លោក ហ៊ុន ម៉ាណែត នៅក្នុងវេទិការយុវជនក្រោមប្រធានបទ«ត្រៀមខ្លួនក្លាយខ្លួនជាមន្ត្រីរាជការសាធារណៈ» នៅសាលាខេត្តកំពង់ចាមថ្ងៃទី០៩ ខែឧសភា ឆ្នាំ២០១៧នេះ បានមានប្រសាសន៍ថា យុវជនឈានដល់ដំណាក់កាលម្ចាស់ការលើខ្លួនឯង ក្នុងការកសាងអនាគតខ្លួន ព្រោះយុវជនមានឱកាសច្រើនណាស់នាពេលបច្ចុប្បន្នដែលខុសគ្នាឆ្ងាយណាស់កាលពីអតីតកាល។ ស្ថានភាពប្រទេសកាលពីអតីតកាល យុវជនមិនមានឱកាសរៀនសូត្រនៅតាមមហាវិទ្យាល័យ គ្មានឱកាសទទួលបានការងារ គ្មានការកសាងជីវភាពធូធារនោះទេ។ ប៉ុន្តែយុវជនយើងសព្វថ្ងៃនេះមានឱកាសច្រើនណាស់ក្នុងការសិក្សាស្រាវជ្រាវ ឱកាសស្វែងរកការងារធ្វើ និងឱកាសផ្សេងៗទៀត។
លោក ហ៊ុន ម៉ាណែត បន្តថា ប្រទេសជាតិមួយអាចអភិវឌ្ឍទៅមុខបាន គឺអាស្រ័យលើអ្នកដឹកនាំរដ្ឋាភិបាលដែលមានគោលនយោបាយច្បាស់លាស់ មានចក្ខុវិស័យវែងឆ្ងាយ មានមន្ត្រីរាជការដែលជាអ្នកប្រតិបត្តិប្រកបដោយសមត្ថភាព ការទទួលខុសត្រូវ គុណធម៌ សីលធម៌និងមានការចូលរួមប្រកបដោយប្រសិទ្ធិភាពពីផ្នែកដែលពាក់ព័ន្ធ។
លោក ហ៊ុន ម៉ាណែត ឲ្យដឹងទៀតថា មន្ត្រីរាជការជាង ៣០ម៉ឺននាក់ បានបម្រើប្រជាពលរដ្ឋជាង ១៥លាននាក់នៅទូទាំងប្រទេស គឺជាឆ្អឹងខ្នងនៃប្រទេសជាតិដែលរាជរដ្ឋាភិបាលបាននឹងកំពុងយកចិត្តទុកដាក់លើកទឹកចិត្តមន្រ្តីរាជការនៅក្នុងការអនុវត្តតួនាទីភារកិច្ចរបស់ខ្លួនរួមមានការពង្រឹងគុណភាព សមត្ថភាពតាមរយៈការជ្រើសរើស និងការបណ្តុះបណ្តាល។ លើសពីនេះ រាជរដ្ឋាភិបាលក៏បានពង្រឹងប្រព័ន្ធការងារ និងមធ្យោបាយការងារ ការលើកទឹកចិត្ត ទាំងកិត្តិយសនិងកម្រិតជីវភាពតាមរយៈការតម្លើងប្រាក់បៀវត្ស និងអត្ថប្រយោជន៍ផ្សេងៗជាច្រើនទៀត ព្រមទាំងផ្តល់ការទុកចិត្ត និងផ្តល់សិទ្ធិដល់មន្ត្រីថ្នាក់ក្រោមជាតិផងដែរ។ នេះគឺជាគុណតម្លៃរបស់មន្ត្រីរាជការ ដែលរារដ្ឋាភិបាលបានយកចិត្តទុកដាក់បង្កើនប្រសិទ្ធភាពក្នុងការបម្រើប្រជាពលរដ្ឋ។
ទន្ទឹមគ្នានេះ លោក ហ៊ុន ម៉ាណែត បានលើកជាសំណួរថា តើយុវជនយើងត្រូវធ្វើអ្វីខ្លះជួយដល់សង្គមជាតិ?
លោក ហ៊ុន ម៉ាណែត មានប្រសាសន៍ថា ជួយខ្លួនឯង គឺជួយសង្គមជាតិ យុវជនត្រូវខិតខំសិក្សារៀនសូត្រ មិនបង្កបញ្ហាដល់សង្គមជាតិ មានគុណធម៌ សីលធម៌ មានន័យថាយុវជនយើងបានជួយសង្គមជាតិរួចទៅហើយ។ យុវជនត្រូវគិតថាបើមិនបានជួយដោះស្រាយបញ្ហាសង្គមទេ សូមកុំបង្កើតបញ្ហាដល់សង្គមជាតិក្នុងការបំពេញមហិច្ឆិតា បំពេញតម្រូវការខ្លួនឯងគឺត្រូវអភិវឌ្ឍខ្លួនឯងឱ្យស្របទៅនឹងការអភិវឌ្ឍសង្គមជាតិ។ ព្រោះថា ការអភិវឌ្ឍសង្គមជាតិមួយត្រូវទាមទារនូវការចូលរួមទាំងអស់គ្នា។ ជាក់ស្តែងការធ្វើកំណែរទម្រង់វិស័យអប់រំមួយត្រូវទាមទារការចូលរួមពីផ្នែកដែលពាក់ព័ន្ធ ដែលជាលទ្ធផលយើងទទួលបាននូវគុណតម្លៃពីសង្គម និងការផ្លាស់ប្តូរផ្នត់គំនិតឱ្យយុវជនមានការការខិតខំប្រឹងប្រែង។នេះបើតាមឯកឧត្តម ហ៊ុន ម៉ាណែត។
លោក ហ៊ុន ម៉ាណែត បញ្ជាក់ថា យុវជនត្រូវអភិវឌ្ឍខ្លួនឯង ត្រូវត្រៀមខ្លួនជាអ្នកដឹកនាំជំនាន់ក្រោយដើម្បីចូលរួមដឹកនាំប្រទេសឱ្យកាន់តែប្រសើរពីមួយជំនាន់ទៅមួយជំនាន់ ដើម្បីកូនចៅយើងរស់នៅកាន់តែប្រសើរ និងកាន់តែរីកចម្រើន៕
