវុធហត្ថ ចំនួន១៨,២៥០,០០០រៀល និង១,៣៩៥ដុល្លា ទៅជូនគ្រួសារសព លោកអនុសេនីយ៍ត្រី មាស សាម៉ុន នាយទាហានកងអនុសេនាធំ កងរាជអាវុធហត្ថលើផ្ទៃប្រទេស ដែលបានទទួលមរណភាព កាលពីថ្ងៃទី១៦ ខែឧសភា ឆ្នាំ២០១៧ ក្នុងជន្មាយុ៥០ឆ្នាំ ដោយរោគគារពាធ ស្ថិតនៅផ្ទះលេខ១៣ ផ្លូវលេខ២៥៣ សង្កាត់ទឹកល្អក់១ ខណ្ឌទួលគោក រាជធានីភ្នំពេញ។
លោកអនុសេនីយ៍ឯក ម៉ាន់ ដាវីត អ្នកសម្របសម្រួលមូលនិធិ មហាគ្រួសារកងរាជអាវុធហត្ថ បានឲ្យដឹងថា ថវិការបស់មូលនិធិនេះ គឺបានមកពីការបរិច្ចាគដោយស្ម័គ្រចិត្ត របស់លោក លោកស្រី ដែលជានាយទាហាន នាយទាហានរង នៃកងរាជអាវុធហត្ថ ក្នុងនោះថវិកាចំនួន១០,០០០,០០០រៀល គឺជាថវិកាផ្ទាល់របស់ នាយឧត្តមសេនីយ៍ សៅ សុខា។
លោកឧត្តមសេនីយ៍ទោ ឌៀប វណ្ឌី តំណាងលោក លោកស្រី ដែលជា នាយទាហាន នាយទាហានរង នៃកងរាជអាវុធហត្ថ បានសម្តែងនូវការសោកស្តាយយ៉ាងក្រៀមក្រំបំផុត ចំពោះការបាត់បង់ លោកអនុសេនីយ៍ត្រី មាស សាម៉ុន ពីជួរអង្គភាពកងរាជអាវុធហត្ថ។
ជាចុងក្រោយ ក្រុមគ្រួសារនៃសព ក៏បានសម្ដែងនូវក្តីរំភើបចំពោះកាយវិការប្រកបដោយសប្បុរសធម៌ និងព្រហ្មវិហារធម៌របស់នាយឧត្តមសេនីយ៍ សៅ សុខា និងអស់លោក លោកស្រី ដែលជានាយទាហាន នាយទាហានរង នៃកងរាជអាវុធហត្ថ ដែលបានយកចិត្តទុកដាក់គិតគូរក្នុងការចូលរួមរំលែកទុក្ខ នាពេលនេះផងដែរ៕
