លោកឧបនាយករដ្ឋមន្ត្រីប្រចាំការ ប៊ិន ឈិន រដ្ឋមន្ត្រីស្តីទីទទួលបន្ទុកទីស្តីការគណៈរដ្ឋមន្ត្រី បានថ្លែងថា កំពង់ផែស្វយ័តក្រុងព្រះសីហនុ គឺជាច្រកសេដ្ឋកិច្ចជាតិដែលមានចរិតជាអង្គភាពយុទ្ធសាស្រ្ត ក្នុងការទ្រទ្រង់សកម្មភាពពាណិជ្ជកម្ម អន្តរជាតិរបស់កម្ពុជាសម្រាប់ជំរុញកំណើនសេដ្ឋកិច្ចជាតិកន្លងមក និងនាពេលបច្ចុប្បន្ន ហើយនិងបន្តទៅអនាគត។
ក្នុងពិធីសំណេះសំណាលជាមួយកម្មករ-កម្មការិនីបុគ្គលិកកំពង់ផែស្វយ័តក្រុងព្រះសីហនុ នាឱកាសអបអរសាទរខួបលើកទី១៣១ នៃទិវាពលកម្មអន្តរជាតិ ១ ឧសភា ២០១៧ នាព្រឹកថ្ងៃទី១ឧសភានេះ នៅកំពង់ផែស្វយ័តក្រុងព្រះសីហនុ លោកឧបនាយករដ្ឋមន្ត្រីប្រចាំការ ប៊ិន ឈិន បានមានប្រសាសន៍បន្តថា បច្ចុប្បន្ននេះ កំពង់ផែស្វយ័តក្រុងព្រះសីហនុមានទំហំតូច ធៀបនឹងកំពង់ផែផ្សេងៗក្នុងតំបន់ ប៉ុន្តែគុណភាព និងល្បឿនសេវាកម្មលើកដាក់ នៅកំពង់ផែស្វយ័តក្រុងព្រះសីហនុ បានលើកកំពស់ជាបន្តបន្ទាប់ដែលធ្វើឲ្យគុណភាពសេវាកម្មបច្ចុប្បន្ននេះ អនុវត្តបានដូចកំពង់ផែផ្សេងៗក្នុងតំបន់ផងដែរ។ ទាំងនេះ គឺជាចំណែកនៃការចូលរួមលើកកំពស់កំណើនសេដ្ឋកិច្ចជាតិយ៉ាងពិតប្រាកដ។
លោកឧបនាយករដ្ឋមន្ត្រី ប៊ិន ឈិន បានបន្តថា កំពង់ផែស្វយ័តក្រុងព្រះសីហនុ បានចូលរួមយ៉ាងសំខាន់ក្នុងការអភិវឌ្ឍសេដ្ឋកិច្ចកម្ពុជា។ ទំនិញឆ្លងកាត់ផែនេះ បានកើនឡើងជាប្រចាំ ក្នុងឆ្នាំ២០១៤ មានកំណើន ១៦%, ឆ្នាំ២០១៥ មានកំណើនជាង ១៧%, និងឆ្នាំ២០១៦ មានកំណើនជាង ៣% ។ តាមនិទស្សន៍បរិមាណកុងតេន័រឆ្លងកាត់កំពង់ផែស្វយ័ត ក្រុងព្រះសីហនុនៅឆ្នាំ ២០២៣ នឹងកើនលើស ៧០០,០០០TEUs ។
បើតាមលោកឧបនាយករដ្ឋមន្ត្រីប្រចាំការ ក្នុងពេលដ៏ខ្លីខាងមុខកំពង់ផែនេះនឹងដើរតួនាទីកាន់តែមានសារៈសំខាន់ទ្វេឡើង សម្រាប់បម្រើឱ្យចរន្តសេដ្ឋកិច្ច និង ពង្រឹងឧត្តមភាពនៃការប្រកួតប្រជែងរបស់កម្ពុជាផងដែរ នៅពេលឤស៊ានអនុវត្តកម្មវិធីតំបន់ពាណិជ្ជកម្មសេរីឤស៊ានដែលនឹងធ្វើឱ្យចលនានៃចរាចរទំនិញនាំចេញ-នាំចូល កាន់តែមានសកម្មភាពមមាញឹក។ លើសពីនេះទៅទៀត រាជរដ្ឋាភិបាលកំពុងអនុវត្តនូវគោលនយោបោយអភិវឌ្ឍវិស័យឧស្សាហកម្ម សំដៅជំរុញឧស្សាហកម្មកម្ពុជាឡើងមួយកម្រិតទៀត ក្នុងខ្សែចង្វាក់តម្លៃនៃសេដ្ឋកិច្ចតំបន់ និងពិភពលោក ពិសេសក្នុងទីផ្សារឤស៊ី ដែលកំពុងមានកំណើនខ្ពស់ ដើម្បីរួមចំណែកជំរុញកំណើនសេដ្ឋកិច្ច ក៏ដូចជាបង្កើតការងារ និងបង្កើនចំណូលជូនប្រជាជន ដែលកត្តានេះនឹងធ្វើឱ្យសន្ទុះនៃកំណើនការនាំចេញ និងកំណើនសកម្មភាពឆ្លងកាត់ផែ ពិតជានឹងមានតម្រូវការច្រើនលើសេវាកម្មរបស់កំពង់ផែ។
លោកឧបនាយករដ្ឋមន្ត្រីប្រចាំការ បានមានប្រសាសន៍លើកឡើងថា ក្នុងនាមខ្ញុំព្រះករុណាខ្ញុំផ្ទាល់ និងក្នុងនាមរាជរដ្ឋាភិបាលកម្ពុជា ខ្ញុំព្រះករុណាខ្ញុំ សូមបន្តការឯកភាព និងការគាំទ្រយ៉ាងពេញទំហឹងចំពោះគម្រោងសាងសង់ ចំណតផែកុងតេន័រថ្មី ប្រវែង ៣៥០ម៉ែត្រ និងជម្រៅទឹក ១៤.៥ម៉ែត្រ និងការបំពាក់គ្រឿងចក្រធុនធ្ងន់បន្ថែម។ នៅពេលគម្រោងនេះសាងសង់រួចរាល់ នៅចុងឆ្នាំ២០២២ ឬចុងឆ្នាំ២០២៣ នឹងអនុញ្ញាតឲ្យនាវាខ្នាតធំប្រមាណ ៩៣% ក្នុងតំបន់ចូលចតនៅកំពង់ផែស្វយ័តក្រុងព្រះសីហនុបាន ធ្វើអោយ ឧបសគ្គជម្រៅទឹកសម្រាប់កំពង់ផែត្រូវបានដោះស្រាយ ព្រមទាំងតម្លៃដឹកជញ្ជូនតាមសមុទ្រ (Ocean FreightFee) នឹងមានតម្លៃប្រហាក់ប្រហែលជាមួយប្រទេសផ្សេងៗក្នុងតំបន់ ព្រមទាំងផ្តល់លទ្ធភាពសម្រាប់ការនាំទំនិញ ចេញ-ចូល ដោយផ្ទាល់ពីកម្ពុជា ទៅកាន់សហគមន៍អឺរ៉ុប៕
