កាលពីព្រឹកថ្ងៃទី១០ ខែឧសភា ឆ្នាំ២០១៧ នៅបរិវេណទីស្នាក់ការកណ្តាលកាកបាទក្រហមកម្ពុជា សាខាកាកបាទក្រហមកម្ពុជារាជធានីភ្នំពេញ សហការជាមួយមូលនិធិស្តារឃីសហរដ្ឋអាមេរិក និងសហភាពសហព័ន្ធយុវជនកម្ពុជា បានរៀបចំបើកកម្មវិធីបំពាក់ឧបករណ៍ជំនួយសំឡេងដោយឥតគិតថ្លៃជូនដល់ប្រជាពលរដ្ឋដែលមានបញ្ហាការស្តាប់ គ ថ្លង់ ក្រោមអធិបតីភាព លោកស្រី ឡោក ខេង អនុប្រធានគណៈកម្មាធិការសាខា និងលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា។
កម្មវិធីនេះប្រព្រឹត្តទៅរយៈពេល៥ថ្ងៃ ចាប់ពីថ្ងៃទី ០៩ ដល់ថ្ងៃទី ១៣ ខែ ឧសភា ឆ្នាំ ២០១៧ ដោយតាមការគ្រោងទុក នឹងមានប្រជាពលរដ្ឋមកទទួលចំនួន១៥០០នាក់ ក្នុងនោះមកពីខេត្តបន្ទាយមានជ័យ បាត់ដំបង ពោធិ៍សាត់ កំពង់ស្ពឺ ព្រៃវែង និងរាជធានីភ្នំពេញផងដែរ។
លោកស្រីអនុប្រធានគណៈកម្មាធិការសាខា និងលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានពាំនាំនូវការផ្តាំផ្ញើសាកសួរសុខទុក្ខពីសំណាក់លោកស្រី ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនដល់បងប្អូនប្រជាពលរដ្ឋទាំងអស់ ព្រមទាំងបានថ្លែងអំណរគុណយ៉ាងជ្រាលជ្រៅចំពោះមូលនិធិស្តារឃីសហរដ្ឋអាមេរិក ដែលមានទឹកចិត្តប្រកបដោយបេះដូងមនុស្សធម៌ បានជួយឧបត្ថម្ភឧបករណ៍ជំនួយសំឡេងជាលើកទី៣ ជូនប្រជាពលរដ្ឋដែលមានបញ្ហាការស្តាប់ គ ថ្លង់ នៅកម្ពុជា ឲ្យបានស្តាប់ឮ ដូចទៅនឹងការចាប់ផ្តើមជីវិតថ្មីរបស់ពួកគាត់។
នាឱកាសនោះផងដែរ គណៈអធិបតីក៏បានសំណូមពរដល់បងប្អូនដែលបានទទួលនូវឧបករណ៍ជំនួយសំឡេងរួចហើយ សូមថែរក្សាឲ្យបានល្អ និងទុកដាក់ឲ្យបានត្រឹមត្រូវ ដើម្បីប្រើប្រាស់បានយូរអង្វែង ហើយចំពោះករណីឧបករណ៍មានបញ្ហាអស់ថ្ម ឬខូច សូមទំនាក់ទំនងតាមសាខាកាកបាទក្រហមកម្ពុជា រាជធានី-ខេត្ត ដែលខ្លួនរស់នៅ ដើម្បីធ្វើការផ្លាស់ប្តូរ ឬជួសជុលដោយឥតគិតថ្លៃ៕
