រដ្ឋមន្រ្ដីក្រសួងព័ត៌មាន គ្រោងសាងសង់សារមន្ទីរគោរពវិញ្ញាណក្ខន្ធអ្នកព័ត៌មាន ដើម្បីឲ្យតម្លៃក្នុងការលះបង់របស់អ្នកសារព័ត៌មាន។ លោក ខៀវ កាញ៉ារិទ្ធ រដ្ឋមន្ត្រីក្រសួងព័ត៌មាន បានបញ្ជាក់ថា ក្នុងរយៈពេល ១ ឆ្នាំ ឬ ២ ឆ្នាំខាងមុខទៀត រដ្ឋាភិបាលកម្ពុជា អាចនឹងសាងសង់សារមន្ទីរសារព័ត៌មាននៅកម្ពុជា។ ការលើកឡើងបែបនេះរ ក្នុងពិធីគោរពវិញ្ញាណខណអ្នកសារព័ត៌មាន ដែលបានពលីជីវិតក្នុងបុព្វហេតុព័ត៌មាន នៅសួនច្បារមុខសាកលវិទ្យាល័យជាតិគ្រប់គ្រង នៅថ្ងៃទី០៣ ខែឧសភា ឆ្នាំ២០១៧។
លោករដ្ឋមន្រ្ដីបញ្ជាក់ថា គម្រោងសាងសង់សារមន្ទីរសារព័ត៌មាននេះ គឺត្រូវចំណាយថវិការដ្ឋទាំងស្រុង បើរដ្ឋាភិបាលអនុញ្ញាត យ៉ាងយូរ ១ ឬ ២ ឆ្នាំទៀត នឹងកសាងសារមន្ទីរសារព័ត៌មានរួច។ លោកបន្ថែមថា ការលះបង់របស់អ្នកសារព័ត៌មានដើម្បីជាតិ សមនឹងទទួលការគោរពឲ្យតម្លៃ។ លោកបន្ដថា សារមន្ទីរសារព័ត៌មាននេះ នឹងប្រមូលយកស្នាដៃល្អរបស់អ្នកសារព័ត៌មាន ទាំងជាសំណេរ ឬសម្ភារៈ ដែលអ្នកសារព័ត៌មានធ្លាប់ប្រើប្រាស់។ តែយ៉ាងណា នេះគ្រាន់តែជាគម្រោងតែប៉ុណ្ណោះ ដោយរង់ចាំរដ្ឋាភិបាលផ្តល់កញ្ចប់ថវិកាសិន។
សូមបញ្ជាក់ថា ការគោរពវិញ្ញាណក្ខន្ធចំថ្ងៃដែលពិភពលោក រួមទាំងកម្ពុជាផង កំពុងប្រារព្ធទិវាសេរីភាពសារព័ត៌មាន៕
