ឧត្តមសេនីយ៍ទោ ហ៊ុន ម៉ានិត នៅព្រឹកថ្ងៃទី១៤ ខែ ឧសភា ឆ្នាំ២០១៧នេះ បាននាំយកអាវភ្លៀងជាអំណោយរបស់លោកនាយករដ្ឋមន្ត្រី ហ៊ុន សែន និងភរិយា ចែកជូនកងទ័ពយោធភូមិភាគពិសេស នៅតំបន់ប្រតិបត្តិការសឹងរង ខេត្តកំពង់ឆ្នាំង។ ក្នុងឱកាសនេះមានការចូលរួមពីលោក គីម ប៊ុនថាន លោក ឈួរ ច័ន្ទឌឿននិងលោក សោម សុវណ្ណ ព្រមទាំថ្នាក់ដឹកនាំយោធភូមិភាគពិសេសជាច្រេីនរូបផងដែរ។
ឧត្តមសេនីយ៍ទោ ហ៊ុន ម៉ានិត បានពាំនាំនូវប្រសាសន៍ផ្តាំផ្ញេី និង ការយកចិត្តទុកដាក់ របស់លោកនាយករដ្ឋមន្ត្រី ហ៊ុន សែន និងភរិយា ចំពោះសុខទុក្ខរបស់កងទ័ពទាំងអស់ ដែលកំពុងការពារស្ថេរភាព និង សន្តិសុខជូនប្រទេសជាតិ និង ប្រជាពលរដ្ឋបានល្អប្រសេីរ។
ឧត្តមសេនីយ៍ទោ ហ៊ុន ម៉ានិត បានមានប្រសាសន៍បន្តថា លោកនាយករដ្ឋមន្ត្រី ហ៊ុន សែន គឺជាមេដឹកនាំ ដែលបានផ្តើមជីវិតចេញពីកងទ័ពតស៊ូក្នុងព្រៃតាំងពីអាយុ ១៨ឆ្នាំម្ល៉េះ ដូច្នេះលោកបានយល់យ៉ាងច្បាស់ ពីជីវិតរបស់កងទ័ព និងទុក្ខលំបាកដែលពួកគេបានជួបប្រទះ។
លោកនាយករដ្ឋមន្ត្រី ហ៊ុន សែន ក្នុងពិធីអបអរសាទរទិវាអតីតយុទ្ធជនកម្ពុជាថ្ងៃទី១០ ខែឧសភា ឆ្នាំ២០១៧ បានថ្លែងជំរុញថ្នាក់ដឹកនាំនៃកងយោធពលខេមរភូមិន្ទត្រូវ យកចិត្តទុកដាក់ខ្ពស់ចំពោះសុខទុក្ខរបស់កងទ័ព ក្នុងរដូវភ្លៀងនេះ ។លោកនាយករដ្ឋមន្ត្រី ហ៊ុន សែន បានជំរុញឱ្យនាំយកអាវភ្លៀងជាអំណោយ របស់លោក ទៅចែកជូនកងទ័ពឱ្យបានគ្រប់ៗគ្នា។
លោក ហ៊ុន សែន មុខនៃរាជរដ្ឋាភិបាល បានគូសបញ្ជាក់ថា ក្នុងជីវិតជាកងទ័ពលោកបានស្គាល់គ្រប់រស់ជាតិ ទាំងការចងអង្រឹង ដេកហាលភ្លៀង និង ការឈរដេកផ្អែកដើមឈើក៏មាន។
ឧត្តមសេនីយ៍ទោ សោម សុវណ្ណ មេបញ្ជាការរងយោធភូមិភាគពិសេស ជំនួស មុខឱ្យកងកម្លាំងប្រដាប់អាវុធទាំងអស់ បានថ្លែងអំណរគុណយ៉ាងជ្រាលជ្រៅចំពោះលោកទាំងទ្វេរទាំងពីរ និងប្តេជ្ញាអនុវត្តន៍តាមអនុសាសន៍របស់លោកនាយករដ្ឋមន្ត្រី ហ៊ុន សែន ថ្លែងក្នុងខួបលើកទី១០ ទិវាអតីតយុទ្ធជនកម្ពុជា កាលពីថ្ងៃទី១០ ខែឧសភា ដោយឥតងាករេ ដើម្បីការពាររាជរដ្ឋាភិបាលដែលមានលោក ហ៊ុន សែន ជាប្រមុខ ទោះជាត្រូវធ្វើពលីកម្មក៏មិនរាថយដែរ ៕
