នៅថ្ងៃទី១ ខែឧសភា ឆ្នាំ២០១៧នេះ មានបេក្ខជនមួយរូបទៀតហើយដែល ដាក់ពាក្យសុំចាកចេញពីគណបក្សសង្គ្រោះជាតិ ក្រោមហេតុផល អស់ជំនឿលើថ្នាក់ដឹកនាំបក្ស ថាអាចការពារផលប្រយោជន៍ជាតិបាន។
លោក នេត សៅ អាយុ ៦៤ឆ្នាំ ដែលជាបេក្ខភាពឈរឈ្មោះបោះឆ្នោតក្រុមប្រឹក្សាឃុំក្រយា លេខរៀងទី២ របស់គណបក្សសង្គ្រោះជាតិ បានបញ្ជាក់ក្នុងលិខិតសុំលាលែងថា លោកមិនអាចចូលរួមជាមួយបក្សនេះបានតទៅទៀតទេ ដោយលោកមិនមានជំនឿលើគោលការណ៍ដឹកនាំរបស់គណបក្ស និងដោយមើលឃើញថា គណបក្សនេះមិនអាចការពារផលប្រយោជន៍ដល់សង្គមជាតិ និងប្រជាពលរដ្ឋបាន។
ជាមួយគ្នានេះលោក នេត សៅ បាន លើកឡើងត្រង់ៗថា បក្សសង្គ្រោះជាតិ គ្រប់គ្រងគ្មានតម្លាភាព និងពុករលួយក្នុងការរៀបចំបេក្ខជនឈរឈ្មោះ។ គ្រប់គ្រងផ្តាច់ការ បក្ខពួកនិយម និងមិនបានយកចិត្តទុកដាក់ការពារផលប្រយោជន៍ប្រជាជនឡើយ។
គួរបញ្ជាក់ថា ខណៈដែលការបោះឆ្នោតក្រុមប្រក្សាឃុំ សង្កាត់ កាន់តែខិតជិតមកដល់ បេក្ខជនគណបក្សសង្គ្រោះជាតិ មួយចំនួនធំបានសម្រេចចាកចេញពីគណបក្សនេះជាបន្តបន្ទប់ ហើយពួកគេបានបង្ហាញនូវហេតុផលស្រដៀងៗគ្នាជុំវិញការលាលែងរបស់ខ្លួន គឺបញ្ហាពុករលួយ ក្នុងការរៀបចំបេក្ខភាពចូលរួមបោះឆ្នោត៕
