ទំព័រហ្វេសប៊ុកលោកនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា នៅព្រឹកថ្ងៃទី២២ ខែឧសភា ឆ្នាំ២០១៧ បានបង្ហាញពីទិដ្ឋភាពនៃការឃោសនាបោះឆ្នោតក្រុមប្រឹក្សាឃុំសង្កាត់អាណត្តិទី៤ ឆ្នាំ២០១៧ របស់សមាជិក សមាជិកា សកម្មជន និងអ្នកគាំទ្រគណបក្សប្រជាជនកម្ពុជារាប់សែននាក់ និងមានការចូលរួមពីប្រជាពលរដ្ឋយ៉ាងច្រើនលើសលប់ ដែលបង្ហាញច្បាស់ពីភាពជោគជ័យ ជាមួយនឹងទំនុកចិត្តយ៉ាងខ្លាំងបំផុត។
បើតាមលោកនាយករដ្ឋមន្ត្រី ហ៊ុន សែន ការចូលរួមរបស់ប្រជាពលរដ្ឋយ៉ាងគគ្រឹកគគ្រេងដង្ហែរបក្ស និងចូលរួមអបអរសាទរ គឺបញ្ជាក់ច្បាស់ពីការគោរពស្រឡាញ់បក្សប្រជាជន ដោយសារបក្សប្រជាជនជាបក្សរបស់ប្រជាជនពិតៗ រួមសុខទុក្ខជាមួយប្រជាជន និងនៅជាមួយប្រជាជនគ្រប់ពេលមិនថាពេលលំបាក ឬសប្បាយរីករាយ។
ខាងក្រោមនេះជាខ្លឹមសារដើមទាំងស្រុងរបស់លោកនាយករដ្ឋមន្ត្រីក្នុងទំព័រហ្វេសប៊ុក៖
គណបក្សប្រជាជនកម្ពុជា ចាប់ឈ្នះតាំងពីការឃោសនាបោះឆ្នោត!
ប្រជាពលរដ្ឋយ៉ាងច្រើនលើសលុបបានមកចូលរួមដង្ហែរបក្សយ៉ាងគគ្រឹកគគ្រេង រីឯបងប្អូន លោក យាយ លោកតាមួយចំនួនដែលមិនបានមក ក៏បានអបអរសាទរសប្បាយរីករាយដោយទឹកមុខស្រស់ថ្លានៅតាមផ្ទះ ទីប្រជុំជន និងតាមផ្លូវ ដែលបានបង្ហាញច្បាស់អំពីភាពជោគជ័យជាមួយនឹងទំនុកចិត្តយ៉ាងខ្លាំងបំផុត!
បងប្អូនប្រជាពលរដ្ឋបានឃើញច្បាស់ហើយ ការគោរពស្រឡាញ់បក្សប្រជាជនយើង គឺមានពីគ្រប់ ស្រទាប់វណ្ណះ! នេះដោយសារបក្សយើងជាបក្សរបស់ប្រជាជនពិតៗ ដែលរួមសុខរួមទុក្ខជាមួយប្រជាជន និងនៅជាមួយប្រជាជនគ្រប់ពេលទាំងពេលក្រលំបាក ទាំងពេលសប្បាយរីករាយ។ បក្សប្រជាជន ដឹកនាំគ្រប់គ្រងប្រទេស គឺបក្សតូចៗទាំងអស់ក៏មានក្តីសុខដូចគ្នា ព្រោះយើងស្រឡាញ់សន្តិភាព!
អរគុណ បងប្អូនជនរួមជាតិទាំងអស់គ្នា!
