នៅថ្ងៃទី១១ ខែឧសភា ឆ្នាំ២០១៧នេះ នៅសាលាខេត្តកំពង់ឆ្នាំង បានប្រារព្វព្រះរាជពិធីបុណ្យចម្រើនព្រះជន្មរបស់ព្រះករុណាព្រះបាទសម្តេច ព្រះបរមនាថ នរោត្តម សីហមុនីព្រះមហាក្សត្រនៃព្រះរាជាណាចក្រកម្ពុជាក្នុងគម្រប់ព្រះជន្ម៦៤ យាងចូល៦៥ព្រះវស្សា។
ព្រះរាជពិធីនេះ បានប្រារព្វឡើងក្រោមអធិបតីភាពលោក ឈួរ ច័ន្ទឌឿន អភិបាលខេត្តកំពង់ឆ្នាំង និងលោកស្រី ដោក សុទ្ធា ប្រធានក្រុមប្រឹក្សាខេត្ត ព្រមទាំងមានការចូលរួមពីសំណាក់លោក លោកស្រី សមាជិក សមាជិកាក្រុមប្រឹក្សាខេត្ត មន្ត្រីរាជការ កងកម្លាំងប្រដាប់អាវុធ ព្រះសង្ឃ និងលោកគ្រូ អ្នកគ្រូប្រមាណ៣០០នាក់ផងដែរ។
ក្នុងឱកាសដ៏មហានក្ខត្តឫក្សនោះ លោក ឈួរ ច័ន្ទឌឿន អភិបាលខេត្ត តំណាងឱ្យក្រុមប្រឹក្សាខេត្ត គណៈអភិបាលខេត្ត ព្រះសង្ឃ កងកម្លាំងប្រដាប់អាវុធ មន្ត្រីរាជការ និងប្រជាពលរដ្ឋខេត្តកំពង់ឆ្នាំង បានអានសារលិខិតថ្វាយព្រះពរអង្គព្រះមហាក្សត្រ។ ជាមួយគ្នានោះ លោកអភិបាល រួមជាមួយលោក លោកស្រី សមាជិក សមាជិកាក្រុមប្រឹក្សាខេត្ត បានប្រគេន និងជូនទេយ្យវត្ថុ និងបច្ច័យបួនចំពោះព្រះសង្ឃ និងសីលវន្ត សីលវតីជាកិច្ចបញ្ចប់កម្មវិធី៕
